ພິທີເຜີຍແຜ່ຜົນສຳເລັດກອງປະຊຸມໃຫຍ່ຜູ້ແທນກຳມະບານລາວ ທົ່ວປະເທດ ຄັ້ງທີ່ VIII ໃຫ້ຄະນະບໍລິຫານງານກຳມະບານ ແລະ ສະມາຊິກກຳມະບານ ອ້ອມຂ້າງເທດສະບານແຂວງອຸດົມໄຊ ໄດ້ຈັດຂື້ນ ໃນວັນທີ່ 18 ມີນານີ້ ທີ່ສະໂມສອນແຂວງ ໂດຍການເປັນປະທານຂອງ ສະຫາຍ ໄຊພອນ ຖົມປະດິດ ກຳມະການຄະນະບໍລິຫານງານສູນກາງສະຫະພັນກຳມະບານລາວ, ປະທານສະຫະພັນກຳມະບານແຂວງອຸດົມໄຊ, ມີຄະນະບໍລິຫານງານສະຫະພັນກຳມະບານແຂວງ ພ້ອມດ້ວຍສະມາຊິກກຳມະບານອ້ອມຂ້າງເຂົ້າຮ່ວມຢູ່ງຫຼວງຫຼາຍ.

ພິທີ ສະຫາຍ ໄຊພອນ ຖົມປະດິດ ກຳມະການຄະນະບໍລິຫານງານສູນກາງສະຫະພັນກຳມະບານລາວ ປະທານສະຫະພັນກຳມະບານແຂວງ ກໍ່ໄດ້ຍົກໃຫ້ເຫັນເຖີງບັນຍາກາດໃນກອງປະຊຸມໃຫຍ່ຜູ້ແທນກຳມະບານລາວ ທົ່ວປະເທດຄັ້ງທີ່  VIII ໃນຄັ້ງວັນທີ່ 3-4 ທັນວາ 2020 ຜ່ານມາທີ່ນະຄອນຫຼວງວຽງຈັນ ດ້ວຍບັນຍາກາດທີ່ຟົດຟື້ນ ແລະ ມີຄວາມໝາຍສະຄັນຢ່າງເລີກເຊີ່ງ, ໃນກອງປະຊຸມມີຜູ້ແທນເຂົ້່າຮ່ວມທັງໝົດ 495 ສະຫາຍ ໃນນີ້ມີຜູ້ແທນສົມບູນ 400 ສະຫາຍ, ຍີງ 71 ສະຫາຍ, ຜູ້ແທນກອງປະຊຸມໃຫຍ່ເຫັນດີເປັນເອກະ ພາບ ຮັບຮອງເອົາບົດລາຍງານການເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກໍາມະບານລາວ ທົ່ວປະເທດຄັ້ງທີ VII ໄດ້ຕີລາຄາ ດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາ-ຊີ້ນໍາ ແຕ່ປີ 2015-2020 ເປັນຕົ້ນແມ່ນທາງດ້ານການເມືອງ-ແນວຄິດ ຄະນະບໍລິຫານງານສະຫະພັນກຳມະບານແຕ່ລະຂັ້ນໄດ້ຄົ້ນຄວ້າ, ເຊື່ອມຊືມ, ຜັນຂະຫຍາຍແນວທາງແຜນນະໂຍບາຍຂອງພັກ, ກົດໝາຍຂອງລັດ, ມະຕິກອງປະຊຸມໃຫຍ່ຜູ້ແທນກຳມະບານລາວ ຢ່າງເລິກເຊິ່ງ ໂດຍສະເພາະແມ່ນ ການສຶກສາອົບຮົມ ການເມືອງ-ແນວຄິດ, ຈັດຕັ້ງເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຈັດຕັ້ງ ເຊື່ອມຊຶມມູນເຊື້ອວັນສຳຄັນຂອງຊາດ ໃຫ້ແກ່ສະມາຊິກກຳມະບານ, ວັນສ້າງຕັ້ງສະຫະພັນກໍາມະບານລາວ, ວັນຄ້າຍວັນເກີດຂອງທ່ານຜູ້ນຳ, ໃຫ້ພະນັກງານ-ລັດຖະກອນ, ກຳມະກອນ ແລະ ຜູ້ອອກແຮງງານ ຢູ່ຫົວໜ່ວຍແຮງງານ ການລົງທຶນພາຍໃນ ແລະ ຕ່າງປະເທດ ເຮັດໃຫ້ສະພາບແນວຄິດຂອງຄະນະບໍລິຫານງານສະຫະພັນກໍາມະບານແຕ່ລະຂັ້ນ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ມີຄວາມໜັກແໜ້ນທາງດ້ານການເມືອງ, ມີຄວາມເຊື່ອໝັ້ນຕໍ່ການນໍາພາຂອງພັກ, ມີນໍ້າໃຈຮັກຊາດ, ຮັກລະບອບໃໝ່, ມີລະບຽບວິໄນ ໃນການອອກແຮງງານ, ມີຄວາມສາ ມັກຄີເປັນປຶກແຜ່ນ ແລະອຸ່ນອຽນທຸ່ນທ່ຽງປະຕິບັດໜ້າທີ່ວຽກງານດີຂຶ້ນກວ່າເກົ່າ, ສື່ມວນຊົນຂອງສະຫະພັນກໍາມະບານລາວ ໄດ້ຮັບການປັບປຸງດີຂຶ້ນກວ່າເກົ່າ, ອັນພົ້ນເດັ່ນກວ່າໝູ່ແມ່ນໜັງສືພິມແຮງງານ, ວາລະສານກຳມະບານລາວ, ການຈັດລາຍການວິທະຍຸ ແລະ ໂທລະພາບ, ສື່ອອນລາຍກຳມະບານ ໄດ້ໂຄສະນາເຜີຍແຜ່ ແນວທາງນະໂຍບາຍຂອງພັກ, ກົດໝາຍ ແລະ ນິຕິກຳໃຕ້ກົດໝາຍຂອງລັດ, ສະໜອງຂໍ້ມູນຂ່າວສານ, ຂະບວນການເຄື່ອນໄຫວວຽກງານກໍາມະບານ, ກໍາມະກອນ ແລະ ຜູ້ອອກແຮງງານສູ່ສັງຄົມຮັບຮູ້, ການຈັດຕັ້ງກໍາມະບານໄດ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ. ນອກນີ້ ຍັງມີຫຼາຍບັນຫາທີ່ກອງປະຊຸມຍົກຂື້ນມາ ພ້ອມທັງກຳນົດທິດທາງແຜນການໃນຕໍ່ໜ້າຕື່ມອີກ.

ພາບ-ຂ່າວ: ແສງອາທິດ