ຫາກຕິດຕາມຂ່າວຈາກທາງການ ຈະເຫັນວ່າຢູ່ປະເທດເຮົາດຽວນີ້ເພີ່ນນຳໃຊ້ວັກຊິນຕ້ານໂຄວິດ-19 ສີ່ຍີ່ຫໍ້ ເຊີ່ງລ້ວນແລ້ວແຕ່ຖືກຮັບຮອງຈາກອົງການອະນາໄມໂລກ (WHO) ໃຫ້ໃຊ້ໃນສະພາວະສຸກເສີນຄື: Sinopharm, Spunick, Astrazeneca ແລະ Pfizer ຫາກເວົ້າເລື່ອງປະສິດທິພາບຍີ່ຫໍ້ໃດກໍ່ດີທັງນັ້ນ ສ່ວນປະສິດທິຜົນນັ້ນຂື້ນກັບຮ່າງກາຍຂອງແຕ່ລະບຸກຄົນວ່າຈະສ້າງພູມຕ້ານທານໄດ້ສໍ່າໃດ!.

ມື້ກ່ອນຟັງຂໍ້ມູນຈາກ ສຈ.ປອ.ດຣ ມາຍຟອງ ມາຍຊາຍ ຮອງອະທິການບໍດີມະຫາວິທະຍາໄລວິທະຍາສາດສຸຂະພາບ ໂດຍແມ່ນສູນຂ່າວສານການແພດສຸຂະສຶກສາ ເປັນຜູ້ໂພສອອກໃນວັນທີ 16/6/2021 ນັ້ນເພີ່ນເວົ້າເຖີງປະສິດທິພາບຂອງວັກຊິນລະອຽດໂດຍເພີ່ນບອກວ່າບໍ່ຄວນຄໍານຶງ ແລະ ສົມທຽບປະສິດທິພາບວ່າໂຕໃດສູງກ່ວາກັນ ບໍ່ສາມາດປຽບ ທຽບໄດ້; ໃຫ້ຫັນມາເບີ່ງປະສິດທິຜົນຫຼາຍກ່ວາໃນຄົນໃຊ້ຫຼາຍປານໃດ? ເພີ່ນວ່າທຸກຍີ່ຫໍ້ວັກຊິນມີປະສິດທິຜົນທໍ່ກັນໝົດ ຖ້າສັກເຂັມດຽວປ້ອງກັນເວລາເຂົ້າໂຮງໝໍຈະຊ່ວຍບໍ່ໃຫ້ຮຸນແຮງ ແລະ ເສຍຊີວິດເຖີງ 80% ຖ້າຄົບສອງເຂັມແມ່ນ 100%.

ສຳລັບຢູ່ປະເທດເຮົາ ຕາມຖະແຫຼງຂ່າວປະຈໍາວັນທີ 24/6/2021 ໂດຍ ທ່ານ ດຣ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ໃຫ້ຮູ້ວ່າ: “ການສັກວັກຊິນປ້ອງກັນພະຍາດໂຄວິດ-19 ມາຮອດປະຈຸບັນສັກໃຫ້ພໍ່ແມ່ປະຊາຊົນໄປແລ້ວເຂັມທີ 1 ຈຳນວນ 853.782 ໂດສ ກວມເອົາ 11.64%, ເຂັມທີສອງຈຳນວນ 494.477 ໂດສ ໄລ່ເປັນຈຳນວນຄົນ ເຂັມທີ 1 ສັກໄປແລ້ວ 953.782 ຄົນ ແລະ ເຂັມທີ 2 ແລ້ວ 494.447 ຄົນ ເຊີ່ງຕາມຄາດໝາຍຈະສັກໃຫ້ກວມ 50% ຂອງຈຳນວນປະຊາກອນ ສະນັ້ນ ຕ້ອງສັກໃຫ້ໄດ້ 3.700.000 ຄົນ ໃນປີ 2021 ທ່ານກ່າວຕື່ມວ່າ: ຢູ່ນະຄອນຫຼວງວຽງຈັນ ການສັກຢາເຂັມທີ 1 ຂອງ Sinopharm ແລະ Pfizer ໄດ້ຄົບກຳນົດໂຄຕ້າທີ່ໄດ້ຮັບແລ້ວ ຊື່ງຈະໂຈະເຂັມທີ 1 ກ່ອນ, ສ່ວນເຂັມທີ 2 ຂອງ Astrazeneca ຫາກທ່ານໃດສັກເຂັມທີ 1 ໄດ້ຄົບ 8-12 ອາທິດ ກໍ່ສາມາດເຂົ້າໄປຮັບເຂັມທີ 2 ໄດ້. ສ່ວນທ່ານໃດທີ່ຍັງບໍ່ທັນໄດ້ສັກເທື່ອໃນເດືອນ 7 ນີ້ພວກເຮົາຈະເປີດສັກເຂັມທີ 1”.  

ສ່ວນຈຳນວນວັກຊິນນັ້ນ ນອກຈາກການຊ່ວຍເຫຼືອຈາກໂຄງການຂອງໂຄແວັກ ອົງການອະນາໄມໂລກແລ້ວ, ລັດຖະບານ ໄດ້ປະສານກັບອົງການສາກົນ ໃນການຈັດສັນວັກຊິນ ທັງຮຽກຮ້ອງໃຫ້ພາກທຸລະກິດ-ເອກະຊົນ ເຂົ້າມາມີສ່ວນຮ່ວມເພື່ອໃຫ້ບັນລຸຕາມຄາດໝາຍ; ປະຈຸບັນລາວເຮົາຍັງມີໂຄຕ້າທີ່ຈະໄດ້ຮັບວັກຊິນຢູ່ ແລະ ໃນເດືອນ 7/2021 ຈະມານີ້ເຮົາຈະໄດ້ຮັບວັກຊິນ ຊິນແອສຕາເຊເນກາ ແລະ ຈອນສັນແອນຈອນສັນ (johnson and Johnson) ຕື່ມອີກ.

ສຳລັບເພື່ອນມິດຍຸດທະສາດ ຂອງປະເທດເຮົາຄື: ສປ ຈີນ ເພີ່ນກໍ່ໄດ້ມີຄວາມເປັນຫ່ວງເປັນໄຍຕໍ່ປະຊາຊົນເຮົາ ແລະ ໄດ້ສະໜອງວັກຊິນທັງໝົດເກືອບ 2 ລ້ານຫຼອດ ເຊີ່ງກວມເອົາ 90% ຂອງວັກຊິນທີ່ມີຢູ່ລາວເຮົາ.

ສະນັ້ນ ຜູ້ທີ່ຢູ່ໃນເປົ້າໝາຍທີ່ຈະໄດ້ຮັບວັກຊິນບໍ່ຕ້ອງກັງວົນໃຈເລື່ອງວັກຊິນ ຂໍໃຫ້ຕິດຕາມຂ່າວຈາກທາງການທໍ່ນັ້ນ ເພາະວັກຊິນຈະສືບຕໍ່ມາເລື້ອຍໆ ແລະ ສັກໄປຈົນໝົດປີ 2021 ເພື່ອໃຫ້ກວມ 50% ຂອງຈຳນວນປະຊາກອນຈາກນັ້ນທາງການເພີ່ນຫາກຈະມີແຈ້ງການອອກມາ.

ຂໍໃຫ້ເຊື່ອໝັ້ນ ແລະ ທຸ່ນທ່ຽງຕໍ່ການບໍລິຫານຈັດການເລື່ອງວັກຊິນຂອງທາງການ.  

ທິດດີ