ມີເດຍລາວແຂວງຄຳມ່ວນ ທ່ານ ພູທອນ ໄຊຍະວົງ ຫົວໜ້າຫ້ອງການກະສິກຳ ແລະ ປ່າໄມ້ ເມືອງເຊບັ້ງໄຟ ແຂວງຄຳມ່ວນ ໄດ້ລາຍງານກ່ຽວກັບສະພາບການຜະລິດເຂົ້ານາແຊງ ຜ່ານສື່ມວນຊົນ ໃນວັນທີ 21 ເມສາ 2021 ໃຫ້ຮູ້ວ່າ: ເມືອງເຊບັ້ງໄຟ ກໍ່ແມ່ນເມືອງໜຶ່ງທີ່ມີທ່າແຮງໃນການຜະລິດເຂົ້າທັງ 02 ລະດູ. ໂດຍສະເພາະໃນລະດູແລ້ງແມ່ນມີລະບົບ ຊົນລະປະທານ ທັງໝົດ 15 ແຫ່ງ.

ເຊິ່ງທາງຫ້ອງການກະສິກຳ ແລະ ປ່າໄມ້ເມືອງກໍ່ໄດ້ລົງຊຸກຍູ້ພໍ່ແມ່ປະຊາຊົນໃນການ ຜະລິດລະດູແລ້ງ ແລະ ອຳນາດການປົກຄອງໃນແຕ່ລະຂັ້ນກໍ່ໄດ້ປະກອບສ່ວນທຶນຮອນ ເພື່ອສ້ອມແປງລະບົບ ຊົນລະປະທານ ເຮັດໃຫ້ ການຜະລິດເຂົ້ານາແຊງຂອງເມືອງເຊບັ້ງໄຟ ໄດ້ຮັບການຈັດຕັ້ງປະຕິບັດໄປຕາມລະດູການ. ສະເພາະແຜນການຜະລິດ ເຂົ້ານາແຊງ ຂອງເມືອງເຊບັ້ງໄຟ ສົກປີ 2020-2021 ມີທັງໝົດ 2.400 ເຮັກຕາ, ຜ່ານການຈັດຕັ້ງປະຕິບັດຕົວຈິງໄດ້ທັງໝົດ 2.700 ເຮັກຕາ, ປະຕິບັດລື່ນແຜນການ 300 ເຮັກຕາ. ປະຈຸບັນ ຊາວກະສິກອນພວມຂຸ້ນຂ້ຽວເກັບກ່ຽວ ເຊິ່ງຄອບຄົວທີ່ມີທ່າແຮງກໍ່ໄດ້ໃຊ້ກົນຈັກເຂົ້າໃນການເກັບກ່ຽວ. ໂດຍສະເລ່ຍ ໃນທົ່ວເມືອງການເກັບກ່ຽວ ແມ່ນປະຕິບັດໄດ້ແລ້ວປະມານ 40% ຂອງເນື້ອທີ່ທັງໝົດ ແລະ ຄາດວ່າຈະໃຫ້ສຳເລັດ 100% ໃນຕົ້ນເດືອນພຶດສາພາ 2021.

ສຳລັບການຫ້າງຫາກະກຽມໃຫ້ແກ່ການຜະລິດເຂົ້ານາປີ ຕາມແຜນການໃນທົ່ວເມືອງແມ່ນ 8.600 ເຮັກຕາ. ເຊິ່ງຫ້ອງການກະສິກຳ ແລະ ປ່າໄມ້ເມືອງໄດ້ປະສານສົມທົບກັບພະແນກກະສິກຳ ແລະ ປ່າໄມ້ແຂວງ ເພື່ອກະກຽມ ທາງດ້ານແນວພັນຕອບສະໜອງໃຫ້ແກ່ຊາວກະສິກອນ. ພິເສດທາງເມືອງເຊບັ້ງໄຟ ແມ່ນມີສູນຜະລິດເມັດພັນເຂົ້າ ຈຳນວນ 02 ແຫ່ງ ແລະ ມີສູນພັດທະນາກະສິກຳ ທີ່ເປັນທ່າແຮງ ໃນການກະກຽມທາງດ້ານແນວພັນ ເພື່ອຜະລິດ ເຂົ້ານາປີ ແລະ ຄາດວ່າການຜະລິດເຂົ້ານາປີ 2021 ຂອງເມືອງເຊບັ້ງໄຟ ແມ່ນຈະສູ້ຊົນໃຫ້ບັນລຸຕາມເນື້ອທີ່ ແຜນການວາງໄວ້.