ມີເດຍລາວແຂວງບໍ່ແກ້ວ ຂ່າວ: ບຸນໜຽວ ຈະເລີນຜົນ. ພາບ: ໂສພາ ທິບພະວົງ ຕອນເຊົ້າວັນທີ 16 ມິຖຸນາ 2020ນີ້,ສະໂມສອນຫ້ອງວ່າການເມືອງຜາອຸດົມ ແຂວງບໍ່ແກ້ວ ໄດ້ຈັດພິທີເປີດຂະບວນການຕ້ານໄຂ້ຍຸງລາຍ ກໍ່ຄື ວັນຕ້ານໄຂ້ເລືອດອອກອາຊ່ຽນ ຄົບຮອບ 10 ປີ ( ວັນທີ 15 ມີຖຸນາ 2011 – ວັນທີ 15 ມີຖຸນາ 2021 ) ຕິດພັນກັບວັນແພດລາວ ຄົບຮອບ 56 ປີ ( ວັນທີ 18 ມິຖຸນາ 1965- 18 ມິຖຸນາ 2021 ) ໂດຍການເປັນປະທານຂອງທ່ານ ພົງສະຫວັນ ປັນຍາສັກ ຮອງເລຂາພັກເມືອງ ປະທານຄະນະກຳມະການຄວບຄຸມພະຍາດຕິດຕໍ່ຂັ້ນເມືອງ, ມີບັນດາທ່ານການນໍາເມືອງ, ບັນດາຄະນະກຳມະການເພື່ອສຸຂະພາບຂັ້ນເມືອງ,ພະນັກງານ ແພດ-ໝໍ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ແລະ ວິຊາການທີ່ກ່ຽວຂ້ອງ ເຂົ້າຮ່ວມ.

ທ່ານ ພົງສະຫວັນ ປັນຍາສັກ ຮອງເລຂາພັກເມືອງ ປະທານຄະນະກຳມະການຄວບຄຸມພະຍາດຕິດຕໍ່ຂັ້ນເມືອງ ໄດ້ຜ່ານບົດປາໄສຂອງຄະນະກຳມະການຄວບຄຸມພະຍາດຕິດຕໍ່ຂັ້ນເມືຶອງຕິດພັນກັບຂະບວນການຕ້ານໄຂເລືອດອອກ ອາຊຽນຄົບຮອບ 10 ປີ. ເຊີ່ງໄດ້ຍົກໃຫ້ເຫັນເຖິງ ຈຸດປະສົງ ແລະ ປະຫວັດການສ້າງຕັ້ງ ວັນໄຂ້ຍຸງລາຍ ອາຊຽນ. ໃນປີ 2010 ກອງປະຊຸມສາທາລະນະສຸກ ອາຊຽນ ທີ່ປະເທດສິງກະໂປ ໄດ້ເປັນເອກະພາບກັນເລືອກເອົາ ວັນທີ 15 ມິຖຸນາ 2011 ເປັນວັນຕ້ານໄຂ້ຍຸງລາຍອາຊຽນ ແລະ ໃຫ້ເລີ່ມປະຕິບັດແຕ່ປີ 2011 ເປັນຕົ້ນໄປ ໃນການສ້າງຂະບວນການ ແລະ ຈັດງານວັນຕ້ານພະຍາດດັ່ງກ່າວ ຢູ່ໃນແຕ່ລະປະເທດອາຊຽນ.

ຢູ່ ສປປ ລາວ ໃນຊຸມປີຜ່ານມາພະຍາດໄຂ້ຍຸງລາຍ ແມ່ນຍັງໄດ້ສືບຕໍ່ຂະຫຍາຍຢ່າງຕໍ່ເນື່ອງໃນທົ່ວປະເທດເຊິ່ງມີການລະບາດຮຸນແຮງໃນປີ2013 ມີຈໍານວນຄົນເຈັບຍ້ອນພະຍາດດັ່ງກ່າວເຖິງ 44.043 ກວ່າ ກໍລະນີ, ເຊິ່ງມັນໄດ້ທຳລາຍຊີວິດຂອງປະຊາຊົນລາວໄປ 95 ຄົນ, ອັດຕາຄວາມຮຸ່ນແຮງ 0.21%, ສໍາລັບແຂວງ ບໍ່ແກ້ວຂອງພວກເຮົາການແຜ່ລະບາດຂອງພະຍາດດັ່ງກ່າວກວມເອົາ 140 ບ້ານ ໃນຈໍານວນ 5 ເມືອງ, ມີຄົນເຈັບເຖິງ 3.114 ກວ່າກໍລະນີ ອັດຕາຄວາມຮຸນແຮງ 1.85%.

