ມີເດຍລາວແຂວງລວງພະບາງ ຂ່າວ: ສົມເພັດ ໄຊມີກອນ ນັກຂ່າວເມືອງໂພນທອງ ວັນທີ 25 ມີຖຸານ 2021 ນີ້ ຄະນະສະເພາະກິດເມືອງໂພນທອງ ໄດ້ຈັດກອງປະຊຸມທົບທວນການຈັດຕັ້ງປະຕິບັດ-ການປ້ອງກັນ-ຄວບຄຸມ ແລະແກ້ໄຂ ການແຜ່ລະບາດຂອງພະຍາດໂຄວິດ-19, ມີ ທ່ານ ບຸນຈັນ ປານຟອງເພັດ ເຈົ້າເມືອງໂພນທອງ, ພ້ອມດ້ວຍຄະນະສະເພາະກິດຂັ້ນເມືອງເຂົ້າຮ່ວມ.

ທ່ານ ສີໄລ ດວງພະຈັນ ຕາງໜ້າກອງເລຂາຄະນະສະເພາະກິດຂັ້ນເມືອງ ໄດ້ຂື້ນຜ່ານບົດສະຫຼຸບໂດຍຫຍໍ້ ວຽກງານການປ້ອງກັນ ຄວບຄຸມ ແລະແກ້ໄຂ ການລະບາດຂອງພະຍາດໂຄວິດ 19 ຢູ່ເມືອງໂພນທອງ ໂດຍຍົກໃຫ້ເຫັນ.ເພື່ອເປັນການຕອບຕ້ານການລະບາດພະຍາດໂຄວິດ- 19 ຢູ່ເມືອງໂພນທອງ ທ່ານກ່າວວ່າ: ພາຍຫຼັງທີ່ພະຍາດໂຄວິດ-19 ໄດ້ສົ່ງຜົນກະທົບຕໍ່ເສດຖະກິດຂອງເມືອງ ຈຳນວນໜື່ງ, ສໍາລັບການປ້ອງກັນ ແລະຄວບຄຸມ ໂຄວິດ-19

ຜ່ານມາ ໄດ້ຕິດຕາມ, ກວດກາຈໍານວນພົນລະເມືອງ ແລະກຸ່ມສ່ຽງ ທີ່ເດີນທາງເຂົ້າ-ອອກເມືອງ, ໄດ້ສົມທົບກັບກຳລັງປ້ອງກັນຄວາມສະຫງົບເມືອງ ເຄື່ອນໄຫວກວດກາບັນດາບ້ານ ຕະຫຼອດ 24 ຊົ່ວໂມງ, ເວນຍາມລະຫວ່າງບ້ານຕໍ່ບ້ານ, ບ້ານທີ່ມີເຂດແດນເຊື່ອມຕໍ່ລະຫວ່າງ ເມືອງຕໍ່ເມືອງ ແລະແຂວງ ຢ່າງເປັນປົກກະຕິ ປັດຈຸບັນສາມາດສັງລວມແຮງງານກຸ່ມສ່ຽງ ແລະປະຊາກອນທີ່ເດີນທາງເຂົ້າ-ອອກເມືອງ ໂດຍສະເພາະແມ່ນຈຸດກວດກາບ້ານ ທອງໃຕ້ ແຕ່ວັນທີ 24 ເມສາ ຫາ ວັນທີ 4 ມີຖຸນາ 2021 ມີຄົນເຂົ້າ-ອອກເມືອງທັງໝົດ 1.150 ຄົນ, ຍິງ 227 ຄົນ, ມາຈາກຕ່າງແຂວງ 16 ຄົນ ແລະຕ່າງປະເທດ 3 ຄົນ,

ຈາກນັ້ນ ຄະນະສະເພາະກິດ ໄດ້ປະກອບຄຳເຫັນ ເພື່ອສືບຕໍ່ຈັດຕັ້ງປະຕິບັດ ໃນຕໍ່ໜ້າ ໂດຍໄດ້ເປັນເອກະພາບ ໃຫ້ສືບຕໍ່ປະຕິບັດ ບັນດາມະຕິ ຄຳສັ່ງ ທີ່ລັດຖະບານ ກໍ່ຄືຄະນະສະເພາະກິດວາງອອກຢ່າງເຂັ້ມງວດ, ພ້ອມທັງເຜີຍແຜ່ໃຫ້ແກ່ປະຊາຊົນບັນດາເຜົ່າ ມີຄວາມເຂົ້າໃຈ ຢ່າງທົ່ວເຖີງ, ເພີ່ມທະວີການປະສານງານຢູ່ຂະແໜງການ ໂດຍສະເພາະແມ່ນໜ່ວຍສະເພາະກິດຊັ້ນເມືອງ.ຕອນທ້າຍ ທ່ານເຈົ້າເມືອງໂພນທອງ ໄດ້ເນັ້ນໃຫ້ແກ່ຄະນະສະເພາະກິດ ເປັນເຈົ້າການປະຕິບັດມາດຕະການ ຢ່າງມີແບບແຜນ ເດັດຂາດບໍ່ໃຫ້ມີການລະບາດຂອງພະຍາດໂຄວິດ 19 ຢູ່ພາຍໃນເມືອງ.