ມີເດຍລາວແຂວງບໍ່ແກ້ວ ຂ່າວ ທອງເພັດ
ເມືອງຫ້ວຍຊາຍ ໄດ້ຈັດກອງປະຊຸມເພື່ອສ້າງແຜນກຳນົດ ພະນັກງານນຳພາ-ຄຸ້ມຄອງຂັ້ນແຂວງຄຸ້ມຄອງແຕ່ປີ 2021-2025 ຢູ່ສູນຝຶກອົບຮົມຂອງເມືອງໃນວັນທີ 17 ມິຖຸນານີ້, ໂດຍການເປັນປະທານຂອງສະຫາຍ ຫົງແກ້ວ ວິໄນວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຫ້ວຍຊາຍ, ໃຫ້ກຽດເຂົ້າຮ່ວມມີສະຫາຍ ເພັງສອນ ແກ້ວວິໄລ ຮອງເລຂາພັກແຂວງ, ຜູ້ຊີ້ນຳຂົງເຂດວຽກງານການເມືອງ-ແນວຄິດ, ວຽກພັກ-ພະນັກງານແຂວງບໍ່ແກ້ວ, ສະຫາຍ ສົມພອນ ແກ້ວມະນີ ຄະນະປະຈຳພັກແຂວງ, ຫົວໜ້າຄະນະຈັດຕັ້ງພັກ-ພະນັກງານແຂວງບໍ່ແກ້ວ, ມີບັນດາຄະນະປະຈຳ, ກຳມະການພັກເມືອງ, ສອງກອງບັນຊາການ, ເລຂາຄະນະພັກຮາກຖານກຸ່ມບ້ານ, ເລຂາ-ຮອງໜ່ວຍພັກຫ້ອງການ ເລຂາພັກບ້ານ ແລະ ຄະນະຮັບຜິດຊອບທີ່ກ່ຽວຂອງຂັ້ນຕ່າງໆເຂົ້າຮ່ວມ.

ໃນກອງປະຊຸມສະຫາຍ ຫົງແກ້ວ ວິໄນວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆຫ້ວຍຊາຍ ແລະ ສະຫາຍ ສົມພອນ ແກ້ວມະນີ ຄະນະປະຈຳພັກແຂວງ, ຫົວໜ້າຄະນະຈັດຕັ້ງພັກ-ພະນັກງານແຂວງບໍ່ແກ້ວ ໄດ້ຂຶ້ນເຜີຍແຜ່ມະຕິກົມການເມືອງສູນກາງພັກ ສະບັບເລກທີ 032, 030 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ມາດຕະຖານຂອງພະນັກງານນຳພາ-ຄຸ້ມຄອງ ເຊິ່ງມີເນື້ອໃນການກຳນົດມາດຕະຖານລວມ, ມາດຕະຖານສະເພາະຂອງຕຳແໜ່ງ ແລະ ກຸ່ມຕຳແໜ່ງພະນັກງານນຳພາ-ຄຸ້ມຄອງໃນທົ່ວລະບົບການເມືອງແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ເປັນພື້ນຖານໃນການເລືອກເຟັ້ນ ສ້າງແຜນກຳນົດການກໍ່ສ້າງ, ບຳລຸງ, ຕີລາຄາ, ຊັບຊ້ອນ, ຈັດວາງຕຳແໜ່ງພະນັກງານນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການໃນລະບົບການເມືອງ ທັງຮັບປະກັນດ້ານຈຳນວນ, ຄຸນນະພາບ, ໂຄງປະກອບບຸກຄະລາກອນ ໃຫ້ມີລັກສະນະສືບທອດປ່ຽນແທນ, ຕໍ່ເນື່ອງໃນສະເພາະໜ້າ. ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແນໃສ່ປົກປັກຮັກສາ ແລະ ສ້າງສາພັດທະນາເມືອງ, ແຂວງ ກໍ່ຄື ປະເທດຊາດຕາມຈຸດໝາຍສັງຄົມນິຍົມເທື່ອລະກ້າວ.

ໂອກາດນີ້, ສະຫາຍ ເພັງສອນ ແກ້ວວິໄລ ໄດ້ໃຫ້ທິດຊີ້ນຳເນັ້ນໜັກ ໃຫ້ບັນດາຜູ້ເຂົ້າຮ່ວມກອງປະຊຸມ ຕ້ອງເອົາໃຈໃສ່ຄົ້ນຄວ້າເຊື່ອມຊືມເນື້ອໃນເອກະສານ, ສ້າງແຜນການກຳນົດພະນັກງານນຳພາ-ຄຸ້ມຄອງຂັ້ນເມືອງ ເລີ້ມແຕ່ເລຂາຄະນະບໍລິຫານງານພັກເມືອງ, ຮອງເລຂາ, ຮອງເຈົ້າເມືອງ, ຄະນະປະຈຳ, ກຳມະການພັກ ລົງຮອດເລຂາຄະນະພັກຮາກຖານກຸ່ມບ້ານເປັນສຳຄັນ ເປັນເຈົ້າການ ນຳໃຊ້ທັດສະນະຂອງຄະນະພັກ, ສະມາຊິກພັກ ດ້ວຍຄວາມສັດຊື່ບໍລິສຸດ, ໂປງໃສ ອີງໃສ່ ມາດຕະຖານເງື່ອນໄຂ, ຄວາມຮູ້, ຄວາມສາມາດ, ວິໄສທັດ, ທັດສະນະຄະນະຕິ, ຜົນງານຕົວຈິງໃນໄລຍະຜ່ານມາເປັນກົກ ຍົກສູງການສ້າງແຜນກຳນົດພະນັກງານນຳພາ-ຄຸ້ມຄອງ ໃຫ້ແທດເໝາະກັບຄວາມຮຽກຮ້ອງຕ້ອງການ ຂອງໜ້າວຽກງານຕົວຈິງ ຮັບປະກັນລັກສະນະພະນັກງານ 3 ຮຸ່ນ, ມີເພດເຜົ່າ.

ຈາກນັ້ນ, ບັນດາຜູ້ມີສິດລົງຄະແນນສຽງ ຈະໄດ້ພ້ອມກັນໃຊ້ສິດປະຊາທິປະໄຕຂອງຕົນ ລົງຄະແນນສຽງທາບທາມແບບປິດລັບ ຮອບທີ 1 ປະກອບມີ ຄະນະປະຈໍາ, ກຳມະການພັກເມືອງ, ເລຂາ-ຮອງເລຂາໜ່ວຍພັກຫ້ອງການ, ສອງກອງບັຊາການ, ເລຂາຄະນະພັກຮາກຖານກຸ່ມບ້ານ, ເລຂາພັກບ້ານ, ຮອບທີ 2 ປະກອບມີ, ຄະນະປະຈຳ, ກຳມະການພັກເມືອງ, ເລຂາໜ່ວຍພັກຫ້ອງການ, ສອງກອງບັຊາການ, ເລຂາຄະນະພັກຮາກຖານກຸ່ມບ້ານ ແລະ ຮອບທີ 3 ຈະມີແຕ່ຄະນະບໍລິຫານງານພັກເມືອງ ຈຳນວນ 25 ສະຫາຍເຂົ້າຮ່ວມລົງຄະນະສຽງຕາມລຳດັບ.