ມີເດຍລາວແຂວງເຊກອງ
ພິທີປະກາດ 3 ບ້ານຄື: ບ້ານດາກມວນ, ດາກເດັນ ແລະ ບ້ານດາກກັງ ເປັນບ້ານ ຊຈສ ແລະ ບ້ານສາທາລະນະສຸກແບບຢ່າງໄດ້ຈັດຂຶ້ນໃນວັນທີ 25 ພຶດສະພາ 2021 ນີ້ທີ່ຫ້ອງປະຊຸມຫ້ອງການສາທາລະນະສຸກເມືອງດາກຈຶງແຂວງເຊກອງໂດຍເປັນກຽດເຂົ້າຮ່ວມຂອງທ່ານ ຄຳເພັດ ສອນຈະເລີນ ຮອງເຈົ້າເມືອງ-ເມືອງດາກຈຶງຜູ້ຊື້ນຳວຽກງານວັດທະນາທຳສັງຄົມຂັ້ນເມືອງ, ມີທ່ານ ດຣ ບົວໄລ ເກດຈັນ ຮອງຫົວໜ້າພະແນກສາທາລະນະສຸກແຂວງເຊກອງ, ທ່ານ ດຣ ນານົງ ເກດຈັນ ກຳມະການພັກເມືອງຫົວໜ້າຫ້ອງການສາທາລະນະສຸກເມືອງດາກຈຶງ, ມີກຳມະການພັກເມືອງ, ຫົວໜ້າ-ຮອງຫ້ອງການ ພ້ອມດ້ວຍເລຂາພັກບ້ານ-ນາຍບ້ານ 3 ບ້ານເຂົ້າຮ່ວມ.

ທ່ານ ນາງ ບຸບຜະຈັນ ຄຳຫຼ້າ ຮອງຫົວໜ້າຫ້ອງການສາທາລະນະສຸກເມືອງໄດ້ຂຶ້ນລາຍງານຜົນການຈັດຈັດຕັ້ງປະຕິບັດວຽກງານສ້າງບ້ານຊຸມຊົນເປັນເຈົ້າການໃນວຽກງານສຸຂະອະນາໄມ ( ຊຈສ ) ແລະ ບ້ານສາທາລະນະສຸກແບບຢ່າງວ່າ: ການຈັດຕັ້ງປະຕິບັດວຽກງານສ້າງບ້ານ ຊຈສ ແລະ ບ້ານສາທາລະນະສຸກແບບຢ່າງໃນ 3 ບ້ານນີ້ກໍ່ເປັນໜຶ່ງໃນຈຳນວນ 54 ບ້ານຂອງເມືອງດາກຈຶງແຂວງເຊກອງ, ເຊິ່ງປະກອບມີ 168 ຫຼັງຄ່າເຮືອນ, ມີ 222 ຄອບຄົວ, ມີພົນລະເມືອງທັງໝົດ 1,119 ຄົນ, ຍິງ 496 ຄົນ, ມີ 2 ຊົນເຜົ່າຄື: ຊົນເຜົ່າຕະລຽງ ແລະ ເຜົ່າກະຕູ,

ໃນປີຜ່ານມາພະແນກສາທາລະນະສຸກປະຈຳແຂວງເຊກອງກໍຄືຫ້ອງການສາທາລະນະສຸກເມືອງດາກຈຶງໄດ້ຈັດຕັ້ງປະຕິບັດ ຕາມ 5 ບາດກ້າວຂອງການສ້າງຄອບຄົວເປັນບ້ານສາທາລະນະສຸກແບບຢ່າງ ແລະ 6 ຂັ້ນຕອນ, ໃນ 5 ບາດກ້າວ ແລະ 6 ຂັ້ນນີ້ແມ່ນໄດ້ຕິດພັນກັບ 10 ເງື່ອນໄຂຂອງການສ້າງຄອບຄົບ ແລະ ບ້ານ ຊຈສ ເປັນບ້ານສາທາລະນະສຸກແບບຢ່າງ, ສະນັ້ນຄະນະຫ້ອງການສາທາລະນະສຸກເມືອງກໍ່ໄດ້ພ້ອມກັນລົງໃກ້ຊິດຕິດແທດເຮັດວຽກກັບອຳນາດປົກຄອງບ້ານ, ເພື່ອສຳຫຼວດເກັບກຳຂໍ້ມູນຮອບດ້ານຂອງບ້ານພ້ອມທັງເຜີຍແຜ່ເອກະສານ 10 ມາດຖານເງື່ອນໄຂໃນການສ້າງຄອບຄົວ, ສ້າງບ້ານ ຊຈສ ເປັນບ້ານສາທາລະນະສຸກແບບຢ່າງ, ຊຶ່ງສາມາດສະຫຼຸບຕີລາຄາປະເມີນຜົນໃນ 3 ບ້ານມີທັງໝົດ 168 ຄອບຄົວ ,ເທົ່າກັບ 100 % ຂອງຈຳນວນຄອບຄົວທັງໝົດ,ໃນນັ້ນ, ບ້ານດາກມວນຄອບຄົວທີ່ໄດ້ຮັບການຢັ້ງຢືນເປັນບ້ານສາທາລະນະສຸກແບບຢ່າງ ແລະ ບ້ານ ຊຈສ ມີ 66 ຄອບຄົວ, ເທົ່າກັບ 100%, ບ້ານດາກເດັນມີ 75 ຄອບຄົວ,ເທົ່າກັບ 100% ແລະ ບ້ານດາກກັງມີ 27 ຄອບຄົວ, ເທົ່າກັບ 100%.

ທ້າຍພິທີມີການມອບ-ຮັບໃບຢັ້ງຢືນບ້ານ ຊຈສ ແລະ ບ້ານສາທາລະນະສຸກແບບຢ່າງໃຫ້ແກ່ 3 ບ້ານທີ່ໄດ້ຜ່ານການຈັດຕັ້ງປະຕິບັດວຽກງານການສ້າງບ້ານສາທາລະນະສຸກແບບຢ່າງ ແລະ ວຽກງານ ຊຈສ ປະຈຳປີ 2021 ຢ່າງຖືກຕ້ອງ ແລະ ຄົບຖ້ວນຕາມເນື້ອໃນມາດຖານທີ່ກຳນົດໄວ້, ເຊິ່ງກ່າວມອບໃນຄັ້ງນີ້ໂດຍທ່ານ ຄຳເພັດ ສອນຈະເລີນ ຮອງເຈົ້າເມືອງ-ເມືອງດາກຈຶງ ຜູ້ຊີ້ນຳວຽກງານວັດທະນະທຳ – ສັງຄົມຂັ້ນເມືອງ ແລະ ຕ່າງໜ້າກ່າວຮັບແມ່ນເລຂາພັກບ້ານທັງ 3 ບ້ານ.