ໂດຍພາຍໃຕ້ການຊີ້ນຳ-ນຳພາຈາກສາຍຕັ້ງຂັ້ນສູູນກາງພະແນກສາທາລະສຸກແຂວງ, ການນໍາຂັ້ນເມືອງພ້ອມຫຼາຍພາກສ່ວນທີ່ກ່ຽວຂ້ອງກໍ່ຄືທຸກພາກສ່ວນໃນສັງຄົມ ໄດ້ເພີ່ມທະວີໃນລະບົບການເຝົ້າລະວັງເພື່ອປ້ອງກັນການເຈັບເປັນ ແລະ ການຕາຍ ການລະບາດຂອງພະຍາດໄຂ້ຍຸງລາຍໄປຄຽງຄູ່ກັບການຜັນຂະຫຍາຍຈັດຕັ້ງປະຕິບັດຢ່າງຕໍ່ເນື່ອງເປັນຕົ້ນແມ່ນ: ການປູກຈິດສຳນືກໃຫ້ປະຊາຊົນຮັບຮູ້ເຂົ້າໃຈທຳລາຍໜອນນໍ້າທີ່ເປັນແຫຼ່ງເພາະພັນຂອງຍຸງລາຍໃຫ້ກາຍເປັນຄວາມຊິນເຄີຍໂດຍຖືເອົາທຸກໆວັນເສົາເປັນວັນອອກແຮງງານອະນາໄມເຮືອນຊານ ກະໂປະກະປ໋ອງ ບ່ອນທີມີນໍ້າຂັງ ເພື່ອບໍ່ໃຫ້ຍຸງໄຂ່ໃສ່ ແລະ ແຜ່ພັນໄດ້ ໂດຍການປະຕິບັດ 5ປ ຄືີ: ປິດພະຊະນະທີ່ມີນໍ້າຂັງເພື່ອບໍ່ໃຫ້ຍຸງໄຂ່ໃສ່, ປ່ຽນນໍ້າ ແລະ ຜັດຖູ ພາຊະນະ ເຊັ່ນ: ເຕົ້າດອກໄມ້, ນໍ້າຮອງຕີນຕູ້,ຖານຮອງຈອກນໍ້າ. ປ່ອຍປາຫາງນົກຍຸງ ເພື່ອກິນໜອນນໍ້າ, ປັບປຸງບໍ່ໃຫ້ມີນໍ້າຄ້າງຂັງປະຕິບັດເປັນປະຈໍາແລະ ເປັນນິໄສ ຖ້າເປັນໄຂ້ໃຫ້ໄປ ປິ່ນປົວຢູ່ໂຮງໝໍ ຫຼື ສຸກສາລາ ໃກ້ບ້ານ ທ່ານ.

ໂອກາດນີ້ ທ່ານ ບຸນເລື່ອນ ສິດຊົມພູ ກໍາມະການພັກເມືອງ ຫົວໜ້າຫ້ອງການສາທາລະນະສຸກເມືອງ ໄດ້ສືບຕໍ່ຜ່ານ ປະຫວັດຄວາມເປັນມາຂອງວັນແພດລາວທີ່ໄດ້ຜ່ານຂະບວນການວິວັດທະນາການ ເພື່ອລະນຶກເຖິງການກຳເນີດເຕີບໃຫຍ່ຂະຫຍາຍຕົວຂອງວຽກງານຮັກສາສຸຂະພາບຂອງແພດໝໍທີ່ໄດ້ເສຍສະຫຼະອຸທິດສະຕິປັດຍາເຫື່ອແຮງເປັນເຈົ້າການໃນການປະຕິບັດໜ້າທີ່ ໃນແຕ່ລະໄລຍະ ເຊິ່ງໄດ້ສະແດງອອກ ໃນຄວາມໝາຍສຳຄັນຂອງແພດລາວ, ຈຸດປະສົງຂອງວັນແພດລາວ, ການແພດລາວກັບມູນເຊື້ອບັນພະບູລຸດ ການແພດລາວພາຍໃຕ້ລະບອບສັກດີນາ ແລະ ລ່າເມືອງຂື້ນ ວິລະກຳຂອງແພດລາວກັບການຕໍ່ສູ້ກູ້ຊາດ, ແນວຄິດຊີ້ນໍາຂອງປະທານໄກສອນ ພົມວິຫານ ກ່ຽວກັບວັນແພດລາວ. ໂອກາດນີ້ ບັນດາທ່ານການນໍາເມືອງ, ຫ້ອງການທີ່ກ່ຽວຂ້ອງ ຕະຫຼອດຮອດພະນັກງານແພດໝໍ ຍັງໄດ້ຢ່າງເດີນຂະບວນເພື່ອເປັນສັນຍາລັກໃນການເປີດຂະບວນການຕ້ານໄຂ້ຍຸງລາຍ ກໍ່ຄື ວັນຕ້ານໄຂ້ເລືອດອອກອາຊ່ຽນ ຕິດພັນກັບວັນແພດລາວ.