ມີເດຍລາວແຂວງເຊກອງ ຂ່າວ: ສຸລິຍາ ໄຊປັນຍາ ນັກຂ່າວແຂວງເຊກອງ ເມືອງລະມາມຈັດພິທີເປີດໂຮງຮຽນມັດທະຍົມສຶກສາຕອນຕົ້ນສົງ ໃນຕອນເຊົ້າວັນທີ 24 ກັນຍາ 2021 ນີ້, ເຂົ້າຮ່ວມມີ ພຣະຫຼັກຄຳ ທຳມະນັນທິ ສີວໍຣະກຸນ ປູ່ ສົມສະໜຸກ ບຸດຕະຣາດ,ກຳມະການສູນກາງອົງການພຣະພຸດທະສາໜາສຳພັນແຫ່ງ ສປປ ລາວ, ທີປຶກສາອົງການພຣະພຸດທະສາສະໜາສຳພັນລາວແຂວງເຊກອງ, ມີທ່ານ ເຫຼັກໄຫຼ ສີວິໄລ ກຳມະການສູນກາງພັກ, ເລຂາພັກແຂວງເຈົ້າແຂວງເຊກອງ, ມີ ທ່ານ ວົງເດືອນ ຈັນທະບຸນຊຽງ ເລຂາພັກເມືອງເຈົ້າເມືອງລະມາມ, ປະທານແນວລາວສ້າງຊາດແຂວງ, ຮອງຫົວໜ້າພະແນກສຶກທິການແຂວງ ມີພຣະເທລະ, ນຸເທລະ, ມີອຳນາດການປົກຄອງບ້ານ, ພ້ອມດ້ວຍແຂກທີຖືກເຊີນເຂົ້າຮ່ວມ.

ໃນໂອກາດນີ້ ທ່ານ ນາງ ພອນໄພ ສິວິໄລ ຫົວໜ້າຫ້ອງການສຶກສາທິການ ແລະ ກິລາເມືອງລະມາມກໍໄດ້ຂື້ນຜ່ານ ຂໍ້ຕົກລົງ ສະບັບເລກທີ 479 / ຈມ ລົງວັນທີ 14 ກັນຍາ 2021 ວ່າດ້ວຍການອະນຸມັດສ້າງຕັ້ງໂຮງຮຽນມັດທະຍົມສາມັນສຶກສາສົງຕອນຕົ້ນ, ເຊິ່ງຕັ້ງຢູ່ບ້ານ ທ່າຫຼວງ ເມືອງລະມາມ ແຂວງເຊກອງ, ຂໍ້ຕົກລົງສະບັບເລກທີ 493 / ຈມ, ລົງວັນທີ 23 ກັນຍາ 2021 ວ່າດ້ວຍການແຕ່ຕັ້ງຄະນະອຳນວຍການ ໂຮງຮຽນມັດທະຍົມສາມັນສຶກສາສົງຕອນຕົ້ນ ຂອງເມືອງລະມາມ ຄື: ຕົກລົງແຕ່ງຕັ້ງ ພຣະອາຈານ ປະລິນຍາໂທ ບົວເງິນ ແສງມະນີລາດ ເປັນຜູ້ອຳນວຍການໂຮງຮຽນ, ທ່ານ ຄຳຫຼ້າ ໄຊຄຳທອງ ເປັນຮອງອຳນວຍການ (ຊີ້ນຳວຽກວິຊາການ) ແລະ ພຣະອາຈານ ຄຳພາ ເພັດອາໄພ ເປັນຮອງອຳນວຍການ ( ຊີ້ນຳວຽກບໍລິຫານ), ຈາກນັ້ນ ພຣະ ປິຊາ ບຸນຢືນ ບັ້ງທອງ ຮອງເຈົ້າຄະນະແຂວງ, ຫົວໜ້າກຳມະທິການສຶກສົງ, ເຈົ້າຄະນະອົງການພຸດທະສາສະໜາສັມພັນເມືອງລະມາມ ກໍໄດ້ຮັບຝັງການຜ່ານບົດລາຍງານ ໂດຍຫຍໍ້ການໄຂສົກຮຽນໃໝ່ຂອງ ໂຮງຮຽນມັດທະຍົມສາມັນສຶກສາສົງຕອນຕົ້ນ ເມືອງລະມາມ ສົກຮຽນ 2021-2022, ການສຶກສາສົງແມ່ນຂະບວນການສອນ, ການຮຽນຮູ້ທາງພຸດທະສາສະໜາ, ວິທະຍາສາດທຳມະຊາດ,ວິທະຍາສາດສັງຄົມ, ພຶດຕິກຳສາດ, ພາສາ ແລະ ອັກສອນສາດ. ເຊິ່ງລັດໄດ້ກຳນົດເອົາການສຶກສາສົງເປັນສ່ວນໜຶ່ງ ຂອງລະບົບການສຶກສາແຫ່ງຊາດ ໃນການພັດທະນາຊັບພະຍາກອນມະນຸດ.

ພ້ອມນັ້ນ ຕອນທ້າຍພິທີກໍໄດ້ມີການຕັບແທບຜ້າ, ເປີດປາຍ ແລະ ຕີຄອງ 9 ບາດ ເພື່ອເປັນການເປີດໂຮງຮຽນມັດທະຍົມສາມັນສຶກສາສົງຕອນຕົ້ນ ເມືອງລະມາມ ແຂວງເຊກອງ ຢ່າງເປັນທາງການ.