ມີເດຍລາວແຂວງຄຳມ່ວນ ພິທີເຊັນບົດບັນທຶກຄວາມເຂົ້າໃຈໂຄງການສົ່ງເສີມອາຫານທ່ຽງໃນໂຮງຮຽນໄດ້ຈັດຂຶ້ນໃນວັນທີ 31 ມີນາ 2021 ຢູ່ທີ່ພະແນກສຶກສາທິການ ແລະ ກິລາປະຈຳແຂວງຄຳມ່ວນ ລະຫວ່າງ ກະຊວງສຶກສາທິການ ແລະ ກິລາ ຮ່ວມກັບມູນນິທິເວີດລີ້ງ ( WORLDS LINK )ປະຈຳ ສປປ ລາວ. ເປັນກຽດລົງນາມເຊັນບົດບັນທຶກຕາງໜ້າກະຊວງສຶກສາທິການ ແລະ ກິລາໂດຍ ທ່ານ ນັນຕະໄຊ ອິນທະສອນ ຫົວໜ້າພະແນກສຶກສາທິການ ແລະ ກິລາແຂວງ ແລະ ຝ່າຍມູນນິທິຕາງໜ້າໂດຍ ທ່ານ ນາງ ຄຳສະຫວາງ ຈັນທະໄລ ຜູ້ປະສານງານໂຄງການ. ໂດຍມີ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ພ້ອມດ້ວຍຕາງໜ້າການນຳຂອງ 02 ເມືອງ : ທ່າແຂກ, ໜອງບົກ ແລະ ຂະແໜງການກ່ຽວຂ້ອງຂັ້ນແຂວງ, ຂັ້ນເມືອງເຂົ້າຮ່ວມເປັນສັກຂິພິຍານ.


ໂຄງການສົ່ງເສີມອາຫານທ່ຽງໃນໂຮງຮຽນແມ່ນຈະໄດ້ຈັດຕັ້ງປະຕິບັດຢູ່ 02 ເມືອງຂອງແຂວງຄໍາມ່ວນຄື: ໂຮງຮຽນອະນຸບານ ແລະ ປະຖົມໜອງຜຳ ເມືອງໜອງບົກ. ໂຮງຮຽນຫ້ອງກຽມ ແລະ ປະຖົມໂພນໄຊ , ໂຮງຮຽນອະນຸບານ ແລະ ປະຖົມເລົ່າງົວ ເມືອງທ່າແຂກໃນມູນຄ່າ 54.000 ໂດລາສະຫະລັດ, ໂດຍແມ່ນມູນນິທິ URAKAMI FOUNDATION ປະເທດຍີ່ປຸ່ນເປັນຜູ້ໃຫ້ທຶນ, ໄລຍະຈັດຕັ້ງປະຕິບັດໂຄງການດັ່ງກ່າວແມ່ນເລີ່ມແຕ່ມື້ອະນຸມັດໄປຈົນເຖິງເດືອນ ສິງຫາ ປີ 2022. ກິດຈະກໍາຂອງໂຄງການປະກອບມີ ແຕ່ງອາຫານທ່ຽງໃຫ້ນັກຮຽນ, ປູກພືດຜັກສວນຄົວ ແລະ ລ້ຽງສັດ, ຝຶກອົບຮົມ ແລະ ທັດສະນະສຶກສາ – ຖອດຖອນບົດຮຽນ, ສະໜອງອຸປະກອນສຳລັບການແຕ່ງກິນ, ຈັດກິລາສົ່ງເສີມສຸຂະພາບ ແລະ ຄວາມສາມັກຄີລະຫວ່າງໂຮງຮຽນ ແລະ ຊຸມຊົນ. ຈຸດປະສົງເພື່ອຕອບສະໜອງ ແລະ ສົ່ງເສີມນະໂຍບາຍຂອງລັດຖະບານເວົ້າລວມ, ເວົ້້າສະເພາະແມ່ນແຜນພັດທະນາການສຶກສາຂອງກະຊວງສຶກສາທິການ ແລະ ກິລາ ເພື່ອຮັບປະກັນໃຫ້ນັກຮຽນຢູ່ໃນໂຮງຮຽນມີສຸຂະພາບແຂງແຮງ ແລະ ມີພາວະໂພຊະນາການທີດີ