ເປີດບໍລິການແລ້ວຕະຫຼາດ ເອບີ ໂຊກໄຊຄົບວົງຈອນ ຕັ້ງຢູ່ບ້ານ ຫຼັກ 2 ເທດສະບານເມືອງ ແລະ ແຂວງສາລະວັນ ໂດຍແມ່ນ ບໍລິສັດເອບີ ກໍ່ສ້າງຂົວ-ທາງ ແລະ ສ້ອມແປງເຄຫາສະຖານ ເປັນຜູ້ລົງທຶນ 100% ດ້ວຍຮູບແບບການເຊົ່າສຳປະທານດິນລັດໃນເນື້ອທີ່ 22,401 ຕາແມັດ, ມີອາຍຸການສໍາປະທານ 50 ປີ ເຊິ່ງເລີ່ມແຕ່ປີ 2018-2068 ໄດ້ຈັດແບ່ງການກໍ່ສ້າງອອກເປັນ 3 ໄລຍະ ມາຮອດປະຈຸບັນການກໍ່ສ້າງສໍາເລັດໄລຍະໜຶ່ງຢ່າງສົມບູນ, ໃນນັ້ນມີການບຸກເບີກເນື້ອທີ່ດິນ, ກໍ່ສ້າງອາຄານຂາຍເຄື່ອງອຸປະໂພກ ແລະ ອາຄານຂາຍເຄື່ອງສົດ, ມີເສັ້ນທາງພາຍໃນ, ມີຫ້ອງນໍ້າ, ຮົ້ວອ້ອມ, ສະຖານທີ່ຈອດລົດ ແລະ ອື່ນໆ ຢ່າງເໝາະສົມ ສາມາດເປີດບໍລິການໃຫ້ພໍ່ແມ່ປະຊາຊົນມາໃຊ້ບໍລິການຊື້-ຂາຍ, ບໍລິການໃຫ້ເຊົ່າຫ້ອງຂາຍໄດ້.


ພິທີເປີດຕະຫຼາດເອບີ ໂຊກໄຊຄົບວົງຈອນ ໄດ້ຈັດຂຶ້ນຢ່າງເປັນທາງການ ໃນວັນທີ 22 ມີນາ 2021, ຢູ່ທີ່ເດີ່ນຕະຫຼາດໃໝ່ເອບີ ໂຊກໄຊ ໂດຍການເຂົ້າຮ່ວມຂອງທ່ານ ພູທົງ ຄໍາມະນີວົງ ຮອງເຈົ້າແຂວງ ຜູ້ຊີ້ນໍາວຽກງານຂົງເຂດເສດຖະກິດຂັ້ນແຂວງ, ມີທ່ານ ຄໍາຜ່ານ ສີລາວີ ຫົວໜ້າພະແນກ ອຸດສະຫາກໍາ ແລະ ການຄ້າແຂວງ, ທ່ານ ນາງ ສຸພາພອນ ບຸນທະວີສານ ຜູ້ອໍານວຍການຕະຫລາດເອບີ ໂຊກໄຊແຂວງສາລະວັນ, ມີບັນດາທ່ານຄະນະນໍາຂັ້ນແຂວງ, ເມືອງ, ນັກທຸລະກິດທັງພາຍໃນ ແລະ ຕ່າງປະເທດ ຜູ້ປະກອບການຊາວຄ້າຂາຍ ແລະ ພໍ່ແມ່ປະຊາຊົນເຂົ້າຮ່ວມ.


ຜູ້ເຂົ້າຮ່ວມຍັງໄດ້ຮັບຊົມສິລະປະ, ຜ່ານປະຫວັດຄວາມມາຂອງໂຄງການກໍ່ສ້າງຕະຫຼາດ, ຕັດແຖບຜ້າ, ລັ່ນຄ້ອງ 9 ບາດ ເພື່ອເປັນສີລິມຸງຄຸນ ແລະ ເປີດຕະຫຼາດເອບີ ໂຊກໄຊຄົບວົງຈອນ ຢ່າງເປັນທາງການ.

ພາບ-ຂ່າວ: ກິນດາວັນ ອ້ວນນາຄູ