ມີເດຍລາວແຂວງຄຳມ່ວນ ໃນວັນທີ 14 ມີຖຸນາ 2021 ຢູ່ທີສະໂມສອນໃຫຍ່ຂອງແຂວງ ໄດ້ຈັດກອງປະຊຸມຜັນຂະຫຍາຍເນື້ອໃນຈິດໃຈກອງປະຊຸມວຽກງານກວດກາທົ່ວປະເທດ 05 ປີ (2016-2020) ແລະ ປະຈໍາປີ 2020. ສະຫລຸບວຽກງານກວດກາທົ່ວແຂວງຄຳມ່ວນ 05 ປີ 2016-2020 ແລະ ປະຈຳປີ 2020 ຂຶ້ນຢ່າງເປັນທາງການໂດຍການເປັນກຽດເຂົ້າຮ່ວມຂອງ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ສະຫາຍ ວັນໄຊ ພອງສະຫວັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄຳມ່ວນ, ມີບັນດາຮອງເລຂາ, ຄະນະປະຈໍາພັກແຂວງ, ກຳມະການພັກແຂວງ, ອົງການອ້ອມຂ້າງ, ປະທານຄະນະກວດກາພັກເມືອງ – ອົງການກວດກາລັດເມືອງ, ບັນດາສະຫາຍຮອງຄະນະກວດກາພັກແຂວງ – ອົງການກວດກາລັດແຂວງ ແລະ ບັນດາສະຫາຍພະນັກງານກວດກາອາຊີບໃນທົ່ວແຂວງເຂົ້າຮ່ວມ.

ພາຍຫລັງເຈົ້າແຂວງໆ ຄຳມ່ວນໄດ້ກ່າວເປີດ ກອງປະຊຸມ ສະຫາຍ ສີສຸກ ພິມມະສອນ ຮອງປະທານຄະນະກວດກາພັກແຂວງ ໄດ້ຂຶ້ນຜ່ານຮ່າງບົດສະຫລຸບຕີລາຄາການເຄື່ອນໄຫວວຽກງານຕິດຕາມກວດກາ ປະຈຳປີ 2020 ແລະ 5 ປີ 2016 – 2020 ແລະ ທິດທາງແຜນການປີ 2021 ຂອງຄະນະກວດກາພັກແຂວງ, ອົງການກວດກາລັດແຂວງ, ເຊິ່ງໄລຍະໃນໜຶ່ງປີ ແລະ 05 ປີທີ່ຜ່ານມາຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນ ໄດ້ພ້ອມກັນຕັ້ງໜ້າບຸກບືນ ປະຕິບັດວຽກງານດ້ວຍຄວາມຮັບຜິດຊອບສູງ, ຖືສຳຄັນ ແລະ ເອົາໃຈໃສ່ຕິດຕາມ – ກວດກາເປົ້າໝາຍຕ່າງໆ, ຕັ້ງໜ້າສະກັດກັ້ນ ແລະ ແກ້ໄຂການສໍ້ລາດບັງຫຼວງ, ຄົ້ນຄວ້າ, ເຊື່ອມຊຶມ ນິຕິກຳຕ່າງໆ ກ່ຽວກັບວຽກງານກວດກາ, ໄດ້ພະຍາຍາມເອົາໃຈໃສ່ປັບປຸງການຈັດຕັ້ງ ແລະ ບຳລຸງກໍ່ສ້າງພະນັກງານກວດກາແຕ່ລະຂັ້ນ ສາມາດປະຕິບັດພາລະບົດບາດ ແລະ ໜ້າທີ່ຂອງຕົນດີຂຶ້ນເທື່ອລະກ້າວ. ສະເພາະປີ 2020 ດ້ານການກວດກາລັດ ແລະ ຕິດຕາມການຈັດຕັ້ງປະຕິບັດຜົນການກວດກາ ໄດ້ທັງໝົດ 117 ເປົ້າໝາຍ, ໃນນີ້ກວດກາບໍລິຫານລັດ 1 ເປົ້າໝາຍ, ກວດກາບັນດາໂຄງການລົງທຶນຂອງລັດທີ່ມີມູນຄ່າ 10 ຕື້ຂຶ້ນໄປຈຳນວນ 29 ໂຄງການ ແລະ 10 ຕຶ້ລົງມາ 20 ໂຄງການ, ສືບຕໍ່ຕິດຕາມກວດກາໂຄງການລົງທຶນຂອງລັດເລີ່ມແຕ່ຫົວທີ 13 ໂຄງການ, ສືບຕໍ່ຕິດຕາມຜົນການກວດສອບ 54 ໂຄງການ, ຜ່ານການກວດກາບັນດາເປົ້າໝາຍດັ່ງກ່າວພົບຜົນເສຍຫາຍທັງໝົດ 170,43 ຕື້ກີບ, ໃນນີ້ໄດ້ຫັກລົບມູນຄ່າໂຄງການຈຳນວນ 115,33 ຕື້ກີບ ແລະ ຫັກລົບຈາກມູນຄ່າຂອງສັນຍາຈໍານວນ 54,87 ຕື້ກີບ.

