ມີເດຍລາວແຂວງຄຳມ່ວນ ທ່ານ ໂຮມມາ ສີບຸນເຮືອງ ຫົວໜ້າຫ້ອງການອຸດສາຫະກຳ ແລະ ການຄ້າ ເມືອງຫີນບູນ ແຂວງຄຳມ່ວນ ໄດ້ລາຍງາຍຕໍ່ສື່ມວນຊົນ ໃນວັນທີ 11 ພຶດສະພາ 2021 ກ່ຽວກັບການຄຸ້ມຄອງລາຄາສິນຄ້າຢູ່ພາຍໃນເມືອງ ໃຫ້ຮູ້ວ່າ: ໂດຍປະຕິບັດຕາມແຈ້ງການຂອງຂັ້ນແຂວງ, ຂັ້ນເມືອງ ກ່ຽວກັບການເພີ່ມທະວີບັນດາມາດຕະການຄວບຄຸມ, ປ້ອງກັນ ແລະ ສະກັດກັ້ນ ການແຜ່ລະບາດຂອງພະຍາດ ໂຄວິດ-19 ໂດຍຫ້ອງການອຸດສາຫະກຳ ແລະ ການຄ້າເມືອງ ໄດ້ເລັ່ງໃສ່ການລົງເຄື່ອນໄຫວຕິດຕາມລາຄາສິນຄ້າ ເພື່ອບໍ່ໃຫ້ຜູ້ປະກອບການສວຍໃຊ້ໂອກາດຂຶ້ນລາຄາສິນຄ້າ ໃນຊ່ວງໄລຍະທີ່ມີການປ້ອງກັນການແຜ່ລະບາດຂອງພະຍາດ ໂຄວິດ-19.

ເຊິ່ງໄດ້ແຕ່ງຕັ້ງພະນັກງານ-ວິຊາການ ລົງຊຸກຍູ້, ຕິດຕາມ ແລະ ຄຸ້ມຄອງ ລາຄາສິນຄ້າຕາມທ້ອງຕະຫຼາດຢ່າງເປັນປົກກະຕິ, ຜ່ານການກວດກາ, ຕິດຕາມ ແມ່ນເຫັນ ໄດ້ວ່າສິນຄ້າ ຢູ່ພາຍໃນ ເມືອງຫີນບູນ ແມ່ນຍັງຢູ່ໃນລາຄາທີ່ປົກກະຕິ ອາດຈະມີບາງປະເພດສິນຄ້າທີ່ມີການເໜັງຕີງ ເລັກໜ້ອຍ ແຕ່ກໍ່ຍັງຢູ່ໃນ ສະພາບທີ່ສາມາດຄວບຄຸມໄດ້. ໂດຍສ່ວນໃຫຍ່ແລ້ວ ສິນຄ້າປະເພດເຄື່ອງບໍລິໂພກ ພືດ-ຜັກ ຕ່າງໆແມ່ນພໍ່ແມ່ປະຊາຊົນ ຢູ່ພາຍໃນເມືອງຫີນບູນ ເປັນຜູ້ຜະລິດເອງ ຈຶ່ງເຮັດໃຫ້ລາຄາສິນຄ້າຍັງຢູ່ໃນລາຄາທີ່ປົກກະຕິ. ທ່ານ ຫົວໜ້າຫ້ອງການ ອຸດສາຫະກຳ ແລະ ການຄ້າເມືອງຫີນບູນກ່າວຕື່ມວ່າ: ຖ້າຫາກພົບເຫັນຜູ້ປະກອບການ ທຸລະກິດ, ພໍ່ຄ້າຊາວຂາຍ ທີ່ສວຍໂອກາດຂຶ້ນລາຄາສິນຄ້າເກີນກຳນົດ ແລະ ລະເມີດຕາມແຈ້ງການຂອງຄະນະສະເພາະ ກິດວາງອອກ ແມ່ນຈະໄດ້ດຳເນີນມາດຕະການປັບໄໝ ຕາມລະບຽບກົດໝາຍ.