ມີເດຍແຂວງຄຳມ່ວນ ເມືອງຫີນບູນ ແຂວງຄຳມ່ວນ ແມ່ນຍັງສືບຕໍ່ເຂັ້ມງວດໃນການຕິດຕາມ, ກວດກາຄວາມເປັນລະບຽບ ຮຽບຮ້ອຍ ຕາມເຂດຊາຍແດນ ເຊິ່ງເປັນເມືອງທີ່ມີເຂດຊາຍແດນທີ່ຕິດກັບປະເທດໃກ້ຄຽງ ທີ່ຍັງສືບຕໍ່ມີຈຳນວນຜູ້ຕິດ ເຊື້ອຂອງພະຍາດ ໂຄວິດ-19 ຢູ່ໃນປະຈຸບັນ ແນໃສ່ຮັບປະກັນບໍ່ໃຫ້ມີການລັກລອບເຂົ້າປະເທດແບບຜິດກົດໝາຍ.

ທ່ານ ເທວາ ສີໂສພາ ຮອງເລຂາພັກເມືອງຫີນບູນ ທັງເປັນປະທານຄະນະກໍາມະການສະເພາະກິດຂັ້ນເມືອງ ໄດ້ລາຍງານຕໍ່ສື່ມວນຊົນ ວັນທີ 11 ພຶດສະພາ 2021 ໃຫ້ຮູ້ວ່າ: ເພື່ອສືບຕໍ່ຈັດຕັ້ງປະຕິບັດໃນການຄວບຄຸມ, ປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ -19 ເມືອງຫີນບູນ ແມ່ນໄດ້ເອົາໃຈໃສ່ຈັດຕັ້ງຜັນຂະຫຍາຍ ບັນດານິຕິກຳ ແລະ ເອກະສານຕ່າງໆທີ່ຂັ້ນເທິງວາງອອກ ພ້ອມທັງໄດ້ມອບ ຄວາມຮັບຜິດຊອບໃຫ້ແຕ່ລະສະຫາຍ ໃນຄະນະພັກເມືອງ ລົງເຄື່ອນໄຫວຊີ້ນຳ ໂດຍສົມທົບກັບອຳນາດການປົກຄອງ ໃນແຕ່ລະບ້ານໃນການເຜີຍແຜ່ໃຫ້ພໍ່ແມ່ປະຊາຊົນໄດ້ຮັບຮູ້, ເຂົ້າໃຈຢ່າງທົ່ວເຖິງ.

ພ້ອມນັ້ນ ເມືອງຫີນບູນ ກໍ່ໄດ້ເອົາໃຈໃສ່ຢ່າງເປັນພິເສດ ກ່ຽວກັບການກວດກາ, ຕິດຕາມ ຄວາມເປັນລະບຽບຮຽບຮ້ອຍຕາມຊາຍແດນ ໂດຍສະເພາະ ໃນຈຳນວນ 23 ບ້ານທີ່ມີເຂດແດນຕິດກັບປະເທດ ໃກ້ຄຽງ ໂດຍມີກອງກໍ່ສ້າງຮາກຖານທັງຂັ້ນສູນກາງ ແລະ ຂັ້ນແຂວງ ແລະ ກອງຮ້ອຍທະຫານຊາຍແດນ ສົມທົບກັບ ອຳນາດການປົກຄອງບ້ານ ລົງຊີ້ນຳຕິດຕາມ, ກວດກາ ພ້ອມທັງເກັບເຮືອຫາປາຂອງພໍ່ແມ່ປະຊາຊົນຂຶ້ນໄວ້ຝັ່ງ ເພື່ອຮັບປະກັນບໍ່ໃຫ້ມີການລັກລອບເອົາຄົນຂ້າມເຂົ້າມາປະເທດ ແບບບໍ່ຖືກຕ້ອງ, ສະເພາະເສັ້ນທາງລຽບຕາມແຄມ ແມ່ນໍ້າຂອງໃນຂອບເຂດຂອງເມືອງຫີນບູນ ແລະ ເຂດແດນລະຫວ່າງ ເມືອງຕໍ່ເມືອງ ກໍ່ໄດ້ມອບໃຫ້ກຳລັງທະຫານ ສົມທົບກັບພາກສ່ວນກ່ຽວຂ້ອງຮັບຜິດຊອບໃນການຕັ້ງຈຸດກວດກາ ຕະຫຼອດ 24 ຊົ່ວໂມງ. ສຳລັບມາດຕະການ ຕໍ່ຜູ້ລະເມີດລັກລອບເຂົ້າປະເທດແບບຜິດກົດໝາຍ ທາງອຳນາດການ ປົກຄອງເມືອງແມ່ນຈະໄດ້ນຳສົ່ງຜູ້ກ່ຽວເຂົ້າສູນ ກັກກັນທີ່ເມືອງໄດ້ກຳນົດໄວ້ ພ້ອມທັງປັບໄໝ ແລະ ສົ່ງຕໍ່ໃຫ້ເຈົ້າໜ້າທີ່ ດຳເນີນຄະດີຕາມລະບຽບກົດໝາຍ.