ກອງປະຊຸມຄົບຄະນະບໍລິຫານງານພັກເມືອງຊະນະສົມບູນ ຄັ້ງທີ 5 ສະໄໝທີ VIII ໄດ້ເປີດຂື້ນ ແລະ ອັດລົງດ້ວຍຜົນສຳເລັດອັນຈົບງາມ ໃນວັນທີ 23 ມີນາ 2021 ນີ້ ຢູ່ທີ່ຫ້ອງປະຊຸມນ້ອຍຂອງຫ້ອງວ່າການເມືອງ ພາຍໃຕ້ການເປັນປະທານຂອງ ສະຫາຍ ສະນັ່ນ ສີພາພົມມະຈັນ ຜູ້ຮັກສາການເລຂາພັກແຂວງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງຈຳປາສັກ ແລະ ເປັນກຽດເຂົ້າຮ່ວມຕ້ອນຮັບຂອງ ສະຫາຍ ສອນສະຫວັນ ສີວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆ ຊະນະສົມບູນ ມີບັນດາສະຫາຍຮອງເລຂາຄະນະບໍລິຫານງານພັກເມືອງ, ຄະນະປະຈຳພັກເມືຶອງ, ກຳມະການພັກເມືອງ, ອົງການຈັດຕັ້ງມະຫາຊົນເມືອງ, ຕະຫລອດຮອດເລຂາຄະນະພັກຮາກຖານຊີ້ນຳກຸ່ມ, ເລຂາພັກຮາກຖານບ້ານໃຫ່ຍທົ່ວເມືອງເຂົ້າຮ່ວມ.


ໂອກາດທີ່ເຕັມໄປດ້ວຍຄວາມສຳຄັນ ສະຫາຍ ສອນສະຫວັນ ສີວິໄລ ເຈົ້າເມືອງໆ ຊະນະສົມບູນ ໃຫ້ກຽດມີຄຳເຫັນກ່າວເປີດກອງປະຊຸມຢ່າງເປັນທາງການ ເຊີ່ງສະຫາຍໄດ້ກ່າວວ່າ: ການດຳເນີນກອງປະຊຸມຄົບຄະນະບໍລິຫານງານພັກເມືອງຄັ້ງທີ 5 ສະໄໝ່ທີ VIII ຄັ້ງນີ້ແມ່ນໄດ້ເປີດຂື້ນຢູ່ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ຫລື ທົ່ວປ່ວງຊົນລາວທັງຊາດຊົມເຊີຍຜົນສຳເລັດກອງປະຊຸມໃຫ່ຍ ຄັ້ງທີ XI ຂອງພັກ ແລະ ຜົນສຳເລັດໃນບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ເວົ້າສະເພາະກໍ່ຄືຊາວເມືອງຊະນະສົມບູນ ພວມສຸມໃສ່ຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ VIII ຂອງອົງຄະນະພັກແຂວງຈຳປາສັກ ແລະ ມະຕິ 4 ສະໄໝທີ VIII ຂອງອົງຄະນະພັກເມືອງຊະນະສົມບູນ ໂດຍຕິດພັນກັບການສ້າງຜົນງານຂະບວນການຂໍ່ານັບຮັບຕ້ອນວັນສຳຄັນຕ່າງໆ ຂອງພັກ-ຂອງຊາດ ຢ່າງມີບັນຍາກາດຟົດຟື້ນ.


ພາຍໃນກອງປະຊຸມຜູ້ແທນທີ່ເຂົ້າຮ່ວມໄດ້ເຊື່ອມຊືມມະຕິກອງປະຊຸມຄົບຄະນະບໍລິຫານງານພັກແຂວງຈຳປາສັກ ຄັ້ງທີ 2 ສະໄໝທີ VIII ທົບທວນຕີລາຄາຜົນສຳເລັດໃນການນຳພາ-ຊີ້ນຳວຽກງານຮອບດ້ານຂອງເມືອງໃນໄລຍະ 3 ເດືອນຜ່ານມາ ແລະວາງທິດທາງແຜນການ 3 ເດືອນຕົ້ນປີ 2021 ທົບທວນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 3 ເດືອນຜ່ານມາ ແລະ ວາງທິດທາງແຜນການ 3 ເດືອນ ຕົ້ນປີ 2021 ຮັບ-ຟັງການປະກອບຄຳເຫັນຂອງບັນດາຫົວໜ້າຫ້ອງການໃນຫົວຂໍ້: ການເພີ່ມທະວີກວດກາ, ຄົນເຂົ້າເມືອງໃນໄລຍະທີ່ຍັງມີການລະບາດຂອງພະຍາດ ໂຄວິດ-19 ວຽກງານການປັບປຸງກຳລັງປ້ອງກັນຊາດ-ປ້ອງກັນຄວາມສະຫງົບຢູ່ຂັ້ນກຸ່ມ-ບ້ານໃຫ້ມີຄວາມເຂັ້ມແຂງ, ວຽກງານການຂຸດຄົ້ນແຫຼ່ງລາຍຮັບເຂົ້າງົບປະມານ ແລະ ຄຸ້ມຄອງລາຍຈ່າຍ ແລະ ວຽກງານການຍົກລະດັບການຄຸ້ມຄອງປ່າສະຫງວນແຫ່ງຊາດພູຊຽງທອງ ເພື່ອໄດ້ໃຫ້ເຂົ້າເປັນເຂດອຸດທະຍາດມໍລະດົກຂອງອາຊຽນ ໂດຍຕິດພັນກັບການສະກັດກັ້ນໄຟໄໝ້ລາມປ່າ ພ້ອມນັ້ນກອງປະຊຸມຍັງໄດ້ລົງເລີກປະກອບຄຳເຫັນໃສ່ບົດສະຫລຸບ ແລະ ພາກທິດທາງແຜນການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະ 3 ເດືອນຕົ້ນປີ 2021.


