ມີເດຍລາວແຂວງຄຳມ່ວນ ຂ່າວ: ແຂວງຄຳມ່ວນ ທ່ານ ພູສອນ ຟອງສະຫວັນ ຮອງຫົວໜ້າຫ້ອງການສາທາລະນະສຸກ ເມືອງໄຊບົວທອງ ແຂວງຄຳມ່ວນ ລາຍງານກ່ຽວກັບການຕິດຕາມເຝົ້າລະວັງ ການແຜ່ລະບາດຂອງພະຍາດທີ່ມັກເກີດຂຶ້ນຕາມລະດູການ ເປັນຕົ້ນແມ່ນ ພະຍາດໄຂ້ຍຸງລາຍ, ພະຍາດຖອກທ້ອງ ແລະ ອື່ນໆ. ເຊິ່ງທາງຫ້ອງການສາທາລະນະສຸກເມືອງ ໄດ້ອອກແຈ້ງການລົງ ເຖິງອຳນາດ ການປົກຄອງ ແລະ ພໍ່ແມ່ປະຊາຊົນ ຈຳນວນ 40 ບ້ານໃນທົ່ວເມືອງ ເພື່ອໃຫ້ປະຊາຊົນໄດ້ຮັບຮູ້ ແລະ ເຂົ້າໃຈເຖິງໄພ ອັນຕະລາຍຂອງພະຍາດ ພ້ອມທັງໄດ້ແຕ່ງຕັ້ງທີມງານ ແພດ-ໝໍ ລົງໂຄສະນາ ໃນການປ້ອງກັນຕົນເອງ ຈາກການຕິດເຊື້ອພະຍາດດັ່ງກ່າວ ຢ່າງເປັນປົກກະຕິຕໍ່ເນື່ອງ.

ເຊິ່ງມາຮອດປະຈຸບັນ ເມືອງໄຊບົວທອງ ແມ່ນຍັງບໍ່ມີຜູ້ ຕິດເຊື້ອເກີດຂຶ້ນ. ສຳລັບການຫ້າງຫາກະກຽມໃນການຕອບໂຕ້ເມື່ອມີການລະບາດເກີດຂຶ້ນ ແມ່ນໄດ້ແຕ່ງຕັ້ງທີມງານ ແພດ-ໝໍ ປະຈຳຢູ່ໂຮງໝໍເມືອງ ແລະ ບັນດາສຸກສາລາຕ່າງໆ ພ້ອມທັງໄດ້ກຽມຄວາມພ້ອມທາງດ້ານອຸປະກອນການແພດ ແລະ ຢາປົວພະຍາດ ໂດຍແມ່ນພະແນກສາທາລະນະສຸກແຂວງ ແລະ ອົງການຈັດຕັ້ງສາກົນ ເປັນຕົ້ນແມ່ນອົງການ ລຸກຊຳບວກ ຕອບສະໜອງທາງດ້ານອຸປະກອນ ແລະ ຢາຈຳນວນໜຶ່ງ ເພື່ອແຮໄວ້ໃນການກຽມຄວາມພ້ອມໃຫ້ແກ່ ວຽກງານດັ່ງກ່າວ. ສຳລັບການບໍລິການປິ່ນປົວໃນໄລຍະ 05 ເດືອນຜ່ານມາ ແມ່ນມີພໍ່ແມ່ປະຊາຊົນມາໃຊ້ບໍລິການ ທັງໝົດຈຳນວນ 3.565 ຄົນ. ໃນນັ້ນນອນປິ່ນປົວຢູ່ໂຮງໝໍເມືອງ 525 ຄົນ ແລະ ໃນກໍລະນີເຈັບເປັນຮ້າຍແຮງ ທີ່ໄດ້ສົ່ງໄປປິ່ນປົວ ຢູ່ໂຮງໝໍ ແຂວງມີຈຳນວນ 87 ຄົນ.

ທ່ານ ພູສອນ ກ່າວຕື່ມວ່າ: ສຳລັບວຽກງານປ້ອງກັນ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ແມ່ນໄດ້ຈັດຕັ້ງປະຕິບັດການສັກວັກຊິນໃຫ້ແກ່ພະນັກງານ ແລະ ພໍ່ແມ່ປະຊາຊົນໃນກຸ່ມເປົ້າໝາຍ. ເຊິ່ງໄດ້ຕັ້ງຈຸດບໍລິການ ຢູ່ໃນໂຮງໝໍເມືອງ ແລະ ໂຮງໝໍນ້ອຍອີກ 03 ແຫ່ງຄື: ໂຮງໝໍນ້ອຍບ້ານແກ້ງຈອນ, ໂຮງໝໍນ້ອຍບ້ານນາພ້າວ ແລະ ໂຮງໝໍນ້ອຍບ້ານດົງນາຄຳ ເຊິ່ງໄດ້ບໍລິການສັກວັກຊິນໃນເຂັມທີ 01 ໄດ້ຈຳນວນ 997 ຄົນ ແລະ ເຂັມທີ 02 ໄດ້ 538 ຄົນ ແລະ ຈະສືບຕໍ່ສະເໜີຂັ້ນເທິງ ເພື່ອນຳວັກຊິນມາບໍລິການໃຫ້ແກ່ປະຊາຊົນໃນຂັ້ນຕໍ່ໄປ ໃຫ້ຄົບຕາມເປົ້າໝາຍທີ່ໄດ້ ກຳນົດໄວ້.