ມີເດຍລາວແຂວງເຊກອງ
ຕອນເຊົ້າວັນທີ 11 ພຶດສະພາ ນີ້ ຫ້ອງການສາທາລະນະສຸກເມືອງລະມາມ ໄດ້ຈັດກອງປະຊຸມປຶກສາຫາລືການເຝົ້້າລະວັງການແຜ່ລະບາດຂອງພະຍາດໄຂ້ຍູງລາຍ 5 ເດືອນຕົ້ນປີ2021 ຢູ່ທີ່ຫ້ອງການສາທາລະນະສຸກເມືອງ ໂດຍການເຂົ້າຮ່ວມຂອງທ່ານ ດຣ ນ.ລໍາພັນ ໄຊຄໍາມີ ຮອງຫົວໜ້າພະແນກສາທາລະນະສຸກແຂວງ, ທ່ານ ດຣ ສີທົນ ສາຍວິໄລສັກ ຫົວໜ້າຫ້ອງການສາທາລະນະສຸກເມືອງລະມາມ, ມີບັນດານາຍບ້ານ 7 ບ້ານເທສະບານແຂວງ ພ້ອມດ້ວຍຂະແໜງການທີ່ກ່ຽວຂ້ອງເຂົ້າຮ່ວມ.

ທ່ານ ເລັດສະໄໝ ເພັດລັງສີ ຫົວໜ້າຈຸງານໄຂ້ຍູງ ໄດ້ລາຍງານໃຫ້ຮູ້ກ່ຽວກັບວົງຈອນຊີວິດ, ຈຸດທີ່ເປັນແຫຼ່ງເພາະພັນ ແລະຜົນຮ້າຍຂອງຍູງລາຍ ທັງນີ້ ເພື່ອໃຫ້ນາຍບ້ານໄດ້ຮັບຮູ້ເຂົ້າໃຈຕື່ມ ແລະສາມາດນໍາເອົາຄວາມຮູ້ໄປເຮັດສຸຂະສຶກສາຢູ່ຂັ້ນ ເພື່ອໃຫ້ປະຊາຊົນພາຍໃນບ້ານຂອງຕົນເຂົ້າໃຈຢ່າງເລິກເຊິ່ງ ແລະທົ່ວເຖິງ; ນອກນີ້ ຍັງໄດ້ສືບຕໍ່ດໍາເນີນການຈັດແບ່ງຈຸ, ໜ່ວຍ ຂອງບ້ານໃໝ່ ຄື: ບ້ານໂພນໄຊ ຊຶ່ງເປັນບ້ານທີ່ຕັ້ງໃໝ່ ແລະເປັນບ້ານທີ່ໄດ້ເຝົ້າລະວັງພະຍາດໄຂ້ຍູງລາຍ ໃຫ້ໄດ້ເຄື່ອນໄຫວຈັດຕັ້ງປະຕິບັດວຽກງານການສໍາຫຼວດໜອນນໍ້າໃນທຸກໆອາທິດ ລວມທັງ 7 ບ້ານ ໃຫ້ສໍາເລັດພາຍໃນເດືອນ ພຶດສະພາ ນີ້; ພ້ອມນີ້ ແຕ່ລະພາກສ່ວນ ໄດ້ປຶກສາຫາລື, ແລກປ່ຽນບົດຮຽນເຊິ່ງກັນແລະກັນ ແລະການປະເມີນຜົນການຈັດຕັ້ງປະຕິບັດວຽກງານ ຂອງແຕ່ລະບ້ານ ທີ່ໄດ້ເຄື່ອນໄຫວໃນຕົ້ນ2021 ຜ່ານມາ ເພື່ອຊອກຫາຂໍ້ສະດວກ ແລະຂໍ້ຫຍຸງຍາກໃນການຈັດຕັ້ງປະຕິບັດໃນໄລຍະຜ່ານມາ ແລະຍັງໄດ້ພ້ອມກັນ ວາງທິດທາງແຜນການຈັດຕັ້ງປະຕິບັດວຽກງານ ໃນ 7 ເດືອນຕໍ່ໜ້າຕື່ມອີກ.

ໂອກາດນີ້ ທ່ານ ດຣ ນ. ລໍາພັນ ໄຊຄໍາມີ ໄດ້ຮຽກຮ້ອງໃຫ້ຈຸງານໄຂ້ຍູງລາຍ ຂັ້ນເມືອງ ກໍຄືນາຍບ້ານ 7 ບ້ານເທສະບານ ຈົ່ງພ້ອມກັນສືບຕໍ່ເອົາໃຈໃສ່ຈັດຕັ້ງເຄື່ອນໄຫວການສໍາຫຼວດໜອນນໍ້າຍູງລາຍຢ່າງເປັນປົກກະຕິ ແລະຕໍ່ເນື່ອງ ເພາະຊ່ວງນີ້ເປັນຊ່ວງລະດູຝົນ ຊຶ່ງເປັນໄລຍະທີ່ຍູງທຸກຊະນິດແຜ່ພັນຫຼາຍຂຶ້ນ, ເພາະສະນັ້ນ ຕ້ອງສືບຕໍ່ເຮັດໂຄສະນາສຸຂະສຶກສາຢູ່ຂັ້ນບ້ານ ເພື່ອໃຫ້ປະຊາຊົນຮັກສາອະໄມ 3 ສະອາດ ແລະປະຕິບັດໄດ້ 5ປ ທີ່ກະຊວງສາທາລະນະສຸກວາງອອກ.