ຕອນທ້າຍກອງປະຊຸມ ສະຫາຍ ສະນັ່ນ ສີພາພົມມະຈັນ ຜູ້ຮັກສາການເລຂາພັກແຂວງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ໂອ້ລົມ ກ່ອນອື່ນສະຫາຍຍົກໃຫ້ເຫັນສະພາບລວມຂອງໂລກ ແລະ ພາກພື້ນໃນປັດຈຸບັນຍັງສຶບຕໍ່ມີການຜັນປ່ຽນຢ່າງສັບສົນມີທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຫລາຍປະການທີ່ພວກເຮົາຈະໄດ້ຜ່ານຜ່າ ໂດຍສະເພາະກໍ່ແມ່ນອຸດົມການຂອງພວກກຸ່ມຄົນບໍ່ຫວັງດີທີ່ຄິດມ້າງເພທຳລາຍລະບອບການເມືອງຂອງພັກເຮົາ ແລະ ບັນຫາການແຜ່ລະບາດຂອງພະຍາດໂຄວິດ-19 ທີ່ໄດ້ສົ່ງຜົນກະທົບເຮັດເສດຖະກິດໃນທົ່ວໂລກຕົກຕໍ່າ ພ້ອມນັ້ນສະຫາຍ ສະນັ່ນ ສີພາພົມມະຈັນ ເນັ້ນໃຫ້ບັນດາສະຫາຍຄະນະພັກຂອງເມືອງທຸກຂັ້ນ ສຶບຕໍ່ຖືເອົາວຽກງານສຶກສາອົບຮົມການເມືອງແນວຄິດ ໃຫ້ລົງເລີກເຸຖີງຖອງ ໂດຍຕິດພັນກັບການເກັບກຳແຫຼ່ງຂ່າວບັນດາຫາງສຽງທີ່ສົ່ງຜົນກະທົບຕໍ່ການນຳພາຂອງພັກ, ສຶບຕໍ່ປັບປຸງການຈັດຕັ້ງໃນລະບົບການເມືອງນັບແຕ່ຂັ້ນເມືອງຈົນເຖີງຂັ້ນຮາກຖານໃຫ້ມີຄວາມໜັກແໜ້ນເຂັ້ມແຂງ, ປັບປຸງວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ເພື່ອແກ້ໄຂຄວາມທຸກຍາກຂອງພໍ່ແມ່ປະຊາຊົນ, ເອົາໃຈໃສ່ຄຸ້ມຄອງປົກປັກຮັກປ່າໄມ້ໃຫ້ມີຄວາມຍືນຍົງ ໂດຍສະເພາະກໍ່ແມ່ນສຸມໃສ່ຍົກລະດັບການຄຸ້ມຄອງປ່າສະຫງວນແຫ່ງຊາດ ພູຊຽງທອງ ເພື່ອໃຫ້ໄດ້ເຂົ້າເປັນເຂດອຸທະຍາດຂອງອາຊຽນ, ປະຕິບັດວຽກຈຸດສຸມການສຶກສາເອົາໃຈໃສ່ຄຸ້ມຄອງປັບປຸງຫລັກສູດການຮຽນ-ການສອນ ໃຫ້ສອດຄ່ອງຕາມຄາດໝາຍທີ່ກະຊວງສຶກສາທິການ ແລະ ກິລາວາງອອກ ສ່ວນວຽກງານສາທາລະນະສຸກ ເອົາໃຈໃສ່ສືບຕໍ່ຈັດຕັ້ງປະຕິບັດມາດຕະການຜ່ອນຜັນປ້ອງກັນການແຜ່ລະບາດຂອງພະຍາດ ໂຄວິດ-19 ທີ່ຄະນະສະເພາະກິດກຳນົດໄວ້ ໂດຍຕິດພັນກັບການຄວບຄຸມພະຍາດຕາມລະດູການ, ສືບຕໍ່ເຮັດວຽກງານປ້ອງກັນຊາດ-ປ້ອງກັນຄວາມສະຫງົບຢ່າງຕໍ່ເນື່ອງ ປັບປຸງກຳລັງປະກອບອາວຸດໃຫ້ໜັກແໜ້ນເຂັ້ມແຂງ ປຸກລະດົມທົ່ວສັງຄົມເປັນເຈົ້າການປະກອບສ່ວນເຂົ້າໃນວຽກງານປ້ອງກັນຊາດ- ປ້ອງກັນຄວາມສະຫງົບ ໃຫ້ໄດ້ຢ່າງທົ່ວເຖີງ ເພື່ອສະກັດກັ້ນບັນຫາປະກົດການຫຍໍ້ທໍ້ຕ່າງໆ ທີ່ເກີດຂື້ນໃນສັງຄົມ ແລະ ກວດກາຄືນໃນການກຳນົດແຜນພັດທະນາເສດຖະກິດ-ສັງຄົມ ຂອງເມືອງ ໃນໄລຍະ 5 ປີຕໍ່ໜ້າ ແລະ ນຳໄປສົມທຽບກັບແຜນພັດທະນາເສດຖະກິດ-ສັງຄົມຂອງແຂວງ ໃນໄລຍະ 5 ປີຕໍ່ໜ້າ ເພື່ອຄວາມເປັນເອກກະພາບໃນການຈັດຕັງປະຕິບັດ ແລະ ສອດຄ່ອງກັບສະພາບຄວາມເປັນຈິງ.
ພາບ-ຂ່າວ: ແຫລມ ຖວທ ເມືອງຊະນະສົມບູນ