ມີເດຍລາວແຂວງຄຳມ່ວນ ໃນຕອນເຊົ້າຂອງວັນທີ 2 ເມສາ 2021 ພະແນກໂຍທາທິການ ແລະ ຂົນສົ່ງແຂວງຄຳມ່ວນ ໄດ້ຈັດກິດຈະກໍາປັ່ນລົດຖີບ ເພື່ອສຸຂະພາບໃນໂອກາດເປີດງານຊັບປະດາແຫ່ງຊາດດ້ານຄວາມປອດໄພ ພາຍໃຕ້ຫົວຂໍ້ : ຂັບຂີ່ປອດໄພຕ້ອງໃສ່ສາຍຮັດນິລະໄພ. ເປັນກຽດເຂົ້າຮ່ວມໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ພິດສະໄໝ ກອງຊາເດດ ຫົວໜ້າພະແນກໂຍທາທິການ ແລະ ຂົນສົ່ງແຂວງ, ພ້ອມດ້ວຍການນໍາຂອງແຂວງ, ພະແນກການ ແລະ ມວນຊົນ, ນັກປັ່ນລົດຖີບ ເຂົ້້າຮ່ວມຢ່າງເປັນຂະບວນຄຶກຄື້ນ.

ງານສັບປະດາຄວາມປອດໄພເທິງຖະໜົນແມ່ນເປັນປີທຳອິດຂອງແຂວງຄຳມ່ວນທີ່ໄດ້ຈັດງານດັ່ງກ່າວນີ້ ຈຸດປະສົງແມ່ນເພື່ອເປັນການປູກຈິດສຳນຶກໃຫ້ບັນດານັກຂັບຂີ່, ບັນດາຜູ້ທີ່ໃຊ້ລົດ ໃຊ້ຖະໜົນທັງຫລາຍ ໂດຍສະເພາະແມ່ນກຸ່ມສ່ຽງເຊັ່ນ : ຊາວໜຸ່ມ – ເຍົາວະຊົນ, ກຳມະກອນ ໃຫ້ເຂົ້າໃຈ ແລະ ເຫັນໄດ້ຄວາມໝາຍຄວາມສໍາຄັນໃນການປ້ອງກັນການເກີດອຸບັດຕິເຫດໃນເວລາຂັບຂີ່ຍານພາຫະນະ. ໃນໂອກາດທີ່ ທ່ານ ວັນໄຊ ພອງສະຫວັນ ໄດ້ເຂົ້າຮ່ວມເປີດງານສັບປະດາແຫ່ງຊາດດ້ານຄວາມປອດໄພທາງຫລວງນີ້ : ທ່ານໄດ້ກ່າວ ເພື່ອເຮັດໃຫ້ພວກເຮົາຮັບຮູ້ກ່ຽວກັບບັນຫາອຸບັດຕິເຫດການສັນຈອນທີ່ເກີດຂຶ້ນໃນທົ່ວໂລກ, ເວົ້າສະເພາະສຳລັບຢູ່ ສປປ ລາວ ອີງຕາມສະຖິຕິຂອງກົມຕຳຫລວດຈະລະຈອນ ກະຊວງປ້ອງກັນຄວາມສະຫງົບສະເພາະເດືອນທັນວາ 2019 ມູນຄ່າຄວາມເສຍຫາຍທີ່ເກີດຈາກອຸບັດຕິເຫດເທິງຖະໜົນທົ່ວປະເທດມີເຖິງ 9 ຕື້ກວ່າກີບ, ມີອຸປະຕິເຫດເກີດຂຶ້ນທັງໝົດ 640 ກໍລະນີ. ມີຜູ້ເສຍຊີວິດ 103 ຄົນ, ພາຫານະເປ່ເພ 1.158 ຄັນ, ໃນນີ້ເປ່ເພສົມຄວນ 590 ຄັນ, ບາດເຈັບສົມຄວນ 468 ຄົນ, ສາຫັດ 142 ຄົນ.

ສາເຫດທີ່ພາໃຫ້ເກີດອຸບັດຕິເຫດສ່ວນໃຫຍ່ແມ່ນຍ້ອນດື່ມສິ່ງມືນເມົາ, ຂັບຂີ່ລົດເກີນຄວາມໄວທີ່ກຳນົດ ແລະ ອື່ນໆ ຕໍ່ກັບຜົນເສຍຫາຍດັ່ງກ່າວພັກ ແລະ ລັດຖະບານໄດ້ຄົ້ນຄວ້າ ແລະ ຫາວິທີແກ້ໄຂຢ່າງຮີບດ່ວນເປັນຕົ້ນແມ່ນໄດ້ອອກລະບຽບການ, ມາດຕະການເຕັກນິກພາຫະນະປະເພດຕ່າງໆ ເພື່ອສະກັດກັ້ນຫລຸດຜ່ອນອຸບັດຕິເຫດ ເພື່ອຫລີກລ້ຽງການສູນຫາຍທາງດ້ານຊີວິດ ແລະ ຊັບສິນຂອງປະຊາຊົນບັນດາເຜົ່າ ຈຶ່ງໄດ້ກຳນົດໃຫ້ສັບປະດາທຳອິດຂອງເດືອນເມສາເປັນສັບປະດາແຫ່ງຄວາມປອດໄພທາງຫລວງ ທັງນີກໍ່ເພື່ອປຸກລະດົມມວນຊົນທົ່ວສັງຄົມໃຫ້ມີສະຕິລະວັງຕົວໃນການຂັບຂີ່. ສຳລັບຂະບວນປັ່ນລົດຖີບແມ່ນໄດ້ເຕົ້າໂຮມຢູ່ຕໍ່ໜ້າພະແນກໂຍທາທິການ ແລະ ຂົນສົ່ງແຂວງ ໂດຍເລີ່ມອອກຈາກຈຸດດັ່ງກ່າວໄປຫາວົງວຽນຫລັກ 2 ຫາຕະຫລາດຫລັກ 3 ແລ້ວລ້ຽວກັບວົງວຽນຫລັກ 2 ໄປຫາຫໍລະນຶກມູນເຊື້ອ 21 ມີນາ ( ນໍ້າພຸ ).