ມີເດຍລາວແຂວງຈຳປາສັກ ຂ່າວ-ພາບ: ພຸດທະສິນ ວົງວິໄລທອງ ໃນຕອນເຊົ້າວັນທີ 9 ເມສາ ນີ້ທີ່ຫ້ອງປະຊຸມຫ້ອງວ່າການເມືອງໂຂງ ແຂວງຈຳປາສັກ ໄດ້ມີພິທີປະກາດການຈັດຕັ້ງ ແຕ່ງຕັ້ງຮອງຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຄົນໃໝ່; ໃຫ້ກຽດເຂົ້າຮ່ວມໃນພິທີຄັ້ງນີ້ໂດຍທ່ານ ຄຳສິງ ບຸນຈະເລີນ ຄະນະປະຈຳພັກເມືອງ, ຫົວໜ້າຄະນະຈັດຕັ້ງເມືອງ, ທ່ານ ບຸນເຕີຍ ຈັນທະລາສີນ ຮອງຫົວໜ້າພະແນກ ຖວທ ແຂວງ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ແລະ ພະນັກງານວິຊາການຫ້ອງການ ຖວທ ເມືອງເຂົ້າຮ່ວມຢ່າງພ້ອມພຽງ.

ໃນພິທີທ່ານ ໜູແສງ ຜຸຍບັນດິດ ຮອງຫົວໜ້າຄະນະຈັດຕັ້ງເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງໆໂຂງວ່າດ້ວຍການແຕ່ງຕັ້ງຮອງຫົວໜ້າຫ້ອງການ ຖວທ ເມືອງ ເຫັນດີແຕ່ງຕັ້ງທ່ານ ຄຳປັນ ວິໄລພອນ ເປັນຮອງຫົວໜ້າຫ້ອງການ ຖວທ ຄົນໃໝ່. ໂອກາດນີ້ ຫົວໜ້າຄະນະຈັດຕັ້ງເມືອງກໍໄດ້ໂອ້ລົມ ແລະ ເນັ້ນໜັກຕໍ່ຜູ້ຮັບໜ້າທີ່ໃໝ່ວ່າ: ໃນໂອກາດນີ້ ປະທານພິທີ ກໍໄດ້ໂອ້ລົມ ແລະ ເນັ້ນໜັກແກ່ຜູ້ຮັບໜ້າທີ່ໃໝ່ ຈົ່ງໄດ້ເປັນແບບຢ່າງນຳໜ້າໃຫ້ບັນດາສະຫາຍສະມາຊິກພັກ, ການນຳທຸກຂັ້ນ ເປັນເອກະພາບກັນພາຍໃນພັກຕໍ່ການສັບປ່ຽນໜ້າທີ່ຄວາມຮັບຜິດຊອບຂອງພະນັກງານການນຳຄັ້ງນີ້, ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ-ສະມາຊິກພັກໃຫ້ມີ ທັດສະນະການເມືອງໜັກແໜ້ນ, ມີຄວາມສາມັກຄີເປັນປຶກແຜ່ນ, ແໜ້ນໜາ, ມີຄວາມຈົງຮັກພັກ ດີຕໍ່ພັກ ແລະ ເຊື່ອໝັ້ນຕໍ່ການນໍາພາຂອງພັກ.