ມີເດຍລາວແຂວງບໍ່ແກ້ວ ພາບ-ຂ່າວ: ວັນນະເດດ ວິໄລຄຸນ.
ວັນທີ 24 ມິຖຸນາ 2021 ນີ້ຢູ່ທີສະໂມສອນຂອງເມືອງ ໄດ້ມີພິທີປະກາດການຈັດຕັ້ງພະນັກງານໄອຍະການປະຊາຊົນເຂດ II ປະຈຳເມືອງປາກທາ ໂດຍການເຂົ້າຮ່ວມເປັນປະທ່ານຂອງທ່ານ ຄຳນວນ ກ້ອນ ກຳມະການພັກແຂວງ ຫົວໜ້າຫ້ອງການອົງການໄອຍະການປະຊາຊົນແຂວງບໍ່ແກ້ວ, ທ່ານ ຄຳຈັນ ອິນທະຈັກ ຮອງເລຂາພັກເມືອງ ປະທານກວດກາພັກ-ລັດເມືອງ , ມີບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ ຕະຫຼອດຮອດພະນັກງານອົງການໄອຍະການປະຊາຊົນແຂວງ ແລະ ເຂດເຂົ້າຮ່ວມ.

ທ່ານ ພູມິນ ວັນນະສິດ ຮອງຫົວໜ້າຫ້ອງການອົງການໄອຍະການປະຊາຊົນແຂວງ ໄດ້ຜ່ານຂໍ້ຕົກລົງ ເລກທີ 686/ອອປສ, ວ່າດ້ວຍການຍົກຍ້າຍພະນັກງານວິຊາການ ອົງການໄອຍະການປະຊາຊົນເຂດ II ແຂວງບໍ່ແກ້ວ, ເຫັນດີຍົກຍ້າຍ ທ່ານ ສົມຊາຍ ພົມມະລັດ ພະນັກງານວິຊາການໜ່ວຍງານຕິດຕາມກວດກາດຳເນີດຄະດີແພ່ງ ອົງການໄອຍະການປະຊາຊົນເຂດ II ໄປຢູ່ອົງການໄອຍະການເຂດ II ປະຈຳເມືອງປາກທາ ແຂວງບໍ່ແກ້ວ ແລະ ພ້ອມທັງຜ່ານຂໍ້ຕົກລົງ ເລກທີ 369/ອອປສ ວ່າດ້ວຍການແຕ່ງຕັ້ງຫົວໜ້າໜ່ວຍງານວິຊາການ ອົງການໄອຍະການເຂດ II ປະຈຳເມືອງປາກທາ ໃນນີ້ເຫັນດີແຕ່ງຕັ້ງ ທ່ານ ສີສະຫວາດ ຈັນທະນາລີ ຮອງຫົວໜ້າໜ່ວຍງານວິຊາການ ເປັນ ຫົວໜ້າໜ່ວຍງານວິຊາການ ອົງການໄອຍະການປະຊາຊົນເຂດ II ປະຈຳເມືອງປາກທາ, ນີ້ກໍ່ເພື່ອເປັນການແນ່ໃສ່ປັບປຸງບູລະນະກົງຈັກການຈັດຕັ້ງ ອົງການໄອຍະການປະຊາຊົນ ໃຫ້ມີຄວາມໜັກແໜ້ນເຂັ້ມແຂງເທື່ອລະກ້າວ

ໂດຍສະເພາະພະນັກງານອົງການໄອຍະການປະຊາຊົນເຂດ ປະຈຳເມືອງ ແມ່ນມີຄວາມຈຳເປັນພາວະວິໄສ ແລະ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ໂອກາດດັ່ງກ່າວ ທ່ານ ຄຳນວນ ກ້ອນ ກຳມະການພັກແຂວງ ຫົວໜ້າອົງການໄອຍະການປະຊາຊົນແຂວງ, ທ່ານ ຄຳຈັນ ອິນທະຈັກ ຮອງເລຂາພັກເມືອງ ປະທານກວດກາພັກ-ລັດເມືອງ ກໍ່ໄດ້ມີຄຳເຫັນໂອ້ລົມຊີ້ນຳຕໍ່ກັບຜູ້ທີ່ຖືກແຕ່ງຕັ້ງ ແລະ ຍົກຍ້າຍໃນຄັ້ງນີ້ບາງບັນຫານສຳຄັນເປັນຕົ້ນ: ສືບຕໍ່ເອົາໃຈໃສ່ຊອກຮູ້ຮ່ຳຮຽນແນວທາງ, ມະຕິ, ຄຳສັ່ງ, ລະບຽບຂອງພັກພັກ, ກົດໝາຍຂອງລັດ ແລະ ຖືເອົາວຽກງານສືກສາອົບຮົມການເມືອງ-ແນວຄິດເປັນບັນຫາກົກ, ສືບຕໍ່ເອົາໃຈໃສ່ຄົ້ນຄວ້າກຳແໜ້ນ ແລະນຳພາຈັດຕັ້ງປະຕິບັດ ຕາມພາລະບົດບາດ, ສິດໜ້າທີ່ ໃຫ້ໄດ້ຮັບຜົນເປັນກ້າວໆ ແລະ ເອົາໃຈໃສ່ຍົກສູງຄວາມຮັບຜິດຊອບ ໃນການຊອກຮູ້ຮ່ຳຮຽນ, ຝືກຝົນຫຼໍ່ຫຼອມຕົນເອງຢ່າງຮອບດ້ານ ເພື່ອເຮັດຫຼ້ອນໜ້າທີການເມືອງທີ່ພັກ-ລັດ ກໍ່ຄືການຈັດຕັ້ງມອບໝາຍໃຫ້, ເພີ່ມທະວີການຊີ້ນຳໆພາເຕົ້າໂຮມຄວາມສາມັກຄີພາຍໃນໃຫ້ແໜ້ນແຟ້ນ ແລະ ພ້ອມກັນຈັດຕັ້ງປະຕິບັດໜ້າທີ່ວຽກງານຂອງຕົນໃຫ້ດີຂື້ນເທື່ອລະກ້າວ.