ມີເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ໃນໄລຍະການປະຕິບັດມາດຕະການປ້ອງກັນພະຍາດໂຄວິດ-19 ແລະ ປິດການເຂົ້າ-ອອກ, ປິດການສັນຈອນ ຜ່ານເມືອງ, ບ້ານຕ່າງໆ ຢູ່ເມືອງສະໝ້ວຍ ແຂວງສາລະວັນ ນັບແຕ່ວັນທີ 24 ເມສາ ເປັນຕົ້ນມາ ເຮັດໃຫ້ປະຊາຊົນເຂດບ້ານ ເຊື່ອມຕໍ່ ຊາຍແດນກັບ ສສ.ຫວຽດນາມ ໂດຍສະເພາະຈຸດດ່ານປະເພນີ ແລະ ດ່ານທ້ອງຖີ່ນ ບໍ່ສາມາດແລກປ່ຽນຊື້-ຂາຍໄດ້ ເຮັດໃຫ້ປະຊາຊົນ ເຂດດັ່ງກ່າວມີຄວາມຕ້ອງການດ້ານສະບຽງອາຫານ ເປັນຕົ້ນ: ເຄື່ອງບໍລິໂພກ

ທ່ານຫວັງສະໝຸດ ໝື່ນລາດ ຫົວໜ້າຫ້ອງການອຸດສາຫະກຳ ແລະ ການຄ້າແຂວງ ໃຫ້ສຳພາດຜ່ານໂທລະສັບ ໃນວັນທີ 13 ພຶດສະພາ 2021 ວ່າ: ຕໍ່ກັບສະພາບດັ່ງກ່າວ ລົງເກັບກຳຂໍ້ມູນຄວາມຕ້ອງການ, ສິ່ງຈຳເປັນ ແລະ ສິ່ງທີ່ຂາດເຂີນ ຢ່າງລະອາດ ແລະ ໄດ້ຮີບຮ້ອນເອົາໃຈໃສ່ປຶກສາຫາລືກັບອົງການປົກຄອງເມືອງ ແລະ ພະແນກອຸດສາຫະກຳ ແລະ ການຄ້າແຂວງ ເລັ່ງຊ່ວຍເຫຼືອ, ຕອບສະໜອງໂດຍຮີບດ່ວນ. ມາຮອດປັດຈຸບັນ ສາມາດສະໜອງສິນຄ້າໄດ້ແລ້ວ ນັບແຕ່ວັນທີ 8-13 ພຶດສະພາ 2021, ໂດຍປຸກລະດົມຜູ້ປະກອບການ ນຳເອົາສິນຄ້າເຂົ້າໄປບໍລິການຊື້-ຂາຍ ສາມາດສະໜອງໄດ້ 12,5 ໂຕນ, ໃນ 3 ຈຸດສຸມ ຄື: ຈຸດສຸມອາຈາ 4 ບ້ານ, ຈຸດສຸມສະໝ້ວຍ 5 ບ້ານ ແລະ ຈຸດສຸມອາວາວ.

ສຳລັບຈຸດສຸມຕ່າງໆ ແລະ ເຂດອື່ນໆ ກໍ່ຍັງສາມາດສະໜອງໄດ້ເປັນປົກກະຕິ ແລະ ເຂດເທສະບານເມືອງ ກໍ່ເຊັ່ນດຽວກັນ, ນອກຈາກນັ້ນກໍ່ໄດ້ເອົາໃຈໃສ່ຕິດຕາມ, ຄວບຄຸ້ມ ລາຄາສິນຄ້າ, ສ່ວນລາຄາສິນຄ້າ ປະເພດຊີ້ນງົວ-ຄວາຍ, ຊີ້ນໝູ, ໄກ່ ແລະ ພຶດຜັກຕ່າງໆ ແມ່ນຢູ່ໃນເກນປົກກະຕິ, ການສະໜອງເຄື່ອງອຸປະໂພກ-ບໍລິໂພກ ແມ່ນສາມາດປະຕິບັດເປັນປົກກະຕິ.