ມີເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ບັັ້ນເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ, ມະຕິ IX ຂອງອົງຄະນະພັກແຂວງສາລະວັນ ໃຫ້ພະນັກງານຫຼັກແຫຼ່ງ, ຄະນະພັກຮາກຖານ, ຮອງເລຂາໜ່ວຍພັກ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງສະໝ້ວຍ, ໂດຍການເຂົ້າຮ່ວມເປັນປະທານຂອງ ສະຫາຍ ພູທົງ ຄຳມະນີວົງ ຄະນະປະຈຳພັກແຂວງ ຮອງເຈົ້າແຂວງໆສາລະວັນ ຜູ້ຊີ້ນຳວຽການເສດຖະກິດ ທັງແມ່ນຜູ້ຊີ້ນຳເມືອງສະໝ້ວຍ, ສະຫາຍ ບຸນເຕີ້ຍ ດວງສຸລິຍະວົງສາ ກຳມະການພັກແຂວງ ເລຂາພັກ ເຈົ້າເມືອງໆສະໝ້ວຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ບັ້ນເຊື່ອມຊຶມໃນຄັ້ງນີ້ ແມ່ນໄດ້ນຳເອົາເອກະສານທີ່ສຳຄັນຕ່າງໆມາເຜີຍແຜ່ ເປັນຕົ້ນ: ມະຕິຂອງກົມການເມືອງສູນກາງພັກ ວ່າດ້ວຍການຍົກລະດັບຄຸນນະພາບວຽກງານການເມືອງແນວຄິດ, ການເພີ່ມທະວີການນຳພາຂອງພັກຕໍ່ວຽກງານວັດທະນະທຳໃໝ່, ຜົນສຳເລັດການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ທິດທາງລວມ, ໜ້າທີ່ຕົ້ນຕໍ 5 ປີຕໍ່ໜ້າ (2021-2025) ແລະ ມະຕິກອງປະຊຸມຄົບຄະນະບໍລິຫານງານເປີດກວ້າງ ຄັ້ງທີ VII ສະໄໝທີ VIII ຂອງອົງຄະນະພັກເມືອງສະໝ້ວຍ. ເພື່ອເຮັດໃຫ້ການນຳພາ-ຊີ້ນຳ ສອດຄ່ອງ, ມີຄວາມເປັນເອກະພາບກັນ ນັບແຕ່ຂັ້ນລຸ່ມຮອດຂັ້ນເທີງ ແລະ ແນໃສ່ກຳແໜ້ນເນື້ອໃນຈິດໃຈມະຕິກອງປະຊຸມແຕ່ລະຂັ້ນ, ໃນແຕ່ລະຂົງເຂດວຽກງານ ຕາມຄວາມຮັບຜິດຊອບຂອງຕົນຕິດພັນກັບການເສີມຂະຫຍາຍຄວາມເປັນເຈົ້າການ ຂອງບັນດາຂະແໜງການຕ່າງໆ ຫັນເອົາມະຕິກອງປະຊຸມໃຫຍ່ ເປັນແຜນງານ, ໂຄງການ ແລະ ກິດຈະກຳລະອຽດ ຈັດຕັ້ງປະຕິບັດ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະໃໝ່.

ໂອກາດດຽວກັນນັ້ນ, ສະຫາຍພູທົງ ຄຳມະນີວົງ ກໍ່ໂອ້ລົມ ໃນບັ້ນເຊື່ອມຊຶມໃນຄັ້ງນີ້ ໄດ້ເນັ້ນໃຫ້ຄະນະພັກທຸກຂັ້ນເມືອງສະໝ້ວຍ ເອົາໃຈໃສ່ໃນການສຶກສາອົບຮົມການເມືອງແນວຄິດ, ເຕົ້າໂຮມຄວາມສາມັກຄີປອງດອງໃນທົ່ວສັງຄົມ ໃຫ້ເປັນປຶກແຜ່ນ, ພ້ອມກັນຈັດຕັ້ງປະຕິບັດວຽການປ້ອງກັນຊາດ-ປ້ອງກັນຄວາມສະຫງົບ ຮອບດ້ານ ດ້ວຍຄວາມເປັນເຈົ້າການ, ເອົາໃຈໃສ່ຄົ້ນຄວ້າປະຕິບັດກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິ IX ຂອງອົງຄະນະພັກແຂວງສາລະວັນ ໃຫ້ເລີກເຊີ່ງເຖີງຖອງ ອັນໃດແທດເໝາະຕໍ່ກັບທ່າແຮງບົ່ມຊ້ອນຂອງເມືອງ ໃຫ້ມີການຜະລິດ, ມີລາຍໄດ້ມີໝັ້ນຄົງ ແລະ ສົ່ງເສີມໃນດ້ານຕ່າງໆ ຢ່າງຕໍ່ເນື່ອງ ເພື່ອນຳພາປະຊາຊົນ ເມືອງສະໝ້ວຍ ຫຼຸດພົ້ນອອກຈາກຄວາມທຸກຍາກ ເທື່ອລະກ້າວ.

ພິທີດັ່ງກ່າວໄດ້ຈັດຂຶ້ນໃນລະຫວ່າງວັນທີ 17-18 ມີຖຸນາ 2021, ຢູ່ສະໂມສອນຂອງເມືອງ, ເຊີ່ງໄດ້ດຳເນີນໄປເປັນເວລາ 2 ວັນ ຈຶ່ງສຳເລັດ.