ມີເດຍລາວແຂວງໄຊສົມບູນ ບກ: ທ່ານ ຄຳປານ ພັດຕະວິຫານ ພາບ-ຂ່າວ: ພູເງິນ ວັນນະພາ ໃນວັນທີ 24 ກັນຍາ 2021 ນີ້ຢູ່ທີ່ສະໂມສອນກອງບັນຊາການທະຫານເມືອງທ່າໂທມ ແຂວງໄຊສົມບູນໄດ້ມີກອງປະຊູມມອບໝາຍໜ້າທີ່ຈັດຕັ້ງປະຕິບັດ 2 ວາລະແຫ່ງຊາດຂື້້ນ ໂດຍການເປັນປະທານຂອງສະຫາຍ ພີມພາ ນີລາວົງ ກຳມະການພັກແຂວງ ເລຂາພັກເມືອງ ເຈົ້າເມືອງທ່າໂທມ.

ເຂົ້າຮ່ວມມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ລັດວິສາຫະກິດ, ຫົວໜ່ວຍບໍລິການທະນາຄານເຂົ້າຮ່ວມນຳ.ໃນພິທີ ບັນດາຜູ້ເຂົ້າຮ່ວມແມ່ນໄດ້ຮັບຟັງການເຜີຍແຜ່ເຊື່ອມຊືມ ຄຳສັ່ງສະບັບເລກທີ 01 ຂອງກົມການເມືອງສູນກາງພັກລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການຊີ້ນຳ-ນຳພາຂອງຄະນະພັກແຕ່ລະຂັ້ນໃນການຈັດຕັ້ງປະຕິບັດມາດຕະການແກ້ໄຂຄວາມທຸກຍາກດ້ານເສດຖະກິດ-ການເງິນ ແລະ ຄຳສັງເລກທີ 02 ຂອງກົມການເມືອງສູນກາງພັກ ລົງວັນທີ່ 26 ກໍລະກົດ 2021 ວ່າດ້ວຍການເພີ່ມທະວີການນຳພາຊີ້ນຳຂອງຄະນະພັກແຕ່ລະຂັ້ນຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ ເຊີ່ງໃນກອງປະຊູມໃຫຍ່ຄັ້ງທີ XI ຂອງສູນກາງພັກໄດ້ຖື
ເອົາ 2 ບັນຫາດັ່ງກ່າວນີ້ເພື່ອແກ້ໄຂເປັນຕົ້ນແມ່ນການແກ້ໄຂຄວາມທຸກຍາກດ້ານເສດຖະກິດ-ການເງິນ ແມ່ນຄວາມຮັບຜິດຊອບຂອງຄະນະພັກແຕ່ລະຂັ້ນ, ເປັນໜ້າທີ່, ພັນທະ ແລະ ຄວາມຮັບຜິດຊອບຂອງທຸກພາກສ່ວນໃນສັງຄົມ ແລະ ການແກ້ໄຂບັນຫາຢາເສບຕິດກໍ່ຕ້ອງໄດ້ຍົກລະດັບໃນການສະກັດກັ້ນ ແລະ ແກ້ໄຂຜົນຮ້າຍຈາກຢາເສບຕິດກໍ່ແມ່ນໜ້າທີ່ຂອງທົ່ວປວງຊົນ ເພື່ອແນໃສ່ໃຫ້ບັນດັ່ງກ່າວຫຼຸດໜ້ອຍຖອຍລົງເທື່ອລະກ້າວ.

ຈາກນັ້ນໃນພິທີຍັງໄດ້ມີການຜ່ານມະຕິຕົກລົງຂອງຄະນະປະຈຳພັກເມືອງໃນການແຕ່ງຕັ້ງແບ່ງຄວາມຮັບຜິດຊອບໃຫ້ບຸກຄົນເພືື່ອນຳພາຈັດຕັ້ງປະຕິບັດເຜີຍແຜ່ເນື້ອໃນ 2 ວາລະແຫ່ງຊາດຢູ່ແຕ່ລະບ້ານຢ່າງທົ່ວເຖິງ ເພື່ອແນໃສ່ໃຫ້ພໍ່ແມ່ປະຊາຊົນໃນທົ່ວເມືອງໄດ້ຮັບຮູ້ເຂົ້າໃຈ ແລະ ບັນດາຜູ້ເຂົ້າຮ່ວມກໍ່ໄດ້ມີການປະກອບຄຳຄິດເຫັນພ້ອມ
ທັງຕອບຄຳຖາມເຈາະຈີ້ມຂອງບັນຫ້ອງການທີ່ກ່ຽວຂ້ອງໃນການແກ້ໄຂ 2 ວາລະແຫ່ງຊາດໃຫ້ໄດ້ຮັບການຈັດຕັ້ງ
ປະຕິບັດຕາມເປົົ້າໝາຍ.

ໂອກາດນີ້ຍັງໄດ້ຮັບຟັງຄຳຄິດເຫັນໂອ້ລົມຈາກ ສະຫາຍ ພີມພາ ນີລາວົງ ເຊີ່ງທ່ານໄດ້ເໜັ້ນໜັກໃຫ້ເອົາໃຈໃສ່ແກ້ໄຂຄວາມທຸກຍາກຂອງປະຊາຊົນໃນທົ່ວເມືອງໃຫ້ຫຼຸດລົງ, ມີການປຶກສາຫາລືເພື່ອກຳນົດເອົາການຜະລິດໃຫ້ເປັນສິນຄ້າ, ມີການເກັບລາຍຮັບຕາມແຜນ, ມີການປະຢັດ, ປັບປຸງການຈັດຕັ້ງ, ແກ້ໄຂທາງດ້ານພາຫະນະ,ໃນການ
ແກ້ໄຂບັນຫາຢາເສບຕິດແມ່ນໃຫ້ປະຕິບັດຄື: ເດັດຂາດ, ໂປ່ງໄສ, ແບບມືອາຊີບ ເພື່ອເຮັດໃຫ້ສັງຄົມ,ປະເທດຊາດ, ບ້ານ,ເມືອງມີຄວາມສະຫງົບປອດໄພໃນຕໍ່ໜ້າ.