ໄດ້ສືບຕໍ່ປະຕິບັດຕາມດຳລັດວ່າດ້ວຍການແຈ້ງຊັບສິນ ແລະ ລາຍຮັບຂອງພະນັກງານ. ດ້ານວຽກງານຄົ້ນຄວ້າຄຳຮ້ອງ – ຄໍາສະເໜີໄດ້ທັງໝົດ 09 ສະບັບ. ນອກຈາກນີ້ຜູ້ເຂົ້າຮ່ວມກອງປະຊຸມຍັງໄດ້ຮັບຟັງບົດສະຫລຸບຫຍໍ້ວຽກງານກວດກາທົ່ວປະເທດປະຈຳປີ 2020 ແລະ 5 ປີ ຂອງຄະນະກວດກາສູນກາງພັກ, ອົງການກວດກາລັດຖະບານ, ບົດໂອ້ລົມຂອງ ສະຫາຍ ບຸນທອງ ຈິດມະນີ ຕໍ່ກອງປະຊຸມວຽກງານກວດກາທົ່ວປະເທດປະຈຳປີ 2020 ແລະ 5 ປີ 2016 – 2020. ເຊິ່ງຜ່ານໂດຍ ສະຫາຍ ຄຳສອນ ອວ້ນທະວີ ຄະນະປະຈຳພັກແຂວງ, ປະທານຄະນະກວດກາພັກແຂວງ, ປະທານອົງການກວດກາລັດແຂວງ, ພ້ອມນັ້ນຜູ້ແທນກອງປະຊຸມຈາກບັນດາພະແນກການຈະໄດ້ພັດປ່ຽນກັນຂຶ້ນປະກອບຄຳຄິດ – ຄຳເຫັນ ປຶກສາຫາລື ຕາມການເຈາະຈີ້ມຂອງປະທານກອງປະຊຸມ ເພື່ອຄວາມເປັນເອກະພາບຕໍ່ທິດທາງແຜນການວຽກງານກວດກາ ປີ 2021 ແລະ ບັນຫາລວມ ໃນ 05 ປີຕໍ່ໜ້າ ແນໃສ່ເຮັດໃຫ້ວຽກງານຕິດຕາມ-ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ໃຫ້ມີການຫັນປ່ຽນຢ່າງແຂງແຮງ ແລະ ດີຂຶ້ນກວ່າເກົ່າ.

ໂອກາດກ່າວໄຂກອງປະຊຸມ ສະຫາຍ ວັນໄຊ ພອງສະຫວັນ ຍັງໄດ້ຮຽກຮ້ອງໃຫ້ຜູ້ແທນກອງປະຊຸມ ຈົ່ງພ້ອມກັນຍົກສູງຄວາມຮັບຜິດຊອບ, ສຸມສະຕິປັນຍາຂອງຕົນຄົ້ນຄວ້າປະກອບຄຳຄິດ – ຄຳເຫັນຢ່າງກົງໄປກົງມາ, ພາວະວິໄສ, ຖືກຕ້ອງ ແລະ ສ່ອງແສງເຖິງຄວາມເປັນຈິງ. ພ້ອມທັງຄົ້ນຄວ້າ ຊອກໃຫ້ເຫັນສາເຫດທີ່ພາໃຫ້ມີ ດ້ານດີ, ດ້ານອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ພ້ອມກັນຄົ້ນຄວ້າໃຫ້ເປັນເອກະພາບກ່ຽວກັບທິດທາງ ແລະ ວິທີການແກ້ໄຂບັນຫາຕ່າງໆ ໃນຕໍ່ໜ້າໃຫ້ຖືກຕ້ອງ, ແທດເໝາະກັບຕົວຈິງດ້ວຍຄວາມຮັບຜິດຊອບສູງ, ເຮັດໃຫ້ກອງປະຊຸມໃນຄັ້ງນີ້ດຳເນີນໄປດ້ວຍບັນຍາກາດດີ ແລະ ມີຜົນສໍາເລັດຢ່າງຈົບງາມ. ເຊິ່ງກອງປະຊຸມດັ່ງກ່າວຈະໄດ້ດໍາເນີນໄປ 1 ວັັນເຄິ່ງ, ນັບແຕ່ວັນທີ 14 – 15 ມິຖຸນາ ຈິ່ງຈະສຳເລັດ.