ມີເດຍລາວແຂວງຄຳມ່ວນ ເວລາປະມານ 1:30 ນາທີ່ ຂອງວັນທີ 26 ເມສາ 2021 ໄດ້ເກີດມີພາຍຸລົມແຮງ ແລະ ມີຝົນຕົກ ຟ້າຮ້ອງ ໃນເທສະບານເມືອງທ່າແຂກ ແຂວງຄຳມ່ວນ ເຮັດໃຫ້ເສົາໄຟຟ້າແຮງສູງຫັກລົ້ມລົງ ທັບເຮືອນຊານບ້ານຊ່ອງຂອງພໍ່ແມ່ປະຊາຊົນ ໃນເຂດບ້ານເລົ່າໂພຄຳ ເຊິ່ງເຮັດໃຫ້ເທສະບານເມືອງທ່າແຂກ ແລະ ພື້ນທີ່ກ່ຽວຂ້ອງບໍ່ມີໄຟຟ້າໃຊ້ຫຼາຍຊົ່ວໂມງ. ຕໍ່ກັບເຫດການດັ່ງກ່າວ ທາງອຳນາດການປົກຄອງແຂວງ, ເມືອງ ກໍ່ຄືພາກສ່ວນທີ່ກ່ຽວຂ້ອງ ເປັນຕົ້ນແມ່ນ ລັດວິສາຫະກິດໄຟຟ້າລາວ ສາຂາແຂວງຄຳມ່ວນ ໄດ້ຮີບຮ້ອນລົງກວດກາສະພາບການຕົວຈິງ.

ເຊິ່ງທ່ານ ທົງສະຫວັດ ແດງອິນພຣະຍົມ ຮອງຫົວໜ້າລັດວິສາຫະກິດໄຟຟ້າລາວ ສາຂາແຂວງຄຳມ່ວນ ໄດ້ລາຍງານສະພາບຄວາມເສຍຫາຍເບື້ອງຕົ້ນວ່າ: ຈາກການລົງສຳຫຼວດຕົວຈິງແມ່ນມີເສົາໄຟຟ້າສູງ 16 ແມັດ ຫັກ ແລະ ເສຍຫາຍຈຳນວນ 20 ຕົ້ນ, ເສົາໄຟຟ້າສູງ 12 ແມັດ 02 ຕົ້ນ ແລະ ເສົາໄຟຟ້າສູງ 10 ແມັດ ຈຳນວນ 03 ຕົ້ນ. ເຊິ່ງລັດວິສາຫະກິດໄຟຟ້າລາວສາຂາຄຳມ່ວນ ແມ່ນໄດ້ຊີ້ນຳພະນັກງານ-ວິຊາການກ່ຽວຂ້ອງເລັ່ງສ້ອມແປງ, ຕັ້ງເສົາ ແລະ ຕິດຕັ້ງໄຟຟ້າຄືນໃໝ່ ໃຫ້ສຳເລັດໃນວັນທີ 26 ເມສາ. ສໍາລັບປະຈຸບັນການຊົມໃຊ້ໄຟຟ້າພາຍໃນເທສະບານເມືອງທ່າແຂກແມ່ນນຳໃຊ້ໄດ້ເປັນປົກກະຕິ ສ່ວນໃນເຂດ ທີ່ມີການເປ່ເພ ແມ່ນລໍຖ້າການສ້ອມແປງ, ຕິດຕັ້ງເສົາຄືນໃໝ່ຈົນກວ່າເສົາຈະແຫ້ງ ແລະ ແຂງແຮງຈຶ່ງຈະສາມາດປ່ອຍໄຟຟ້າໃຫ້ຊົມໃຊ້ໄດ້. ສ່ວນມູນຄ່າການເສຍຫາຍ ແມ່ນຍັງຢູ່ໃນຂັ້ນຕອນການປະເມີນ ເຊິ່ງຈະແຈ້ງໃຫ້ຊາບໃນພາຍຫຼັງ.