ມີເດຍລາວແຂວງຄຳມ່ວນ ໃນໂອກາດທີ່ທີມງານຂ່າວແຂວງຄໍາມ່ວນໄດ້ລົງເຄື່ອນໄຫວຕິດຕາມຂະບວນການຜະລິດເຂົ້ານາປີ ແລະ ວຽກງານປ້ອງກັນ , ຄວບຄຸມ ແລະ ເຝົ້າລະວັງພະຍາດຕາມລະດູການໃນວັນທີ 14 ມິຖຸນາ 2021 ກໍ່ໄດ້ສໍາພາດທ່ານ ດຣ. ຄັນທະວົງ ເຊືອດວົງສາ ຫົວໜ້າຫ້ອງການສາທາລະນະສຸກເມືອງໜອງບົກໄດ້ກ່າວວ່າ : ໃນລະດູຝົນປີນີ້ທາງຫ້ອງການສາທາລະນະສຸກເມືອງກໍ່ໄດ້ມີການຫ້າງຫາກະກຽມຄວາມພ້ອມດ້ານຕ່າງໆໂດຍໄດ້ຈັດສົ່ງພະນັກງານວິຊາການໄປຝຶກອົບຮົມ ນອກຈາກນັ້ນແມ່ນທີມງານຕອບໂຕ້ການລະບາດກໍ່ໄດ້ລົງເຄື່ອນໄຫວໂດຍສົມທົບກັບອໍານາດການປົກຄອງທັງນີ້ແມ່ນອີງໃສ່ແຈ້ງການຂອງຂັ້ນສູນກາງ , ຂັ້ນແຂວງ ແລະ ຂັ້ນເມືອງເພື່ອລົງສົມທົບກັບຮາກຖານເພື່ອປຸກລະດົມໃຫ້ພໍ່ແມ່ປະຊາຊົນເຂົ້າມາມີສ່ວນໃນການວຽກງານປ້ອງກັນ , ຄວບຄຸມ ແລະ ເຝົ້າລະວັງພະຍາດຕາມລະດູການ.

ສໍາລັບຄວາມພ້ອມດ້ານວິຊາການພາຍໃນເມືອງແມ່ນມີຕາໜ່າງສາທາລະນະສຸກຂັ້ນເມືອງປະກອບມີ 11 ໂຮງໝໍນ້ອຍ ແລະ ມີໂຮງໝໍຊຸມຊົນ 01 ແຫ່ງ , ສ່ວນດ້ານວິຊາການແມ່ນໄດ້ມີຄວາມພ້ອມກະກຽມອຸປະກອນຕ່າງໆໂດຍສະເພາະແມ່ນວິຊາການປິ່ນປົວ ຫຼື ທີມງານຕອບໂຕ້ແມ່ນມີຄວາມພ້ອມຫາກມີກໍລະນີພະຍາດໄຂ້ເລືອດອອກເກີດຂຶ້ນ . ໃນໄລຍະປີຜ່ານມານີ້ເມືອງໜອງບົກແມ່ນເກີດມີກໍລະນີໄຂ້ເລືອດອອກແຕ່ກໍ່ບໍ່ຫຼາຍເຊິ່ງໃນປີ 2020 ແມ່ນມີພຽງແຕ່ 17 ກໍລະນີແຕ່ກໍ່ສາມາດຢັບຢັ້ງໄດ້.

ມາຮອດປະຈຸບັນນີ້ເຊິ່ງຕິດພັນກັບການປ້ອງກັນ , ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19 ນອກຈາກການປະຕິບັດມາດຕະການຕ່າງໆຂອງຂັ້ນເທິງທີ່ໄດ້ວາງອອກແລ້ວພວກເຮົາກໍ່ໄດ້ໃຫ້ວັກຊິນແກ່ພະນັກງານ,ທະຫານ,ຕໍາຫຼວດຕະຫຼອດຮອດພໍ່ແມ່ປະຊາຊົນທົ່ວໄປເຊິ່ງປະຈຸບັນທາງເມືອງແມ່ນໄດ້ຮັບວັກຊິນຊີໂນຟາມມາ 5.900 ກວ່າໂດສ , ເມືອງໜອງບົກກໍ່ໄດ້ມີຄວາມເອົາໃຈໃສ່ເຊິ່ງເປັນເມືອງທີ່ມີຊາຍແດນຕິດກັບປະເທດເພື່ອນບ້ານໂດຍສະເພາະແມ່ນອໍາເພີທາດພະນົມ ຈັງຫວັດນະຄອນພະນົມ , ເມືອງໄຊບູລີ ແຂວງສະຫວັນນະເຂດ ແລະ ບັນດາເມືອງພາຍໃນແຂວງເຊັ່ນ : ທ່າແຂກ , ເຊບັ້ງໄຟ.

ສໍາລັບເມືອງໜອງບົກຢູ່ໃນຊ່ວງຕົ້ນລະດູຝົນຂອງປີ 2021 ນີ້ແມ່ນຍັງບໍ່ທັນພົບກໍລະນີໄຂ້ເລືອດອອກທີ່ເຂົ້າມາໃຊ້ບໍລິການຮັບການປິ່ນປົວເທື່ອ . ສ່ວນຕາໜ່າງສາທາລະນະສຸກພາຍໃນເມືອງແມ່ນໄດ້ລາຍງານໃຫ້ຫ້ອງການສາທາລະນະສຸກເມືອງເປັນປົກກະຕິເຊິ່ງພາຍໃນອາທິດຕໍ່ໄປນີ້ກໍ່ຈະໄດ້ມີການຈັດກອງປະຊຸມຕ້ານການລະບາດຂອງພະຍາດຕາມລະດູການຂັ້ນເມືອງ , ໂດຍລວມແລ້ວແຕ່ລະພາກສ່ວນພາຍໃນເມືອງລວມເຖິງພໍ່ແມ່ນປະຊາຊົນໃນົ່ວເມືອງແມ່ນໄດ້ມີສ່ວນເຂົ້າໃນຂະບວນການອະນາໄມບໍ່ວ່າຈະເປັນພາຍໃນເທສະບານເມືອງ ແລະ ແຕ່ລະກຸ່ມບ້ານແມ່ນໄດ້ເອົາໃຈໃສ່ໃນການຮັກສາຄວາມສະອາດກໍ່ຄືການປະຕິບັດຫຼັກການ 5 ປໍທີ່ກະຊວງສາທາລະນະສຸກວາງອອກ.

ທ່ານ ດຣ. ຄັນທະວົງ ເຊືອດວົງສາ ຫົວໜ້າຫ້ອງການສາທາລະນະສຸກເມືອງໜອງບົກກໍ່ໄດ້ຮຽກຮ້ອງມາຍັງພໍ່ແມ່ປະຊາຊົນພາຍໃນເມືອງຈົ່ງໄດ້ສືບຕໍ່ຮັກສາອະນາໄມ ແລະ ເຮັດໃຫ້ເປັນກິດຈະກໍາປະວັນພາຍໃນຄອບຄົວຂອງຕົນເອງຖ້າຫາກຄົນພາຍໃນຄອບຄົວມີອາການເຈັບໄຂ້ບໍ່ຄວນໄປຊື້ຢາມາກິນເອງໂດຍທີ່ບໍ່ໄດ້ກວດສຸຂະພາບ ຫຼື ການ ບົ່ງມະຕິພະຍາດຈາກແພດໝໍ