ມີເດຍລາວແຂວງວຽງຈັນ ພາບ-ຂ່າວ:ນັກຂ່າວເມືອງຫີນເຫີບ ໃນວັນທີ 23 ມິຖຸນາ 2021 ຢູ່ທີ່ສະໂມສອນເມືອງຫີນເຫີບແຂວງວຽງຈັນໄດ້ຈັດພິທີປິດຝຶກອົບຮົມກົດໝາຍຂັ້ນພື້ນຖານລະບົບບໍາລຸງ 45 ວັນສໍາລັບການປົກຄອງຮາກຖານຂັ້ນບ້ານ ຊຸດທີ II ປະຈຳປີ 2020 ໃຫ້ແກ່ເລຂາພັກບ້ານ ແລະ ການຈັດຕັ້ງບ້ານ 16 ບ້ານ ກຸ່ມບ້ານຫີນເຫີບ ແລະ ກຸ່ມບ້ານວັງຄີເມືອງຫີນເຫີບແຂວງວຽງຈັນໂດຍການເຂົ້າຮ່ວມຂອງ ທ່ານ ກົງຈັນ ພັນທະມິດ ຮອງເລຂາພັກເມືອງ, ມີ ທ່ານ ຄຳພັນ ຊະນະໄພ ຫົວໜ້າພະແນກຍຸຕິທຳແຂວງວຽງຈັນມີຄະນະປະຈຳ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ຕາງໜ້າຫ້ອງການ, ຄູ – ອາຈານ ແຂກຖືກເຊີນພ້ອມດ້ວຍເລຂາພັກບ້ານ ແລະ ການຈັດຕັ້ງບ້ານ 16 ບ້ານເຂົ້າຮ່ວມ.

ທ່ານ ພົງສະຫວັນ ອິນສົມພູ ຫົວໜ້າຫ້ອງການຍຸຕິທຳເມືອງຫີນເຫີບໄດ້ຂຶ້ນຜ່ານບົດສະຫຼຸບບັ້ນປິດຊຸດຝຶກອົບຮົມກົດໝາຍໄລຍະສັ້ນລະບົບບໍາລຸງ 45 ຊຸດທີ II ວ່າ ຊຸດຝຶກອົບຮົມກົດໝາຍໄລຍະສັ້ນ 45 ວັນຊຸດທີ I ໃນຄັ້ງນີ້ໄດ້ເລີ່ມເປີດການຮຽນ – ການສອນມາແຕ່ວັນທີ 25 ມັງກອນ 2021 ຫຼັກສູດຝຶກອົບຮົມກົດໝາຍໄລຍະສັ້ນ 45 ວັນຊຸດທີ II ປະກອບມີ 34 ວິຊາ, ມີ 22,5 ໜ່ວຍກິດເທົ່າກັບ 360 ຊົ່ວໂມງ ໃນນີ້ວິຊາທີ່ພາກທິດສະດີ 3 ວິຊາ, ວິຊາທີ່ເປັນກົດໝາຍ 28 ວິຊາ, ວິຊາທີ່ເປັນວຽກງານຍຸຕິທໍາຮາກຖານ 1 ວິຊາ, ວິຊາທີ່ເປັນເຕັກນິກການແຕ່ງເອກະສານທາງລັດຖະການ 1 ວິຊາ ບັນດາຄູ ອາຈານ ແລະ ນັກຝຶກອົບຮົມໄດ້ພ້ອມກັນປະຕິບັດໂມງເວລາຂຶ້ນຫ້ອງສິດສອນ ແລະ ປະຕິບັດໂມງເວລາໄດ້ດີພໍສົມ ຄວນໄດ້ມີການແລກປ່ຽນຄຳຄິດຄໍາເຫັນບົດຮຽນເຊິ່ງກັນ ແລະ ກັນ, ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ໄດ້ຮັບການຊີ້ນໍາ – ນໍາພາຂອງຄະນະນໍາຂັ້ນເທິງຢ່າງໃກ້ສິດເປັນປົກກະຕິ ຈຶ່ງເຮັດໃຫ້ການຝຶກອົບຮົມຄັ້ງນີ້ໄດ້ຮັບຜົນສໍາເລັດຕາມລະດັບຄາດໝາຍ ໃນພິທີຍັງໄດ້ມີການມອບໃບຢັ້ງຢືນຂອງຫົວໜ້າສະຖາບັນຍຸຕິທຳແຫ່ງຊາດໃຫ້ນັກຝຶກອົບຮົມໄລຍະ 45 ວັນ ເຊິ່ງໃຫ້ກຽດມອບໂດຍ ທ່ານ ວອນ ວໍລະສານ ຄະນະປະຈຳພັກເມືອງ ຮອງເຈົ້າເມືອງຫີນເຫີບ, ມອບໃບຊົມເຊີຍຂອງທ່ານເຈົ້າເມືອງ ແລະ ຫ້ອງການຍຸຕິທໍາເມືອງໃຫ້ແກ່ນັກຝຶກອົບຮົມກົດ

ໝາຍໄລຍະສັ້ນ 45 ວັນ ຈໍານວນ 45 ໃບໃຫ້ກຽດມອບໂດຍ ທ່ານ ກົງຈັນ ພັນທະມິດ ຮອງເລຂາພັກເມືອງ ແລະ ທ່ານ ພົງສະຫວັນ ອິນສົມພູ ຫົວໜ້າຫ້ອງການຍຸຕິທໍາເມືອງ.
ທ່ານ ກົງຈັນ ພັນທະມິດ ຮອງເລຂາພັກເມືອງ ໄດ້ໃຫ້ກຽດມີຄຳເຫັນ ແລະ ໂອ້ລົມພ້ອມທັງກ່າວປິດຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ II ວ່າ ວຽກງານຍຸຕິທໍາແມ່ນວຽກງານກ້ວາງຂວາງ ແລະ ມີບົດບາດທີ່ສໍາຄັນທີ່ພົວພັນເຖິງວຽກງານຍຸຕິທໍາທຸກດ້ານຢູ່ຂັ້ນຮາກຖານ ແລະ ໃນຕໍ່ໜ້າພວກເຮົາຈະຕ້ອງໄດ້ສຸມໃສ່ຈັດຕັ້ງປະຕິບັດ 5 ວຽກຈຸດສຸມຄື ວຽກສຶກສາອົບຮົມໂຄສະນາເຜີຍແຜ່ສ້າງສະຖິຕິເຄົາລົບກົດໝາຍ, ສ້າງວຽກງານສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ, ວຽກງານແກ້ໄຂຂໍ້ຂັດແຍ່ງຂັ້ນບ້ານ, ວຽກງານຍຸຕິທໍາເດັກ ແລະ ວຽກງານສ້າງບຸກຄະລາກອນກົດໝາຍໃຫ້ຮາກຖານບ້ານ ແລະ ບັນດາຂະແໜ່ງການ ທ່ານຍັງຮຽກຮ້ອງມາຍັງນັກສໍາມະນາກອນທຸກສະຫາຍຈົ່ງນໍາເອົາບົດຮຽນທີ່ໄດ້ຮຽນມາໝູນໃຊ້ເຂົ້າສູ່ໃນວຽກງານຕົວຈິງຂອງບັນດາທ່ານໂດຍສະເພາະແມ່ນແນວທາງນະໂຍບາຍຂອງພັກ – ລັດ ແລະ ເນື້ອໃນເອກະສານຕ່າງໆນໍາໄປຜັນຂະຫຍາຍຕາມພາລະບົດບາດ, ສິດ ແລະ ໜ້າທີ່ ທີ່ຕົນເອງຮັບຜິດຊອບເພື່ອເຮັດໃຫ້ພໍ່ແມ່ປະຊາຊົນມີຄວາມຮັບຮູ້ເຂົ້າໃຈຢ່າງທົ່ວເຖິງ.