ມີເດຍລາວແຂວງບໍລິຄຳໄຊ
ພິທີລົງນາມເຊັນບົດບັນທຶກ ມອບ-ຮັບສຸກສາລາ ຢູ່ບ້ານສົບເຕີງ ກຸ່ມນໍ້າອ້ອນ ເມືອງໄຊຈຳພອນ ແຂວງບໍລິຄຳໄຊ ລະຫວ່າງອົງການປົກຄອງແຂວງບໍລິຄຳໄຊ ສປປ ລາວ ແລະ ອົງການປົກຄອງແຂວງເຫງະອານ ສສ ຫວຽດນາມ ໄດ້ຈັດຂຶ້ນຢ່າງເປັນທາງການ ໃນວັນທີ 14 ມິຖຸນາ 2021 ຢູ່ດ່ານສາກົນນໍ້າພາວ-ເກົ່າແຈວ, ຝ່າຍແຂວງບໍລິຄຳໄຊ ລົງນາມໂດຍ ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ, ຝ່າຍແຂວງເຫງະອານ ລົງນາມໂດຍ ທ່ານ ບູ່ຍດິງລ່ອງ ຮອງປະທານຄະນະກຳມະການປະຊາຊົນແຂວງເຫງະອານ ມີຜູ້ແທນທັງສອງຝ່າຍ ເຂົ້າຮ່ວມເປັນສັກຂີພິຍານ.

ໂຄງການກໍ່ສ້າງອາຄານສຸກສາລາ ຢູ່ບ້ານສົບເຕີງ ໄດ້ດຳເນີນການກໍ່ສ້າງມາຕັ້ງແຕ່ກາງເດືອນກໍລະກົດ ປີ 2017 ມາຮອດຕົ້ນປີ 2020 ໄດ້ສໍາເລັດສົມບູນ, ລວມູນຄ່າການກໍ່ສ້າງ 14.078.000.000 ດົງ, ເປັນອາຄານ 2 ຊັ້ນ ໂດຍໄດ້ຮັບທຶນຊ່ວຍເຫຼືອລ້າຈາກຄະນະພັກ, ສະພາປະຊາຊົນ, ຄະນະກຳມະການແນວໂຮມ ແຂວງເຫງະອານ ສສ ຫວຽດນາມ, ກໍ່ສ້າງໂດຍກອງບັນຊາການທະຫານຊາຍແດນ ປະຈຳດ່ານນໍ້າອ້ອນ-ແທັງຖຸຍ ໂດຍສືບເນື່ອງມາຈາກບົດບັນທຶກການຮ່ວມມືຮອບດ້ານ ລະຫວ່າງສອງພັກສອງລັດຖະບານ ສປປ ລາວ ແລະ ສສ ຫວຽດນາມ ເວົ້າລວມ, ເວົ້າສະເພາະກໍ່ຄືແຂວງບໍລິຄຳໄຊ ແລະ ແຂວງເຫງະອານ ເຊິ່ງຍາມໃດໄກໍ່ໄດ້ຊ່ວຍເຫຼືອເຊິ່ງກັນ ແລະ ກັນຕະຫຼອດມາ.
ຈຸດປະສົງຂອງການກໍ່ສ້າງອາຄານ ສຸກສາລາ ຢູ່ບ້ານສົບເຕີງ ກໍ່ເພື່ອເປັນການຍົກສູງດ້ານການບໍລິການທາງການແພດ ເພື່ອອຳນວຍຄວາມສະດວກໃນການເຂົ້າເຖິງການບໍລິການ ດ້ານສາທາລະນະສຸກຂອງປະຊາຊົນເຂດໃກ້ຄຽງ ໃຫ້ມີຄວາມສະດວກສະບາຍ.

ພ້ອມນັ້ນ ທ່ານ ບູ່ຍດິງລ່ອງ ຮອງປະທານຄະນະກຳມະການປະຊາຊົນແຂວງເຫງະອານ ຕາງໜ້າໃຫ້ຄະນະພັກ, ຄະນະປົກຄອງແຂວງ ຍັງໄດ້ນຳເອົາເຂົ້າສານໜຽວຈຳນວນ 10 ໂຕ່ນ ແລະ ອຸປະກອນເຄື່ອງມືທາງການແພດ ເພື່ອນຳໃຊ້ເຂົ້າໃນວຽກງານຕ້ານໂຄວິດ – 19 ໃນຮອບທີ 2 ລວມມູນຄ່າ 250 ລ້ານດົ່ງ ມາມອບໃຫ້ແຂວງບໍລິຄຳໄຊ.
ຕໍ່ກັບຜົນງານການປະກອບສ່ວນສ້າງສາພັດທະນາປະເທດຊາດຂອງແຂວງເຫງະອານ ທີ່ມີຕໍ່ແຂວງບໍລິຄຳໄຊ ທ່ານ ຄຳແຫວນ ປັນຍານຸວົງ ຕາງໜ້າໃຫ້ລັດຖະບານ ແຫ່ງ ສປປ ລາວ ກໍ່ຄືຕາງໜ້າໃຫ້ຄະນະພັກຄະນະປົກຄອງແຂວງ ໄດ້ເປັນກຽດມອບຫຼຽນກາພັດທະນາຂອງລັດຖະບານ ສປປ ລາວ ແລະ ໃບກຽດຕິຄຸນ ຂອງແຂວງບໍລິຄຳໄຊ ໃຫ້ຄະນະພັກຄະນະປົກແຂວງເຫງະອານ ທີ່ມີຜົນງານປະກອບສ່ວນສ້າງສຸກສາລາ ແລະ ມອບອຸປະກອນທາງກາງແພດໃຫ້ແຂວງບໍລິຄຳໄຊ, ມອບໃບກຽດຕິຄຸນຂອງແຂວງ ໃຫ້ກອງບັນຊາການທະຫານຊາຍແດນແຂວງເຫງະອານ ໃນນາມຜູ້ລົງມືຈັດຕັ້ງປະຕິບັດໂຄງການກໍ່ສ້າງ ສຸກສາລາຢ່າງສົມກຽດ