ວັນທີ 8 ມັງກອນນີ້ ກອງປະຊຸມໃຫຍ່ຜູ້ແທນອົງຄະນະພັກເມືອງດາກຈຶງ ຄັ້ງທີ XV ໄດ້ໄຂຂຶ້ນຢ່າງເປັນທາງການ ໂດຍການເຂົ້າຮ່ວມຂອງສະຫາຍ ຄໍາເຜີຍ ບຸດດາວຽງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ-ແຂວງເຊກອງ; ພ້ອມນີ້ ກໍມີສະຫາຍ ສີດາ ສຸວັນນະສາຍ ຮອງເລຂາພັກແຂວງ, ຮອງເຈົ້າແຂວງເຊກອງ, ພ້ອມດ້ວຍຄະນະປະຈໍາພັກແຂວງ, ກໍາມະການພັກແຂວງ, ຄະນະປະຈໍາພັກ-ກໍາມະການພັກເມືອງ, ພະນັກງານອາວຸໂສບໍານານ, ແຂກຖືກເຊີນຈາກເມືອງອ້ອມຂ້າງ ແລະຜູ້ແທນກອງປະຊຸມໃຫຍ່ຈໍານວນ 91 ສະຫາຍ, ຍິງ 8 ສະຫາຍ ທີ່ເປັນຕົວແທນໃຫ້ສະມາຊິກພັກໃນທົ່ວເມືອງເຂົ້າຮ່ວມ.

ສະຫາຍ ໄລສວນ ມິດສຸວັນ ກໍາມະການພັກແຂວງ, ເລຂາພັກເມືອງ, ເຈົ້າເມືອງດາກຈຶງ ໄດ້ກ່າວໄຂກອງປະຊຸມ ພ້ອມທັງຜ່ານຮ່າງລາຍງານການເມືອງທັງສອງພາກ ເຊິ່ງຈະໄດ້ພ້ອມກັນທົບທວນຄືນ, ຕີລາຄາການຈັດຕັ້ງປະຕິບັດວຽກງານໃນໄລຍະສະໄໝຜ່ານມາ, ພ້ອມກັນຄົ້ນຄວ້າເສີມຂະຫຍາຍຈຸດດີ, ຂໍ້ຄົງຄ້າງທີ່ຕ້ອງດັດແກ້, ປັບປຸງ ແລະຖອດຖອນເອົາບົດຮຽນອັນດີທີ່ເປັນແບບຢ່າງ ເພື່ອສືບຕໍ່ຈັດຕັ້ງປະຕິບັດໃຫ້ບັນລຸຄາດໝາຍຕ່າງໆໃນຕໍ່ໜ້າ, ທັງຍົກໃຫ້ເຫັນຜົນງານການປະຕິບັດວຽກງານຮອບດ້ານຂອງອົງຄະນະພັກເມືອງ.

ໂດຍພື້ນຖານທົ່ວເມືອງ ຍັງມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍ, ປາກົດການຫຍໍ້ທໍ້ບາງດ້ານມີທ່າອ່ຽງຫຼຸດໜ້ອຍຖອຍລົງ ເຊິ່ງຜົນສໍາເລັດທີ່ຍາດມາໄດ້ແມ່ນມີຄວາມໝາຍສໍາຄັນຕໍ່ຄະນະພັກ ກໍຄືພໍ່ແມ່ປະຊາຊົນ ເຮັດໃຫ້ເມືອງດາກຈຶງມີການປ່ຽນແປງ ແລະພັດທະນາທີ່ດີຂຶ້ນ ໂດຍສະເພາະເສດຖະກິດໄດ້ຮັບການຂະຫຍາຍຕົວຢ່າງຕໍ່ເນື່ອງ ແລະຖືກທິດໃນລະດັບ 9,2% ຕໍ່ປີ, ລວມຍອດຜະ ລິດຕະພັນພາຍໃນບັນລຸ 398,17 ຕື້ກີບ, ສະເລ່ຍໃສ່ຫົວຄົນໜຶ່ງໄດ້ 15 ລ້ານກວ່າກີບ ຫຼື ເທົ່າກັບ 1.800 ໂດລາສະ ຫະລັດ, ບ້ານ ແລະຄອບຄົວທຸກຍາກນັບມື້ຫຼຸດລົງເປັນກ້າວໆ.

ຈາກນັ້ນ, ຈະດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດທີ XV ເຊິ່ງມີຜູ້ສະໝັກທັງໝົດ 29 ສະຫາຍ, ເລືອກເອົາ 25 ສະຫາຍ, ທັງຈະໄດ້ປ່ອນບັດເອົາຄະນະຜູ້ແທນໄປຮ່ວມກອງປະຊຸມໃຫຍ່ຂອງອົງຄະນະພັກແຂວງຄັ້ງທີ X.
ກອງປະຊຸມໃຫຍ່ຄັ້ງນີ້ ຈະໄດ້ດຳເນີນໄປເປັນເວລາ 2 ວັນຄື: ວັນທີ 8-9 ມັງກອນ 2020 ຈຶ່ງຈະອັດລົງ.

ຂ່າວ : ສັນຍາ
Medialaos  sekong  ຂ່າວເຊກອງ