ພິທີເປີດຊຸດຮຽນກໍ່ສ້າງນາຍສິບທະຫານຮາບລະບົບ 1 ປີ ຊຸດທີ VII ຂອງກອງບັນຊາການທະຫານແຂວງຫຼວງພະບາງ ປະຈໍາສົກປີ 2021 – 2022 ໄດ້ຈັດຂື້ນໃນວັນທີ 5 ຕຸລາ 2021 ນີ້ທີ່ສະໂມສອນຂອງໂຮງຮຽນການທະຫານທ້ອງຖິ່ນ ໂດຍການເປັນປະທານ ຂອງສະຫາຍ ພັນເອກ ວິລ່ຽມ ວົງທິສານ ຫົວໜ້າການທະຫານກອງບັນຊາການທະຫານແຂວງຫຼວງພະບາງ ,ມີສະຫາຍ ພັນໂທ ຄໍາສອນ ໂພທິວັນ ຫົວໜ້າຫ້ອງເສນາທິການທະຫານແຂວງ,ມີສະຫາຍ ພັນໂທ ໄມທົນ ຈິນດາລາ ຫົວໜ້າຫ້ອງການ ປກຊ – ປກສ ແຂວງ, ມີຄະນະບັນຊາ 5 ຫ້ອງອ້ອມຂ້າງ, ພະແນກການທີ່ກ່ຽວຂ້ອງ ແລະ ຄະນະອໍານວຍການ ພ້ອມດ້ວຍຄູ-ອາຈານ ຕະຫຼອດຮອດນັກຮຽນ ເຂົ້າຮ່ວມ 150 ສະຫາຍ.

ສະຫາຍ ພັນໂທ ຊຽງຕີ ສະວະບຸດ ຮອງຫົວໜ້າຫ້ອງເສນາທິການທະຫານແຂວງ ໄດ້ຜ່ານແຜນການກໍ່ສ້າງນາຍສິບທະຫານຮາບຊຸດທີ VII ຂອງກອງບັນຊາການທະຫານແຂວງຫຼວງພະບາງ ຈຸດປະສົງ ເພື່ອກໍ່ສ້າງພົນທະຫານໃຫ້ມີຄວາມຮູ້ພື້ນຖານໃນການບັນຊາຂັ້ນຕົ້ນ, ມີລະບຽບວິໄນເຂັ້ມງວດ, ມີຄວາມສາມາດຮັບຜິດຊອບໜ້າທີ່ວຽກງານຂອງຕົນຕາມການຈັດຕັ້ງມອບໝາຍໃຫ້, ເພື່ອໃຫ້ນັກຮົບຢູ່ໃນບັນດາກົມກອງມີຄຸນທາດການເມືອງໜັກແໜ້ນ, ມີທັດສະນະຫຼັກໝັ້ນຊົນຊັ້ນ, ມີຄຸນສົມບັດສິນທໍາປະຕິວັດ, ມີສະຕິຕໍ່ການຈັດຕັ້ງ ແລະ ມີຄວາມອົດທົນໜຽວແໜ້ນຜ່ານຜ່າທຸກຂໍ້ຫຸ້ຍງຍາກເຮັດສໍາເລັດໜ້າທີ່ການເມືອງຂອງຕົນຕາມຂັ້ນເທິງມອບໝາຍໃຫ້, ກໍາໄດ້ເນື້ອໃນດ້ານສິນລະປະຢຸດ – ຍຸດທະວິທີກໍ່ຄືຫຼັກການບັນຊາຮູ້ນໍາໄປຈັດຕັ້ງປະຕິບັດຢູ່ກົມກອງຂອງຕົນໃຫ້ມີຄຸນນະພາບ ແລະ ກຽມພ້ອມສູ້ຮົບໃຫ້ໄດ້ຮັບຜົນສູງ. ການອົບຮົມພື້ນຖານໃຊ້ເວລາ 1 ປີ,ອົບຮົມຕົວຈິງ 10 ເດືອນ ເທົ່າກັບ 205 ວັນ, ພາກຮຽນ I ໃຊ້ເວລາ 105 ວັນ, ພາກຮຽນ IIໃຊ້ເວລາ 100 ວັນ, ສອບເສັງພາກຮຽນ I ໃຊ້ເວລາ 5 ວັນ ແລະເສັງຈົບຊັ້ນ 15 ວັນ.

ພິທີອັນມີຄວາມໝາຍຄວາມສໍາຄັນຄັ້ງນີ້ ສະຫາຍ ພັນເອກ ວິລ່ຽມ ວົງທິສານ ຫົວໜ້າການທະຫານກອງບັນຊາການທະຫານແຂວງ ກໍໄດ້ຮຽກຮ້ອງ ໃຫ້ບັນດາ ຜູ້ທີ່ເຂົ້າຮ່ວມພິທີ ແລະສໍາມະນາກອນໃນຊຸດອົບຮົມ ຕ້ອງໄດ້ຊຸກຍູ້ ແລະສ້າງເງື່ອນໄຂອໍານວຍຄວາມສະດວກໃຫ້ແກ່ຊຸດອົບຮົມດໍາເນີນໄປຕາມແຜນການ, ສະໜອງວັດຖຸງົບປະມານຮັບໃຊ້ໃຫ້ພຽງພໍ, ຊຸດອົບຮົມໃນຄັ້ງນີ້ເປັນການກໍ່ສ້າງຊັບພະຍາກອນມະນຸດເວົ້າສະເພາະແມ່ນ ເພື່ອປັບປຸງກໍາລັງທ້ອງຖິ່ນ ທົ່ວກອງບັນຊາການທະຫານແຂວງຫຼວງພະບາງ ໃຫ້ມີຄວາມເຕີບໃຫ່ຍເຂັ້ມແຂງຮອບດ້ານ, ຕ້ອງເອົາໃຈໃສ່ຊີ້ນໍາຄູອາຈານປະຕິບັດຫຼັກສູດການຮຽນ-ການສອນ ມີການປັບປຸງຮູ້ໝູນໃຊ້ແນວຄິດໃໝ່ ເພື່ອສົ່ງຄວາມຮູ້ໃຫ້ນັກຮຽນຢ່າງທົ່ວເຖິງ ແລະແບບຢ່າງທີ່ດີ, ຮູ້ເຄື່ອນໄຫວວຽກງານພັກ – ວຽກງານການເມືອງ, ຕິດພັນກັບຂະບວນການກິລາສິນລະປະວັນນະຄະດີ ເພື່ອສ້າງຄວາມເບີກບານມ່ວນຊື່ນ, ມີສໍາຫຼວດກວດກາເປັນແຕ່ລະໄລຍະ ພ້ອມດຽວກັນ ຕ້ອງມີສະຕິ ໃນປ້ອງກັນສະກັດກັ້ນຕ້ານການລະບາດຂອງພະຍາດໂຄວິດ 19 ຮັບປະກັນບໍ່ໃຫ້ມີຜູ້ຕິດເຊື້ອຢູ່ໃນໂຮງຮຽນ.

ຈາກນັ້ນສະຫາຍ ພັນເອກ ວິລ່ຽມ ວົງທິສານ ກໍໄດ້ກ່າວເປີດຊຸດອົບຮົມກໍ່ສ້າງນາຍສິບລະບົບ 1 ປີ ປະຈໍາສົກປີ 2021 – 2022 ຂອງກອງບັນຊາການທະຫານແຂວງຫຼວງພະບາງ ຢ່າງເປັນທາງການ.
ຂ່າວ: ໄຊຍະສອນ ລັດຕະນະວົງ.