ຕອນເຊົ້າວັນທີ 7 ເມສາ 2021ນີ້ ເມືອງສຸຂຸມາປາຖະກະຖາເລົ່າຄືນມູນເຊື້ອວັນສ້າງຕັ້ງຊາວໜຸ່ມປະຊາຊົນປະຕິວັດລາວຄົບຮອບ 66 ປີ ຢູ່ທີ່ສະໂມສອນຂອງເມືອງ ໂດຍການໃຫ້ກຽດເຂົ້າຮ່ວມຂອງສະຫາຍ ຄຳສິງ ໄຊຍະພອນ ຄະນະປະຈຳພັກເມືອງ ປະທານແນວລາວສ້າງຊາດເມືອງ, ມີສະຫາຍ ຄຳແດງ ດີວິໄຊ ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງຈຳປາສັກ, ສະຫາຍ ສຸວັນ ສຸດທິຈັກ ເລຂາຄະນະບໍລິຫານງານຊາວໜຸ່ມ ປະຊາຊົນປະຕິວັດລາວເມືອງສຸຂຸມາ, ບັນດາສະຫາຍເລຂາໜ່ວຍຊາວໜຸ່ມຮາກຖານແລະສະມາຊິກຊາວໜຸ່ມອ້ອມຂ້າງເມືອງ ເຂົ້າຮ່ວມຈຳນວນ 168 ສະຫາຍ, ຍິງ 54 ສະຫາຍ.


ໃນພິທີສະຫາຍ ສຸວັນ ສຸດທິຈັກ ເລຂາຄະນະບໍລິຫານງານຊາວໜຸມ ປປລາວ ເມືອງກໍ່ໄດ້ຂື້ນລາຍງານການຈັດຕັ້ງປະຕິບັດວຽກງານໄລຍະ 3 ເດືອນຕົ້ນປີ2021 ຈາກນັ້ນສະຫາຍ ຄຳແດງ ດີວິໄຊ ຮອງເລຂາຄະນະບໍລິຫານງານຊາວໜຸ່ມ ປປລາວ ແຂວງຈໍາປາສັກ ກໍ່ໄດ້ໃຫ້ກຽດປາຖະກະຖາເລົ່າຄືນມູນເຊື້ອວັນສ້າງຕັ້ງຊາວໜຸ່ມປປລາວຄົບຮອບ 66 ປີ (14/4/ 1955-14/4/2021) ເຊີ່ງສະຫາຍໄດ້ຍົກໃຫ້ເຫັນການເຕີບໃຫ່ຍຂະຫາຍຕົວມູນເຊື້ອຕໍ່ສູ້ອັນພິລາດອາດຫານບໍ່ຍອມຈຳນົນຕໍ່ສັດຕູຕະຫຼອດໄລຍະ66ປີຜ່ານມາ ໃນການຕໍ່ສູ້ກູ້ຊາດເພື່ອຍາດເອົາໄຊຊະນະມາສູ່ປະເທດຊາດ ແລະ ຜົນງານຫຼາຍຢ່າງທີໂດດເດັ່ນໃນການປົກປັກຮັກສາ ແລະ ສ້າງສາປະເທດຊາດ ໃຫ້ມີຄວາມຈະເລີນຮຸ່ງເຮືອງ ເຊີ່ງພັກກໍ່ໄດ້ສ້າງຕັ້ງຊາວໜຸ່ມຕະລຸມບອນຂື້ນ ໃນວັນທີ 14 ເມສາ 1955 ເປັນໃຈກາງໃນການເຕົ້າໂຮມຄວາມສາມັກຄີ ແລະ ສຶກສາອົບຮົມຊາວໜຸ່ມໃຫ້ມີນໍ້າໃຈຮັກຊາດ, ມີຄວາມເສຍສະຫຼະ, ມີຄວາມດຸໝັ່ນ ແລະ ຄວາມອົດທົນສູງເພື່ອນຳເອົາບົດຮຽນອັນລໍ້າຄ່າຂອງຜູ້ນຳລາວເຮົາເຂົ້າໝູນໃຊ້ໃນວຽກງານຕົວຈິງຂອງຕົນໃຫ້ເກີດດອກອອກຜົນ. ຕອນທ້າຍກໍ່ໄດ້ມອບໃບຢັ້ງ ຢືນ 4 ບຸກໃຫ້ 56 ບ້ານ ແລະ 30 ກົມກອງ ໂດຍການໃຫ້ກຽດກ່າວມອບຂອງສະຫາຍ ຄຳສິງ ໄຊຍະພອນ ຄະນະປະຈຳພັກເມືອງ ປະທານແນວສ້າງຊາດເມືອງ ແລະ ມອບໃບຍ້ອງຍໍບຸກຄົນດີເດັ່ນໃຫ້ສະມາຊິກຊາວໜຸ່ມເມືອງ ປະເພດ1 ຈຳນວນ 437 ສະຫາຍ, ຍິງ 126 ສະຫາຍ, ປະເພດ2 ຈຳນວນ 44 ສະຫາຍ, ຍິງ 21 ສະຫາຍໂດຍການກ່າວມອບຂອງສະຫາຍ ຄຳແດງ ດີວິໄຊ ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ແຂວງຈຳປາສັກ.
ພາບ-ຂ່າວ: ປັນຍາ ແກ້ວພິລົມ ຖວທ ເມືອງສຸຂຸມາ.