ມີເດຍລາວແຂວງສາລະວັນ ພາບ-ຂ່າວ ໂດຍ: ວຽງສະຫວັນ ແສນຄຳ.
ໃນຕອນເຊົ້າຂອງວັນທີ 22 ມີຖຸນາ 2021 ຫ້ອງການສາທາລະນະສຸກ ເມືອງຕຸ້ມລານ ໄດ້ຈັດພິທີສະເຫຼີມສະຫຼອງວັນແພດລາວ ຄົບຮອບ 56 ປີ ( ວັນທີ 18 ມີຖຸນາ 1965-18 ມີຖຸນາ 2021), ເຊິ່ງຈັດຂຶ້ນຢູ່ທີສະໂມສອນຂອງເມືອງ, ໂດຍພາຍການເຂົ້າຮ່ວມ ທ່ານ ບຸນທອນ ແກ້ວດວງໃຈ ອາດີດເລຂາພັກເມືອງ ເຈົ້າເມືອງຕຸ້ມລານ, ທ່ານ ແສງອາລຸນ ອຸ່ນຄຳມະນີ ກຳມະການພັກເມືອງ ຮອງເຈົ້າເມືອງຕຸ້ມລານ ຜູ້ຊີ້ນຳວຽກງານວັດທະນະທຳ-ສັງຄົມ, ພາຍໃຕ້ການເປັນປະທານຂອງ ທ່ານ ສຸກສະຫວັນ ຈັນທະມຸຍ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງ, ມີບັນດາກຳມະການພັກເມືອງ, ຫົວໜ້າຫ້ອງການ, ຮອງຫ້ອງການ ຕະຫຼອດຮອດບັນດາແພດໝໍເຂົ້າຮ່ວມ.

ໃນພິທີ ທ່ານ ທ່ານ ສຸກສະຫວັນ ຈັນທະມຸຍ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງ ໄດ້ຂຶ້ນຜ່ານປະຫວັດຄວາມເປັນມາຂອງວັນແພດລາວ, ວັນເເພດລາວແມ່ນເປັນວັນໜຶ່ງທີ່ມີຄວາມສຳຄັນ ເພື່ອລະນຶກເຖິງການກຳເນີດ, ການເຕີບໃຫຍ່ຂະຫຍາຍຕົວວຽກງານຮັກສາສຸຂະພາບຂອງພໍ່ແມ່ປະຊາຊົນບັນດາເຜົ່າ ແລະ ການພັດທະນາບຸກຄະລາກອນຂອງສາທາລະນະສຸກ ເພື່ອຈາລຶກບຸນຄຸນຕໍ່ແພດໝໍ ແລະ ພະນັກງານສາທາລະນະສຸກລາວ ທີ່ໄດ້ເສຍສະຫຼະອຸທິດສະຕິປັນຍາ ແລະ ເຫຼື່ອແຮງເປັນເຈົ້າການໃນການປະຕິບັດໜ້າທີໃນແຕ່ລະໄລຍະ, ຈຸດປະສົງກໍ່ເພື່ອເຮັດໃຫ້ພົນລະເມືອງລາວບັນດາເຜົ່າທຸກຊັ້ນຄົນໃນສັງຄົມ, ແພດໝໍ ແລະ ພະນັກງານສາທາລະນະສຸກເຫັນໄດ້ການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ທັງນີ້ກໍ່ເພື່ອເປັນການປູກຈິດສຳນຶກໃຫ້ແກ່ແພດໝໍ ແລະ ພະນັກງານສາທາລະນະສຸກຮຸ້ນສືບທອດຮໍ່າຮຽນເອົາແບບຢ່າງອັນດີງາມຂອງແພດໝໍໃນເມື່ອກອ່ນ, ອອກແຮງຝຶກຝົນຫຼໍ່ຫຼອມສ້າງຕົນເອງ ໃຫ້ກາຍເປັນແພດໝໍທີ່ພຽບພ້ອມໄປດ້ວຍຄຸນສົມບັດ, ຈັນຍະທໍາທາງດ້ານວິຊາຊີບ ແລະ ຄວາມສຳນານງານດ້ານວິຊາສະເພາະ, ໃຫ້ສົມກັບຄຳເວົ້າທີ່ວ່າ: ແພດໝໍປຽບເໝື່ອນນັກຮົບເສື້ອຂາວປະຕິວັດຂອງພັກ.

ຕອນທ້າຍຂອງພິທີ ຍັງໄດ້ຮັບຟັງການມີຄຳເຫັນໂອ້ລົມຂອງທ່ານ ແສງອາລຸນ ອຸ່ນຄຳມະນີ ກຳມະການພັກເມືອງ ຮອງເຈົ້າເມືອງຕຸ້ມລານ ຜູ້ຊີ້ນຳວຽກງານວັດທະນະທຳ-ສັງຄົມ ຕື່ມອີກ.