ໃນອາທິດຜ່ານມານີ້ ຄະນະບໍລິຫານງານຊາວໜຸ່ມແຂວງອັດຕະປື ນໍາໂດຍທ່ານ ພູວັນ ພົມມະຈັນ ກຳມະການພັກແຂວງ,ກຳມະການສູນກາງຊາວໜຸ່ມປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ ໄດ້ລົງເຄື່ອນໄຫວຊຸກຍູ້ວຽກງານຊາວໜຸ່ມ-ເຍົາວະຊົນຮອບດ້ານ ຢູ່ 2 ເມືອງຊານໄຊ ແລະ ເມືອງສາມັກຄີໄຊ,


ການລົງເຄື່ອນໄຫວໃນຄັ້ງນີ້ ແມ່ນເພື່ອເຜີຍແຜ່ຜັນຂະຫຍາຍມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ແລະ ຊຸກຍູ້ວຽກງານຊາວໜຸ່ມ-ເຍົາວະຊົນຮອບດ້ານ. ນອກນັ້ນ ຍັງໄດ້ຊຸກຍູ້ບັນດາໜ້າວຽກທີ່ສຳຄັນຄື: ເອົາໃຈໃສ່ປະຕິບັດພາລະບົດບາດ, ໜ້າທີ່ຄວາມຮັບຜິດຊອບຂອງຊາວໜຸ່ມແຕ່ລະຂັ້ນໃຫ້ເລິກເຊິ່ງ, ຊຸກຍູ້ປຸກລະດົມຊາວໜຸ່ມອາສາສະໝັກເຂົ້າຮ່ວມບໍລິຈາກເລືອດເພື່ອຊ່ວຍເພື່ອນມະນຸດດ້ວຍກັນ ແລະ ສືບຕໍ່ປະຕິບັດມາດຕະການເພື່ອປ້ອງກັນຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ COVID-19 ຈາກຄະນະສະເພາະກິດຢ່າງເຂັ້ງວດ.

ເກັບກຳສະຖິຕິຊາວໜຸ່ມທີ່ເປັນກຳລັງຫຼັກຕົ້ນຕໍ ນັບທັງໃນການຈັດຕັ້ງ ແລະ ນອກການຈັດຕັ້ງ, ການພັດທະນາກົມກອງໃຫ້ຈົບງາມ ແລະ ໃຫ້ເປັນຮົ່ມສີຂຽວ, ສ້າງໂຄງການອົບຮົມກ່ຽວກັບພາລະບົດບາດໃຫ້ເປັນປົກກະຕິ, ສົມທົບລະຫວ່າງຄະນະຊາວໜຸ່ມແຕ່ລະຂັ້ນ, ຫັນປ່ຽນແບບແຜນການປະເມີນ ຂໍ້ແຂ່ງຂັນ 4 ບຸກ ຂອງຊາວໜຸ່ມຄືນໃໝ່ເປັນຕົ້ນ: ຕິດຕາມການຮ່ວມຊີວິດ, ການສົ່ງບົດສະຫຼຸບ, ເສຍເງິນສະຕິບຳລຸງ, ການເຂົ້າຮ່ວມຂະບວນການແຕ່ລະຄັ້ງ, ການພັດທະນາທີ່ດິນຂອງຊາວໜຸ່ມ ຕາມເງື່ອນໄຂຂອງທ້ອງຖິ່ນ ແລະ ຊຸກຍູ້ຮາກຖານ, ສະມາຊິກຊາວໜຸ່ມປະຕິບັດກົດລະບຽບ, ກົດໝາຍຂອງຊາວໜຸ່ມຢ່າງເຂັ້ມງວດ.
ພາບ-ຂ່າວ: ຄຳດິດ (ຊາວໜຸ່ມແຂວງ)