ມີເດຍລາວແຂວງຈຳປາສັກ ຂ່າວ-ພາບ: ພຸດທະສິນ ວົງວິໄລທອງ
ວັນທີ 22 ມິຖຸນາ 2021 ນີ້ເມືອງໂຂງ ແຂວງຈຳປາສັກ ໄດ້ມີຈັດພິທີປະກາດແຕ່ງຕັ້ງຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບຂັ້ນເມືອງຂຶ້ນຢ່າງເປັນທາງການ ພາຍໃຕ້ການເຂົ້າຮ່ວມເປັນປະທານຂອງສະຫາຍ ພົ.ວ ສຸໄກ ພິມມະສານ ຄະນະປະຈຳພັກແຂວງ ຫົວໜ້າກອງບັນຊາການທະຫານແຂວງຈຳປາສັກ, ມີບັນດາທ່ານໃນຄະນະປະຈຳພັກເມືອງ, ບັນດາທ່ານຫົວໜ້າ-ຮອງຫົວໜ້າການເມືອງ ແລະ ການທະຫານ ກອງບັນຊາການທະຫານເມືອງ, ຫົວໜ້າ-ຮອງຫົວໜ້າກອງບັນຊາການ ປກສ ເມືອງ, ຫ້ອງການອ້ອມຂ້າງເມືອງ, ຫົວໜ້າກອງຮ້ອຍທະຫານຊາຍແດນ ຄໍ 525, 526, 527, ກອງສຳຫຼວດປັກຫຼັກໝາຍຊາຍແດນ ລາວ-ກຳປູເຈຍ, ມີຄະນະພັກຮາກຖານ 9 ກຸ່ມ ແລະ ເລຂາພັກບ້ານ 114 ບ້ານໃນທົ່ວເມືອງເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍນາງ ຄຳພູ ລິດທິສັກ ເລຂາພັກເມືອງ ເຈົ້າເມືອງໆໂຂງ ໄດ້ລາຍງານໂດຍສັງເຂບ ກ່ຽວກັບການປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບສຸກ ໄລຍະ 6 ເດືອນຕົ້ນປີໂດຍສັງເຂບວ່າ: ເມືອງໂຂງ ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ແກ່ 2 ປະເພດກຳລັງ, ປັບປຸງຕາໜ່າງ ປກຊ-ປກສ ໃຫ້ໜັກແໜ້ນເຂັ້ມແຂງ ໂດຍເລ່ັງໃສ່ປັບປຸງກຳລັງກອງຫຼອນ, ປກສ ບ້ານ ແລະ ຕາໜ່າງສືບຂ່າວຢູ່ຮາກຖານ, ຕະຫຼອດຮອດການຊີ້ນຳບັນຊາລະບອບປະຈຳການ, ສັບຊ້ອນກຳລັງຢູ່ຕາມຈຸດຕ່າງໆ ນັບທັງຊຸກຍູ້ການຈັດຕັ້ງເວນຍາມສຳນັກງານ, ຫ້ອງການ, ຄຸ້ມບ້ານ, ສະຖານທີ່ສາທາລະນະ, ອັນສຳຄັນ ການປັບປຸງກໍ່ສ້າງກຳລັງ ຄະນະພັກ-ຄະນະບັນຊາ ກອງບັນຊາການໄດ້ເອົາໃຈໃສ່ປັບປຸງກໍ່ສ້າງກຳລັງດ້ວຍການສຶກສາອົບຮົມການເມືອງນຳພາແນວຄິດໃຫ້ແກ່ພະນັກງານນັກຮົບ ເພື່ອໃຫ້ກຳແໜ້າເຊື່ອມຊືມແນວທາງແຜນນະໂຍບາຍຂອງພັກ, ບັນດາມະຕິ, ຄຳສັ່ງ, ກົດໝາຍຂອງລັດ, ຖືເອົາໜ້າທີ່ວິຊາສະເພາະຂອງກົມກອງເປັນເນື້ອໃນສຶກສາອົບຮົມ ເຊຶ່ງໄດ້ເຮັດໃຫ້ກຳລັງປະກອບອາວຸດ ນັບມື້ເຕີບໃຫຍ່ເຂັ້ມແຂງທາງດ້ານປະລິມານ ແລະ ຄຸນນະພາບ.

ໂອກາດນີ້ ສະຫາຍ ພັ.ທ ວິໄລສອນ ນວນສີ ຮອງຫົວໜ້າຫ້ອງການ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ແຂວງຈຳປາສັກ ໄດ້ຂຶ້ນຜ່ານມະຕິຕົກລົງຂອງຄະນະກຳມະການ ປກຊ-ປກສ ແຂວງ ເລກທີ 07/ປຊ-ປສ ປະທານຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບແຂວງຕົກລົງແຕ່ງຕັ້ງ: ສະຫາຍນາງ ຄຳພູ ລິດທິສັກ ເປັນຫົວໜ້າຄະນະກຳມະການ ປກຊ-ປກສ, ສະຫາຍ ພູວັນ ສີສຸພົນ ເປັນຮອງຫົວໜ້າຄະນະກຳມະການ ປກຊ-ປກສ, ສະຫາຍ ພັ.ທ ບຸນເພັງ ຊາພູວົງ ເປັນຮອງຫົວໜ້າ, ຜູ້ປະຈຳການຄະນະກຳມະການ ປກຊ-ປກສ, ສະຫາຍ ພັ.ທ ສົມສະໜຸກ ພະໄຊສົມບັດ ແລະ ສະຫາຍ ສົມສະໜຸກ ຫອມກິ່ງແກ້ວ ເປັນຄະນະກຳມະການ ປກຊ-ປກສ.