ມີເດຍລາວແຂວງບໍ່ແກ້ວ ຂ່າວ-ພາບ ແລະ ອ່ານຂ່າວ: ຄຳຜົງ ຟອງສະຫວ່າງ. ພິທີ ປິດບໍາລຸງທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນໃຫ້ແກ່ພະນັກງານຫຼັກແຫຼ່ງຂອງເມືອງ ຜາອຸດົມ ໄດ້ຈັດຂື້ນຢ່າງເປັນທາງການ ໃນວັນທີ 11 ມິຖຸນາ 2021 ທີ່ສະໂມສອນເມືອງ ຜາອຸດົມ ແຂວງບໍ່ແກ້ວ. ໂດຍການເປັນປະທານຂອງສະຫາຍ ເພັງສອນ ແກ້ວວິໄລ ຮອງເລຂາພັກແຂວງ, ມີຄະນະປະຈໍາ-ກໍາມະການພັກເມືອງ, ຄະນະຮັບຜິດຊອບການບໍາລຸງທິດສະດີ, ຫົວໜ້າ-ຮອງຫົວໜ້າຫ້ອງການ ຕະຫຼອດຮອດສຳມະນາກອນ ເຂົ້າຮ່ວມ.

ທ່ານ ຄໍາແສງ ສຸລິຍະວົງ ອໍານວຍການ ໂຮງຮຽນການເມືອງ-ການປົກຄອງ ໄດ້ບົດສະຫຼຸບການບໍາລຸງທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ເຊິ່ງທ່ານໄດ້ຍົກໃຫ້ເຫັນຜົນສຳເລັດໃນຫຼາຍດ້ານໃນໄລຍະຜ່ານມາຄະນະຮັບຜິດຊອບຂັ້ນເມືອງ ແລະ ຄູ-ອາຈານ ໄດ້ເອົາໃຈໃສ່ໃກ້ຊິດຕິດແທດ, ແບ່ງຄວາມຮັບຜິດຊອບໃຫ້ແຕ່ລະສະຫາຍໃນການສິດສອນ, ອະທິບາຍບົດຮຽນສົ່ງຄວາມຮູ້ໃຫ້ແກ່ຜູ້ເຂົ້າບໍາລູງດ້ວຍຫຼາຍຮູບແບບ ເພື່ອໃຫ້ຜູ້ເຂົ້າບໍາລຸງມີຄວາມເຂົ້າໃຈຕໍ່ບົດຮຽນ. ຊຸດບໍາລຸງຜູ້ເຂົ້າຮຽນກໍໄດ້ເອົາໃຈໃສ່ປະຕິບັດໂມງເວລາ, ກົດລະບຽບການນຸ່ງຖື, ຕັ້ງໃຈຟັງຄໍາອະທິບາຍ ແລະ ສົນທະນາແລກປ່ຽນບົດຮຽນນຳຄູ-ອາຈານ ເພື່ອຄວາມເປັນເອກະພາບທາງດ້ານເນື້ອໃນ ແລະ ພຶດຕິກໍາຕົວຈິງ.

ໂດຍອິ່ງໃສ່ເນື້ອໃນໂຄງການຫຼັກສູດ ຂອງສະຖາບັນການເມືອງ ແລະ ການປົກຄອງແຫ່ງຊາດ ກໍານົດອອກ ເຊິ່ງປະກອບມີ 5 ພາກວິຊາ, ມີ 31 ບົດ ທັງນີ້ ເພື່ອສ້າງໃຫ້ພະນັກງານຫຼັກແຫຼ່ງຂັ້ນເມືອງ ມີລະດັບຄວາມຮູ້ທີ່ເປັນລະບົບທາງດ້ານ ທິດສະດີການເມືອງ-ການປົກຄອງ ມີຄວາມຮັບຮູ້ທີຖືກຕ້ອງ ຕໍ່ແນວທາງນະໂຍບາຍຂອງພັກ, ກໍາໄດ້ບັນດາຫຼັກມູນພື້ນຖານ ຂອງທິດສະດີ ມາກ-ເລນິນ ກົນໄກເສດຖະກິດຕະຫຼາດຕາມທິດສັງຄົມນິຍົມໃນສະໄໝຂ້າມຜ່ານ, ການຄຸ້ມຄອງບໍລິຫານ ແລະ ທິດສະດີກ່ຽວກັບການກໍ່ສ້າງພັກ ເຊິ່ງມັນໄດ້ກາຍເປັນພື້ນຖານໃຫ້ແກ່ການໝູນໃຊ້ທິດສະດີເຂົ້າໃນວຽກງານວິຊາສະເພາະຕົວຈິ່ງ ເຊິ່ງມັນສະແດງອອກໃນການປະເມີນຜົນ ປະເພດດີເລິດ 3 ສະຫາຍ, ປະເພດດີຫຼາຍ 31 ສະຫາຍ ແລະ ປະເພດດີ 11 ສະຫາຍ. ໃນນີ້ ສາມາດຄັດເລືອກ ຜູ້ທີຮຽນດີປະເພດ1: ໄດ້ 15 ສະຫາຍ, ປະເພດ2: 20 ສະຫາຍ ແລະ ປະເພດ3: 10 ສະຫາຍ. ໃນພິທີ ຄະນະຮັບຜິດຊອບໄດ້ຜ່ານຂໍ້ຕົກລົງວ່າດ້ວຍການມອບໃບຢັ້ງຢືນຈົບຫຼັດສູດການບໍາລຸງທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ແລະ ມອບໃບຍ້ອງຍໍບຸກຄົນ ຮຽນດີ-ມີວິໄນ ລະບົບ 45 ວັນ.

ທ່ານ ເພັງສອນ ແກ້ວວິໄລ ຮອງເລຂາພັກແຂວງ ໄດ້ມີຄໍາເຫັນຊີ້ນໍາໃນຫຼາຍດ້ານ ກ່ອນອື່ນທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ສໍາມະນາກອນ ແລະ ຄະນະຮັບຜິດຊອບທຸກຂັ້ນ ທີ່ໄດ້ເອົາໃຈໃສ່ ສິດສອນ ແລະ ຮໍ່າຮຽນ ຕະຫຼອດໄລຍະ 45 ວັນ ດ້ວຍຄວາມຮັບຜິດຊອບສູງ. ພ້ອມນັ້ນທ່ານຍັງໄດ້ເນັ້ນໜັກ ໃຫ້ສໍາມະນາກອນ ນໍາເອົາຄວາມຮູ້ໃນຄັ້ງນີ້ໄປຈັດຕັ້ງຜັນຂະຫຍາຍເຂົ້າໃນໜ້າທີວຽກງານວິຊາສະເພາະໃນກົມກອງ ໃຫ້ຖືກຕ້ອງ, ສອດຄ່ອງ ກັບລະບຽບ ຫຼັກການ ແລະ ເກີດຜົນປະໂຫຍດສູງສຸດ.