ມິເດຍລາວແຂວງເຊກອງ ຂ່າວ: ສັນຍາ
ນັດຊິງຊະນະເລີດບານເຕະທົ່ວແຂວງເຊກອງ ເພື່ອຂໍານັບຮັບຕ້ອນບັ້ນເລືອກຕັ້ງສະ ມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ຈະມີຂຶ້ນໃນເວລາ 15:00 ໂມງຂອງມື້ອື່ນ (ວັນທີ 5 ມີນາ 2021) ລະຫວ່າງ ທິມເຮືອນພັກພັນໄຊ ເອັຟຊີ ພົບກັບ ບ.ສ ວິນນີ້ ດາກຈຶງ ທີ່ສະໜາມກິລາແຂວງ.
ທ່ານ ຄໍາພັນ ພະສະແຫວງ ຮອງປະທານສະຫະພັນບານເຕະແຂວງເຊກອງ ເປີດເຜີຍຕໍ່ນັກຂ່າວວ່າ: ການແຂ່ງຂັນບານເຕະທົ່ວແຂວງເຊກອງ ເພື່ອຂໍານັບຮັບຕ້ອນບັ້ນເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II ໄດ້ເປີດການແຂ່ງຂັນມາແຕ່ວັນທີ 28 ມັງກອນຜ່ານມາ ຊຶ່ງມີທິມເຂົ້າຮ່ວມແຂ່ງຂັນທັງໝົດສະເພາະບານເຕະຊາຍຮຸ່ນຊາວໝຸ່ມທົ່ວໄປ 20 ທິມ, ການແຂ່ງຂັນແບ່ງອອກເປັນ 4 ກຸ່ມ, ກຸ່ມລະ 5 ທິມ, ຮູບແບບການແຂ່ງຂັນຮອບແບ່ງກຸ່ມ ແມ່ນແຂ່ງຂັນແບບພົບກັນໝົດ ເພື່ອຄັດເອົາທີ 1-2 ຂອງແຕ່ລະກຸ່ມຜ່ານເຂົ້າໄປຫຼິ້ນໃນຮອບຕໍ່ໄປ, ຈົນສຸດທ້າຍກໍໄດ້ຄູ່ຊິງຊະນະເລີດໂດຍທິມເຮືອນພັກພັນໄຊ ເອັຟຊີ ແລະ ບ.ສ ວິນນີ້ ດາກຈຶງ.
ຮອງປະທານສະຫະພັນບານເຕະແຂວງເຊກອງໃຫ້ຮູ້ອີກວ່າ: ສໍາລັບລາງວັນທິມຊະນະເລີດ ຈະໄດ້ຮັບຂັນຊະນະເລີດ, ຫຼຽນ, ພ້ອມເງິນສົດ 5 ລ້ານກີບ, ອັນດັບທີ 2 ໄດ້ຮັບຫຼຽນເງິນ, ເງິນສົດ 3 ລ້ານກີບ ແລະອັນດັບທີ 3 ໄດ້ຮັບຫຼຽນທອງ, ເງິນສົດ 1 ລ້ານກີບ