ມີເດຍລາວແຂວງຈຳປາສັກ ຂ່າວ-ພາບ: ພຸດທະສິນ ວົງວິໄລທອງ ໃນຕອນເຊົ້າວັນທີ 17 ມິຖຸນາ ນີ້ເມືອງ ໂຂງ ແຂວງຈຳປາສັກ ໄດ້ສ້າງຂະບວນການອອກແຮງງານລວມພ້ອມກັນທັງໝົດ 6 ຈຸດຄື: ກຸ່ມນາຝັ່ງ, ກຸ່ມຫາດຊາຍຄູນ, ກຸ່ມກະດັນ, ຈຸດກາງໂຂງ, ຈຸດບ້ານເມືອງແສນ ແລະ ຈຸດບ້ານຫົວໂຂງ ເຊິ່ງມີແຮງງານເຂົ້າຮ່ວມຫຼາຍພັນຄົນ.

ທ່ານນາງ ຄຳພູ ລິດທິສັກ ເລຂາພັກເມືອງ ເຈົ້າເມືອງໆໂຂງ ໃຫ້ຮູ້ໂດຍສັງເຂບກ່ຽວກັບການສ້າງຂະບວນການຄັ້ງນີ້ວ່າ: ການອອກແຮງງານລວມໃຫຍ່ຄັ້ງນີ້ ເຊິ່ງພ້ອມກັນໃນຫຼາຍຈຸດພາຍໃນເທດສະບານເມືອງກໍເພື່ອເປັນການສ້າງຂະບວນການຕ້ອນຮັບວັນສຳຄັນຕ່າງໆຂອງຊາດ, ຂອງພັກໃຫ້ມີຄວາມໝາຍຄວາມສຳຄັນ ແລະ ມີບັນຍາກາດຟົດຟື້ນມ່ວນຊື່ນ, ທັງເປັນການສ້າງຄວາມສາມັກຄີກັນລະຫວ່າງພໍ່ແມ່ປະຊາຊົນບ້ານຕໍ່ບ້ານ, ທີ່ສຳຄັນ ເປັນການເຮັດໃຫ້ສອງຂ້າງທາງເລກທີ 13 ໃຕ້ມີຄວາມສະອາດຈົບງາມ, ເປັນການຕ້ອນຮັບແຂກທາງໄກໄທຕ່າງດ້າວທີ່ຈະເດີນທາງເຂົ້າມາທ່ຽວເມືອງໂຂງໃນຕໍ່ໜ້າ.

ເຈົ້າເມືອງໆໂຂງ ໃຫ້ຮູ້ຕື່ມອີກວ່າ: ການອອກແຮງງານລວມຄັ້ງນີ້ ຫຼັງຈາກສຳເລັດແລ້ວກໍຈະໄດ້ມອບໃຫ້ອຳນາດການປົກຄອງແຕ່ລະບ້ານທີ່ຢູ່ໃນເຂດຄວາມຮັບຜິດຊອບຂອງຕົນ ໄດ້ມີການອະນາໄມຕັດສາງກິ່ງງ່າຕົ້ນໄມ້ໃຫ້ເປັນປະຈຳ, ຕໍ່ເນື່ອງ ເພື່ອເຮັດໃຫ້ສອງຂອບທາງເລກທີ 13 ໃຕ້ ກໍຄືເສັ້ນທາງເຂົ້າສູ່ເມືອງໂຂງມີຄວາມສະອາດຈົບງາມ, ເປັນລະບຽບຮຽບຮ້ອຍ.