ມິເດຍລາວແຂວງເຊກອງ ຂ່າວ: ລັດຕະນາ ຄຳສົມພູ ໃນຕົ້ນເດືອນມີນາ 2021 ນີ້. ຄະນະກຳມະການຄຸ້ມຄອງໄພພິບັດຂັ້ນເມືອງໄດ້ສະຫຼຸລບການຈັດຕັ້ງປະຕິບັດການຄຸ້ມຄອງໄພພິບັດ,ຄຸ້ມຄອງກອງທືນຂັ້ນເມືອງ ແລະ ຄວາມຕ້ອງການທຶນຟື້ນຟູຫຼັງ ໄພພິບັດຂັ້ນເມືອງປະຈຳປີ 2021 ໂດຍການເປັນປະທານຂອງ ທ່ານ ແສງສຸບັນ ໄຊສະຫວັນ ຄະນະປະຈຳພັກເມືອງປະທານຄຸ້ມຄອງໄພພິບັນຂັ້ນເມືອງ,ມີຄະນະກຳມະການຄວບຄຸມໄພພິບັດຂັ້ນເມືອງເຂົ້າຮ່ວມ.

ທ່ານ ສີສັກດາ ແສງນາລີວົງ ກຳມະການພັກເມືອງ ຫົວໜ້າຫ້ອງແຮງງານແລະສະຫວັດດີການສັງຄົມເມືອງທ່າແຕງ ທັງເປັນຮອງປະທານຄະນະກຳມະການຄວບຄຸມໄພພິບັດ,ຄຸ້ມຄອງກອງທືນຂັ້ນເມຶອງກ່າວວ່າ: ຄະນະກຳມະການຄຸ້ມຄອງໄພພິບັດຂັ້ນເມືອງໄດ້ເຮັດໜ້າທີ່ຕອບໂຕ້,ກູ້ໄພສຸກເສີນ ແລະ ຟື້ນຟູສະພາບການຕ່າງໆທີ່ເກີດຂຶ້ນຄືນສູ່ປົກກະຕິເປັນຕົ້ນ: ລົມພະຍຸ,ນໍ້າຖ້ວມ,ແຫ້ງແລ້ງ,ແຜ່ນດິນໄຫວ,ດິນເຊາະເຈື່ອນ,ສັດຕຸພືດ,ພະຍາດຄົນ,ພະຍາດສັດລະບາດ,ອັກຄີໄພ ແລະ ອື່ນໆເຊິ່ງໃນປີຜ່ານມາໄດ້ສ້າງຄວາມເສຍຫາຍຫຼາຍກວ່າ 11 ຕື້ກວ່າກີບ ເປັນຕົ້ນ: ຂະແໜງກະສິກຳ ແລະ ປ່າໄມ້ ( ວຽກງານປູກຝັງ,ວຽກງານຊົນລະປະທານ ) ມູນຄ່າ 6 ຕື້ 6 ຮ້ອຍກ່ວາລ້ານກີບ,ຂະແໜງໂຍທາທິການແລະຂົນສົ່ງ( ສ້ອມແປງເສັ້ນທາງ )ມູນຄ່າ 5 ຕື້ 2 ຮ້ອຍກ່ວາລ້ານກີບ. ທ່ານໃຫ້ຮູ້ຕື່ມອີກວ່າ: ສຳລັບແຜນຄວາມຕ້ອງການທຶນຟື້ນຟູຫຼັງໄພພິບັດປີ 2021 ນີ້ແມ່ນ 7 ຕື້ 95 ລ້ານກວ່າກີບໂດຍຈະສຸມໃສ່ 3 ຂະແໜງການເປັນບູລິມະສິດພິເສດເຊັ່ນ: ຂະແໜງກະສິກຳ ແລະ ປ່າໄມ້ມີ 3 ໂຄງການມູນຄ່າ 1 ຕື້ 8 ຮ້ອຍລ້ານກວ່າກີບ,ຂະແໜງໂຍທາທິການ ແລະ ຂົນສົ່ງມີ 4 ໂຄງການມູນຄ່າ 5 ຕື້ 2 ຮ້ອຍລ້ານກວ່າກີບ ແລະ ຂະແໜງແຮງງານ ແລະສະຫວັດດີການສັງຄົມເມືອງມີ 1 ໂຄງການມູນຄ່າ 5 ລ້ານກວ່າກີບ.