ມີເດຍລາວແຂວງເຊກອງ ຂ່າວ: ສັນຍາ ກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງ (ສພຂ) ເຊກອງຊຸດທີ II ໄດ້ໄຂຂຶ້ນໃນຕອນເຊົ້າມື້ນີ້ (7 ເມສາ 2021) ໂດຍພາຍໃຕ້ການເປັນປະທານຂອງທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ ແລະເຂົ້າຮ່ວມມີທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າ ແຂວງເຊກອງ; ພ້ອມນີ້ ກໍມີທ່ານຮອງເຈົ້າແຂວງ, ເຈົ້າເມືອງ, ຫົວໜ້າ-ຮອງພະແນກ, ຫ້ອງການ-ລັດວິສາຫະກິດ, ອາດີດການນໍາຂອງແຂວງ, ສະມາຊິກສະພາແຫ່ງຊາດ ແລະສະມາຊິກສະພາປະຊາຊົນແຂວງເຂົ້າຮ່ວມ.
ໃນພາກເຊົ້າ ໃນກອງປະຊຸມໄດ້ຮັບຮອງເອົາການເລືອກຕັ້ງທ່ານ ດົງເພັດ ພະຍົນ ເປັນປະທານສະພາປະຊາຊົນແຂວງເຊກອງຊຸດທີ II, ຮັບຮອງເອົາການເລືອກຕັ້ງທ່ານ ປອ. ແພງສີ ສີລາວີ ແລະທ່ານ ນາງ ຄໍາເສັງ ທຸມມະວົງສາ ເປັນຮອງປະທານສະພາປະຊາຊົນແຂວງເຊກອງຊຸດທີ II.


ຮັບຮອງເອົາການເລືອກຕັ້ງທ່ານ ນາງ ໄຮມະນີ ວົງໜໍແກ້ວ ເປັນກໍາມະການ ຄະນະປະຈໍາສະພາປະຊາຊົນ, ປະທານຄະນະກໍາມະການວັດທະນະທໍາ-ສັງຄົມ ແລະບັນດາເຜົ່າ; ທ່ານ ພົງສະຫວັດ ສິງຫາລາດ ເປັນກໍາມະການ ຄະນະປະຈໍາສະພາປະຊາຊົນ, ປະທານຄະນະກໍາມະການເສດຖະກິດ, ແຜນການ ແລະການເງິນ; ທ່ານ ໃຈເພັດ ພັນທະວົງ ເປັນກໍາມະການ ຄະນະປະຈໍາສະພາປະຊາຊົນ, ປະທານຄະນະກໍາມະການຍຸຕິທໍາ ແລະປ້ອງກັນຊາດ-ປ້ອງກັນຄວາມສະຫງົບ; ທ່ານ ນາງ ຄໍາໄພ ວິລະສານ ເປັນກໍາມະການ ຄະນະປະຈໍາສະພາປະຊາຊົນ, ເລຂາທິການສະພາປະຊາຊົນແຂວງເຊກອງຊຸດທີ II.


ພ້ອມນີ້ ກອງປະຊຸມກໍຍັງຈະໄດ້ພິຈາລະນາ, ຮັບຮອງເອົາການສ້າງຕັ້ງບາງກົງຈັກ ແລະບຸກຄະລາກອນຂອງອົງການປົກຄອງແຂວງຕື່ມອີກ.