ມີເດຍລາວແຂວງສາລະວັນ
ວັນທີ 16-17 ມິຖຸນາ 2021 ທີ່ສະໂມສອນເມືອງລະຄອນເພັງ ໄດ້ສຳເລັດຜົນດຳເນີນກອງປະຊຸມ ສ້າງແຜນກໍານົດພະນັກງານນໍາພາ-ຄຸ້ມຄອງຂັ້ນແຂວງຄຸ້ມຄອງ ໂດຍການເປັນປະທານ ຂອງທ່ານ ທອງດີ ຈັນທະວົງ ກໍາມະການພັກແຂວງ ເລຂາພັກເມືອງ ເຈົ້າ ເມືອງລະຄອນເພັງ ມີບັນດາທ່ານໃນຄະນະບໍລິຫານງານພັກເມືອງ, ຫົວໜ້າ ແລະຮອງຫ້ອງການ – ອົງການທຽບເທົ່າອ້ອມຂ້າງເມືອງເຂົ້າຮ່ວມ 72 ທ່ານ, ຍິງ 13 ທ່ານ.

ທ່ານ ທອງດີ ຈັນທະວົງ ໄດ້ຂື້ນບັ້ນລະຍາຍເອກກະສານມະຕິກົມການເມືອງສູນກາງພັກ ເລກທີ 030/ກມສພ ວ່າດວ້ຍມາດຖານຂອງພະນັກງານນໍາພາ – ຄຸ້ມຄອງ ແລະມະຕິເລກທີ 032/ກມສພ ວ່າດວ້ຍວຽກງານສ້າງແຜນກໍນົດພະນັກງານນໍາພາ – ຄຸ້ມຄອງ, ຄໍາສັງແນະນໍາເລກທີ 292/ຄຈສພ, ທັງນີ້ກໍ່ເພື່ອເປັນການສ້າງຄວາມເຂົ້າໃຈ ແລະເປັນບ່ອນອີງ ໃນການຈັດຕັ້ງປະຕິບັດສ້າງແຜນກໍານົດພະນັກງານນໍາພາ-ຄຸ້ມຄອງ , ແມ່ນມີຄວາມຈໍາເປັນ ຢ່າງພາວະວິໄສ ເຊິ່ງຄະນະພັກແຕ່ລະຂັ້ນ ຕ້ອງໄດ້ສ້າງເເຜນກໍານົດພະນັກງານນໍາພາ-ຄຸ້ມຄອງ ແລະດໍາເນີນການປະເມີນປີລະຄັ້ງ ເພື່ອຮັບປະກັນຕອບສະໜອງໜ້າທີ່ການເມືອງ ຂອງພັກ-ລັດ ທັງສະເພາະໜ້າ ແລະຍາວນານ, ຫັນເປັນຍຸດທະສາດກ່ຽວກັບການສ້າງພະນັກງານເປັນອັນລະອຽດ, ສ້າງໂຄງການສັງລວມພື້ນຖານ ໃຫ້ແກ່ການສ້າງແຜນກໍ່ສ້າງ-ບໍາລຸງ, ຄາດຄະເນ, ສັບຊ້ອນ ແລະຈັດວາງພະນັກງານຢ່າງສົມເຫດສົມຜົນ.