ມີເດຍລາວແຂວງວຽງຈັນ ຂ່າວ ແຫວນຄຳ
ພິທີປິດບັ້ນ ຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ II ແລະ ປະກາດຮັບຮອງບ້ານປະຕິບັດກົດໝາຍ ປະຈຳປີ 2021 ໄດ້ຈັດຂຶ້ນຕອນເຊົ້າວັນທີ 23 ມີຖຸນາ 2021 ຢູ່ທີ່ສະໂມສອນໃຫຍ່ຫ້ອງວ່າການເມືອງໝື່ນ ໃຫ້ກຽດເຂົ້າເປັນປະທານ ຂອງທ່ານ ພອນເທີດ ສຸຫວັດດີ ກຳມະການພັກເເຂວງ, ເລຂາພັກເມືອງ, ເຈົ້າເມືອງໆໝື່ນ , ມີທ່ານ ນາງ ຈັນສອນ ກົງດາລາ ຮອງຫົວໜ້າພະແນກຍຸຕິທຳ ແຂວງວຽງຈັນ ,ມີຄະນະປະຈຳ,ກຳມະການພັກເມືອງ,ຄະນະຮັບຜິດຊອບບັນຝຶກອົບຮົມ,ຫ້ອງການຍຸຕິທຳເມືອງ,ເເຂກຖືກເຊີນ ແລະ ນັກຝຶກອົບຮົມເຂົ້າຮ່ວມ.

ທ່ານ ວຽງຢ່າງ ນາວປາວ ຫົວໜ້າຫ້ອງການຍຸຕິທຳເມືອງໝື່ນ ໄດ້ຂຶ້ນຜ່ານບົດສະຫຼຸບການຝຶກອົບຮົມ ກົດໝາຍໄລຍະສັ້ນ 45 ຊຸດທີ II ວ່າ: ການຝຶກອົບຮົມເທື່ອນີ້ ແມ່ນປະຕິບັດຕາມມະຕິ 03 ຂອງກົມການເມືອງສູນກາງພັກ ລົງວັນທີ 15 ກຸມພາ 2012 ,ວ່າດ້ວຍ: ການທົດລອງສ້າງແຂວງ ເປັນຫົວໜ່ວຍຍຸດທະສາດ,ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ, ປະຕິບັດຕາມຄຳເເນະນຳຂອງທ່ານລັດຖະມົນຕີ ວ່າການກະຊວງຍຸຕິທຳ ສະບັບເລກທີ 1039/,ລົງວັນທີ 4 ພະຈິກ 2015, ວ່າດ້ວຍ: ການຈັດຕັ້ງປະຕິບັດວຽກງານ 3 ສ້າງ ຕາມພາລະບົດບາດຂອງຂະແໜງຍຸຕິທຳ ໂດຍມີຜູ້ເຂົ້າຝຶກອົບຮົມກົດໝາຍທັງໝົດ 50 ທ່ານ,ຍິງ 04 ທ່ານ ,ເຊິ່ງມາຈາກບ້ານທັງໝົດ, ມີຄູສອນທັງໝົດ: 27 ທ່ານ ,ຍິງ 05 ທ່ານ ,ມາຈາກຫ້ອງການກ່ຽວຂ້ອງຂັ້ນເມືອງ 21 ທ່ານ,ຍິງ 03 ທ່ານ, ຫຼັກສູນການສອນ – ການຮຽນຊຸດນີ້ ມີທັງໝົດ 32 ວິຊາ, 22,5 ໜ່ວຍກິດ, 360 ຊົ່ວໂມງ,ໃຊ້ເວລາ 45 ວັນ ໂດຍເລີ່ມຕົ້ນຮຽນມາແຕ່ວັນທີ 15 ກຸມພາ 2021 ຈົນເຖິງ ວັນທີ 2 ເມສາ 2021 ຈຶ່ງສໍາເລັດຜົນ.

ພິທີຄັ້ງນີ້ໄດ້ຜ່ານຂໍ້ຕົກລົງຂອງຫົວໜ້າສະຖາບັນຍຸຕິທຳແຫ່ງຊາດວ່າດ້ວຍ: ການມອບໃບຢັ້ງຢືນໃຫ້ຜູ້ສຳເລັດການຝຶກອົບຮົມ, ຜ່ານຂໍ້ຕົກລົງຂອງທ່ານ ເຈົ້າເມືອງໆໝື່ນ ວ່າດ້ວຍການມອບໃບຍ້ອງຍໍ ໃຫ້ຜູ້ທີ່ມີຜົນງານດີເດັ່ນໃນບັ້ນຝຶກອົບຮົມ ຈາກນັ້ນກໍ່ໄດ້ມອບໃບຢັ້ງຢືນໃຫ້ຜູ້ສຳເລັດການຝຶກອົບຮົມ ແລະ ຜູ້ທີ່ມີຜົນງານທີ່ມີຜົນງານເດັ່ນ ເຊິ່ງແມ່ນທ່ານ ພອນເທີດ ສຸຫວັດດີ ເຈົ້າເມືອງໆໝື່ນ ໃຫ້ກຽດຂຶ້ນມອບຢ່າງສົມກຽດ.

ໂອກາດດຽວກັນນີ້ ພິທີຍັງໄດ້ຜ່ານຂໍ້ຕົກລົງຂອງງທ່ານ ເຈົ້າເມືອງໆໝື່ນ ວ່າດ້ວຍ: ການຮັບຮອງເອົາບ້ານແບບຢ່າງປະຕິບັດກົດໝາຍປະຈຳປີ 2021 ໃຫ້ 12 ບ້ານ, ປະກອບມີ: ບ້ານ ໂພນສີວິໄລ,ບ້ານໂນນຕ້ອງ,ບ້ານນາຍາວ,ບ້ານນາບົວ,ບ້ານນໍ້າເລົ້າ,ບ້ານນໍ້າເເພດ,ບ້ານເມືອງໝື່ນ,ບ້ານນາປ່າໄຜ່,ບ້ານນໍ້າເພີນ,ບ້ານນໍ້າຮອນ,ບ້ານນໍ້າຮີ້ ແລະ ບ້ານວັງ ຈາກນັ້ນ ເລຂາພັກບ້ານ-ນາຍບ້ານ 12 ບ້ານດັ່ງກ່າວ ກໍ່ໄດ້ຂຶ້ນຮັບໃບຢັ້ງຢືນ ໂດຍແມ່ນທ່ານ ພອນເທີດ ສຸຫວັດດີ ເຈົ້າເມືອງໆໝື່ນ ໃຫ້ກຽດຂຶ້ນມອບ ພ້ອມທັງມີຄຳຄິດ,ຄຳເຫັນ ໂອ້ລົມຊີ້ທິດເຍືອງທາງ ຕໍ່ພິທີໃນເທື່ອນີ້ຕື່ມອີກ.