ມີເດຍລາວແຂວງວຽງຈັນ ພາບ- ຂ່າວ: ບຸນ​ລ້ອມ ດວງ​ມະ​ນີ.
​ເພື່ອ​ເປັນ​ການ​ລະ​ນຶກ​ເຖິງວັນ​ປູກ​ຕົ້ນ​ໄມ້​ແຫ່ງ​ຊາດ ແລະ ວັນ​ເດັກ​ນ້ອຍ​ສາ​ກົນ​ທີ່​ໝູນ​ວຽນ​ມາ​ຄົບ​ຮອບ​ອີກວາ​ລະ​ໜຶ່ງ, ດັ່ງ​ນັ້ນ​ມາໃນ​ຕອນ​ເຊົ້າ​ຂອງວັນ​ທີ່ 22 ມີ​ຖຸ​ນາ 2021 ນີ້​, ຢູ່​ທີ່ເຂດ​ປ່າ​ສະ​ຫງວນ​ສັນ​ພູ​ວາງ ຂອບ​ເຂດ​ບ້ານ​ນ້ຳ​ຮ​ວາງ ​ເມືອງ​ແມດ ແຂວງວຽງ​ຈັນ ໄດ້​ຈັດ​ພິ​​ທີ​ປູກ​ຕົ້ນໄມ້​ຂື້ນ​ຢ່າງ​ເປັນ​ທາງ​ການ ໂດຍ​ໃຫ້​ກຽດ​ເປັນ​ປະ​ທານ​ຂອງ​ທ່ານ ຄຳ​ປ່ຽນ ແສງ​ສະ​ຫວັດ ກຳ​ມະ​ການ​ພັກ​ແຂວງ ເລ​ຂາ​ພັກ​ເມືອງ ເຈົ້າ​ເມືອງໆ​ແມດ, ມີ​ບັນ​ດາ​ທ່ານ​ຄະ​ນະ​ປະ​ຈຳ​ພັກ​ເມືອງ, ກຳ​ມະ​ການ​ພັກ​ເມືອງ, ຫົວ​ໜ້າ,​ຮອງ​ຫົວໜ້າຫ້ອງ​ການ, ພະ​ນັກ​ງານ​ລັດ​ຖະ​ກອນ, ນາຍ ແລະ ພົນ​ທະ​ຫານ, ນາຍ ແລະ ພົນ​ຕຳຫຼວດ, ຕະຫຼອດ​ພໍ່ແມ່​ປະ​ຊາ​ຊົນ, ນັກ​ທຸ​ລະ​ກິດ, ​ພໍ່​ຄ້າ​ຊາວ​ຂາຍ ແລະ ຕະຫຼອດ​ນ້ອງ​ນ້ອຍ​ເຍົາ​ວະ​ຊົນ​ເຂົ້າ​ຮ່ວມ​ຢ່າງຫຼວງຫຼາຍ,

ໃນ​ພິ​ທີ​ດັ່ງ​ກ່າວ​ທ່ານ ກິ່ມ ດວງ​ພະ​ຈັນ ຫົວ​ໜ​້າ​ໜ​່ວຍ​ງານ​ປ່າ​ໄມ້​ຂອງ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ​ແມດ​ໄດ້​ຂື້ນ​ຜ່ານ​ສະຫຼຸບລາຍ​ງານ ແລະ ແຜນ​ການ​ປີ 2021 ເຊິ່ງ​ທ່ານ​ໄດ້​ກ່າ​ວວ່າ: ການ​ປູກ​ໄມ້​ຢູ່​ພາຍ​ໃນ​ເມືອງ​ແມດ​ໃນ​ໄລ​ຍະ 1996 – 2021, ມີ​ເນື້ອ​ທີ່​ປູກ​ທັງ​ໝົດ 332 ເຮັກ​ຕາ, ໃນ​ນັ້ນ​ໄມ້​ອຸດ​ສາ​ຫະ​ກຳ 269, 9 ເຮັກ​ຕາ, ໄມ້​ປະ​ດັບ 2,5 ເຮັກ​ຕາ, ລັດ ແລະ ປະ​ຊາ​ຊົນ​ປູກ 2 ເຮັກ​ຕາ, ໂຄງ​ການ​ຊູ​ຟອດ 5 ເຮັກ​ຕາ, ຢາງ​ພາ​ລາ 22 ເຮັກ​ຕາ, ໄມ້​ໃຫ້​ໝາກ 37 ເຮັກ​ຕາ, ແລະ ແຜນການ​ປູກ​ໄມ້​ປີ 2021​ທັງ​ໝົດ 30 ເຮັກ​ຕາ​ໃນ​ທົ່ວ​ເມືອງ, ໃນມື້ນີ້ຈະ​ປູກຕົ້ນໄມ້​ເນື້ອ​ທີ່ທັງ​ໝົດ 2 ເຮັກ​ຕາ, ແລະ ມີ​ເບ້ຍ​ໄມ້ 1,000 ເບ້ຍ, ໃນ​ນັ້ນ​ມີ​ເບ້ຍ​ໄມ້​ດູ່ 500 ເບ້ຍ ແລະ ໄມ້​ແຕ້​ຄ່າ 500 ເບ້ຍ ລວມ​ມູນ​ຄ່າ 3, 000, 000 ກວ່າ​ກີບ, ນອກ​ຈາກ​ຈັດ​ພິ​ທີ​ປູກ​ໃນ​ສະ​ຖານ​ທີ່​ດັ່ງ​ກ່າວນີ້​ແລ້ວ ທາງ​ຫ້ອງ​ການ​ກະ​ສິ​ກຳ ແລະ ປ່າ​ໄມ້​ເມືອງ ໂດຍ​ສະ​ເພາະ​ກໍ່​ແມ່ນ​ໜ່​ວຍ​ງານ​ປ່າ​ໄມ້​ຍັງ​ຈະ​ສືບ​ຕໍ່​ປຸກ​ລະ​ດົມ​ພໍ່​ແມ່​ປະ​ຊາ​ຊົນ​ບັນ​ດາ​ເຜົ່າ, ທັງ​ທຸ​ລະ​ກິດ, ບໍ​ລິ​ສັດ, ພໍ່​ຄ້າ​ຊາວ​ຂາຍ​ຢູ່​ພາຍ​ໃນ​ເມືອງພ້ອມ​ກັນ​ເອົາ​ໃຈ​ໃສ່​ປູກ​ໄມ້​ໃຫ້​ໝາກ, ໄມ້​ອຸດ​ສາ​ຫະ​ກຳ, ໄມ້​ປະ​ດັບ ແລະ ໄມ້​ອື່ນໆ ໃນ​ເນື້ອ​ທີ່ 28 ເຮັກ​ຕາ,ຕື່ມ​ອີກ.