ຫາກທ່ານຕິດຕາມການຖະແຫຼງຂອງຄະນະສະເພາະກິດ ຈະເຫັນວ່າການປີ່ນປົວຜູ້ຕິດເຊື້ອໂຄວິດ-19 ຢູ່ປະເທດເຮົາມີຜູ້ຫາຍດີຫຼາຍຂື້ນ ໃນການຖະແຫຼງຂ່າວ ວັນທີ 9 ມິຖຸນາ 2021 ໃຫ້ຮູ້ວ່າ: ມາຮອດວັນທີ 8 ມິຖຸນາ 2021 ຕົວເລກຕິດເຊື້ອສະສົມມີ 1.971 ກໍລະນີ (ໃໝ່ 1) ປີ່ນປົວຫາຍດີສະສົມ 1.795 ກໍລະນີ; ກຳລັງປີ່ນປົວ 173 ກໍລະນີ.

ເມື່ອເປັນເຊັ່ນນີ້ຜູ້ທີ່ຢູ່ໃນກຸ່ມສ່ຽງ; ຜູ້ມີອາການໜ້າສົງໃສ ຈົ່ງຮີບຮ້ອນໄປເກັບຕົວຢ່າງກວດຫາເຊື້ອພະຍາດ; ໃນໄລຍະລໍຖ້າຜົນກວດບໍ່ຄວນໄປຊື້ຢາມາກິນເອງ; ຈຳກັດຕົນເອງ ໂດຍແຍກຕົວອອກຈາກຄອບຄົວ ແລະ ຄົນໃກ້ຊິດຈົນຄົບ 14 ມື້ ເຖີງແມ່ນວ່າຜົນກວດຕົວຢ່າງຈະອອກມາເປັນລົບ (-) ກໍ່ຕາມ ເມື່ອຄົບ 14 ວັນ ຈີ່ງອອກມາເຄື່ອນໄຫວປົກກະຕິ ທັງນີ້ເພື່ອຕັດວົງຈອນການສົ່ງເຊື້ອພະຍາດໄປຫາຄົນອ້ອມຂ້າງ ແລະ ສູ່ສັງຄົມ.

ຕໍ່ກໍລະນີຜູ້ໄປເກັບຕົວຢ່າງກວດຫາເຊື້ອພະຍາດທີ່ໃຫ້ຂໍ້ມູນບໍ່ຊັດເຈນ ຫຼື ວ່າປົກປິດນັ້ນ ບໍ່ຄວນເຮັດເພາະວ່າມັນສ່ຽງຕໍ່ຊີວິດຂອງທ່ານ ຍ້ອນວ່າແພດໝໍຕິດຕໍ່ຫາທ່ານຊ້າ ກໍ່ຈະພາໃຫ້ພະຍາດແຮງຂື້ນ ປີ່ນປົວຍາກ ແລະ ສ່ຽງ. ພະຍາດນີ້ມັນກໍ່ຄືພະຍາດອື່ນນັ້ນລະ! ເມື່ອຜົນກວດເຫັນຜົນໄວ ເຂົ້າສູ່ການປີ່ນປົວໄວ ຄວາມສ່ຽງມັນກໍ່ຫຼຸດລົງ ທ່ານກໍ່ໄດ້ອອກໄວ.

ຂໍໂທດເນີ ບໍ່ແມ່ນສອນແຂ້ລອຍນໍ້າ ແພດໝໍເຮົາຢູ່ຈຸດກວດຕົວຢ່າງກໍ່ຕ້ອງຮັດກຸມໃນຂໍ້ມູນ  ເຊັ່ນວ່າ: ຕ້ອງເບີ່ງບັດປະຈຳຕົວ; ສຳມະໂນຄົວ; ຕິດຕັ້ງກ້ອງວົງຈອນປິດ ໃຜເຂົ້າມາຕ້ອງປົດຜ້າອັດປາກກ່ອນ ເພື່ອໃຫ້ກ້ອງວົງຈອນໄດ້ບັນທຶກ ເຮັດໄດ້ແນວນີ້ຈີ່ງສະດວກເວລາຕິດຕໍ່ ໂດຍການຖ່າຍຮູບບັດປະຈຳຕົວ; ສຳມະໂນຄົວ; ຮູບທີ່ບັນທຶກລົງເຟສບຸກປະກາດໂລດ.

ຟັງຂ່າວແລ້ວສະເທືອນໃຈ ແລະ  ເປັນຫ່ວງໃນເວລາປະກາດວ່າຊອກຫາຜູ້ຕິດເຊື້ອບໍ່ໄດ້… ບໍ່ພົບ… ບໍ່ຮູ້…

ທິດດີ