ມີເດນລາວແຂວງຊກອງ ຂ່າວ:ອັດມາລາ ພິທີເປີດການສອບເສັງຈົບຊັ້ນ ປ 5 ໄດ້ຈັດຂຶ້ນໃນວັນທີ 29 ມີຖຸນາ 2021 ນີ້ທີ່ສູນໂຮງຮຽນ ມຕ ບ້ານດາກຈຶງ, ໂດຍເປັນກຽດເຂົ້າຮ່ວມເປີດຫົວບົດການສອບເສັງຂອງທ່ານ ຄຳເພັດ ສອນຈະເລີນ ກຳມະການພັກເມືອງ ຮອງເຈົ້າເມືອງ-ເມືອງດາກຈຶງ ຜູ້ຊີ້ນຳວຽກງານຂົງເຂດວັດທະນາທຳ-ສັງຄົມຂັ້ນເມືອງ, ມີທ່ານ ນາງ ທວມ ມະລາວັນ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະກຳມະການຍາມຫ້ອງສອບເສັງ ແລະ ຜູ້ຕິດຕາມໃນການສອບເສັງພ້ອມດ້ວຍນ້ອງນັກຮຽນເຂົ້າຮ່ວມ.

ການສອບເສັງຈົບຊັ້ນປະຖົມສຶກສາ ປ 5 ຄັ້ງນີ້, ທົ່ວເມືອງດາກຈຶງມີສູນສອບເສັງ 6 ສູນຄື: ສູນໂຮງປະຖົມສົມບູນ ແລະ ມັດທະຍົມຕອນຕົ້ນບ້ານດາກຈຶງ, ສູນປະຖົມຊຽງຫຼວງ, ໂຮງຮຽນປະຖົມສົມບູນອາຢູນ, ດາກໂຈມ, ດາກດຶນ ແລະ ສູນໂຮງຮຽນປະຖົມສົມບູນດາກປາຣໃໝ່, ຊຶ່ງລວມແຕ່ລະສູນສອບເສັງມີນັກຮຽນຊັ້ນ ປ 5 ທັງໝົດ 735 ຄົນ, ຍິງ 364 ຄົນ, ໃນນີ້ມີຈໍານວນນັກຮຽນມາສອບເສັງຕົວຈິງ 731 ຄົນ, ຍິງ 363 ຄົນ ແລະ ບໍ່ມາສອບເສັງມີ 4 ຄົນ, ຍິງ 1 ຄົນ,

ໃນການສອບເສັງຈົບຊັ້ນ ປ 5 ລວມມີ 4 ວິຊາຄື: ວິຊາພາສາລາວ ( ຫັດແຕງ ), ( ຂຽນທວາຍ+ຄຳຖາມ ), ຄະນິດສາດ ແລະ ວິຊາໂລກອ້ອມຕົວ, ພ້ອມກັນນີ້ຄະນະສູນສອບເສັງແຕ່ລະສູນພ້ອມກັນໄດ້ຈັດຕັ້ງປະຕິບັດ, ຕາມຄຳສັ່ງແນະນໍາກ່ຽວກັບການປະຕິບັດໂຄງການຫຼັກສູດການຮຽນ-ການສອນ, ການເລືອນຂັ້ນຕ້ອງໄປຄ່ຽງຄູ່ກັບການກຳນົດລະບຽບຫຼັກການກ່ຽວກັບການສອບເສັງຈົບຊັ້ນ ປ 5 ເພື່ອຮັບປະກັນການຈັດຕັ້ງປະຕິບັດໃຫ້ເປັນລະບົບ, ມີຄວາມໂປ່ງໃສ, ຍຸຕິທຳ, ຄຸນນະພາບ ແລະ ປົກປ້ອງຜົນປະໂຫຍດອັນຊອບທຳຂອງຄູ ແລະ ນັກຮຽນໃຫ້ສຳເລັດຜົນເປັນຢ່າງດີເຊິ່ງການສອບເສັງຈົບຊັ້ນ ປ 5 ແມ່ນໄດ້ດຳເນີນເປັນເວລາ 2 ວັນຈຶງຈະໄດ້ສໍາເລັດ.