ມີເດຍລາວແຂວງຄຳມ່ວນ ທ່ານ ຄຳມອນ ພົມພິພັກ ຫົວໜ້າຫ້ອງການກະສິກຳ ແລະ ປ່າໄມ້ ເມືອງໜອງບົກ ລາຍງານກ່ຽວກັບ ສະພາບການຜະລິດລະດູແລ້ງ ໃນວັນທີ 21 ເມສາ ເຊິ່ງທ່ານໄດ້ກ່າວວ່າ: ແຜນການຜະລິດເຂົ້ານາແຊງ ສົກປີ 2020-2021 ໃນທົ່ວເມືອງໜອງບົກ ຈຳນວນ 2.950 ເຮັກຕາ, ສາມາດປະຕິບັດຕົວຈິງໄດ້ 3.961 ເຮັກຕາ ເທົ່າກັບ 134,27% ໃນນັ້ນ ນານອກໂຄງການ ປະຕິບັດໄດ້ 392 ເຮັກຕາ ແລະ ນາທີ່ນອນຢູ່ໃນໂຄງການຊົນລະປະທານຈຳນວນ 27 ໂຄງການມີເນື້ອທີ່ 3.569 ເຮັກຕາ. ຄຽງຄູ່ກັບການຈັດຕັ້ງປະຕິບັດໄດ້ລື່ນແຜນການນັ້ນ ສະພາບການປັກດຳ ເຂົ້ານາແຊງ ຂອງເມືອງໜອງບົກ ໃນປີນີ້ແມ່ນຂ້ອນຂ້າງມີຄວາມຊັກຊ້າ ເນື່ອງຈາກມີການປັບປຸງລະບົບຄອງເໝືອງ, ຊົນລະປະທານ, ມີການກໍ່ສ້າງ, ຕໍ່ເຕີມ ໂດຍສະເພາະແມ່ນການຈົກຄອງເໝືອງທີ່ນໍ້າໄຫຼບໍ່ຮອດ ແລະ ມີການຂະຫຍາຍ ເນື້ອທີ່ນາໃໝ່ ຈຶ່ງເຮັດໃຫ້ມີຄວາມຊັກຊ້າ ຖ້າທຽບໃສ່ບັນດາເມືອງອື່ນ. ມາຮອດປະຈຸບັນແມ່ນສາມາດເກັບກ່ຽວ ໄດ້ແລ້ວປະມານ 05% ຂອງເນື້ອທີ່ໃນທົ່ວເມືອງ ແລະ ຄາດວ່າຈະໃຫ້ສຳເລັດໃນທ້າຍເດືອນພຶດສະພານີ້, ຄາດຄະເນ ສະມັດຕະພາບ 5,76 ໂຕ່ນຕໍ່ເຮັກຕາ ແລະ ຄາດຄະເນຜົນຜະລິດເກືອບ 17 ພັນໂຕ່ນ.


ສະເພາະການຜະລິດພືດລະດູແລ້ງ ຕາມແຜນການໃນເບື້ອງຕົ້ນແມ່ນ 1.700 ເຮັກຕາ, ປະຕິບັດໄດ້ຕົວຈິງ 1.800 ກວ່າເຮັກຕາ ເຊິ່ງມາຮອດປະຈຸບັນການເກັບກ່ຽວແມ່ນປະຕິບັດໄດ້ແລ້ວປະມານ 80%. ໃນນັ້ນພືດທີ່ເດັ່ນ ກວ່າໝູ່ແມ່ນປະເພດ ສາລີຫວານ, ໝາກແຕງ, ໝາກເຜັດ ແລະ ພືດຜັກຕ່າງໆ.
ສຳລັບແຜນການຜະລິດເຂົ້ານາປີ ສົກ 2021 ຕາມແຜນການແມ່ນ 15.750 ເຮັກຕາ ເຊິ່ງພາຍຫຼັງການເກັບ ກ່ຽວເຂົ້ານາແຊງສຳເລັດກໍ່ຈະໄດ້ລົງຊຸກຍູ້ການຜະລິດເຂົ້ານາປີ ກໍ່ຄືການປູກພືດໃນລະດູຝົນຂອງພໍ່ແມ່ປະຊາຊົນ ພ້ອມທັງ ໄດ້ກະກຽມສະໜອງແນວພັນເຂົ້າໃຫ້ແກ່ຊາວກະສິກອນ ແລະ ອຳນວຍຄວາມສະດວກໃນດ້ານອື່ນໆ ເພື່ອເຮັດໃຫ້ ແຜນການທີ່ວາງໄວ້ ໄດ້ຮັບການຈັດຕັ້ງປະຕິບັດບັນລຸຕາມຄາດໝາຍ.