ມີເດຍລາວແຂວງຈຳປາສັກ ຂ່າວ: ທັດຊະນະ ໃນວັນທີ 23 ກໍລະກົດ 2021, ທີ່ສະໂມສອນ (ຫລັກ4) ແຂວງຈຳປາສັກ ໄດ້ຈັດພິທີ ປະກາດ ຍຸບພະແນກວິທະຍາສາດ ແລະເຕັກໂນໂລຊີແຂວງ, ສັບຊ້ອນ, ຈັດວາງພະນັກງານ 44 ທ່ານ ໄປຂື້ນກັບ 5 ພະແນກ ຄື: ພະແນກສຶກສາ ແລະກິລາ 09 ທ່ານ; ພະແນກອຸກສະຫະກໍາ ແລະການຄ້າ 18 ທ່ານ; ພະແນກເຕັກໂນໂລຊີ ແລະການສື່ສານ 12 ທ່ານ; ພະແນກພະລັງງານ ແລະບໍ່ແຮ່ 02 ທ່ານ ແລະ ໄປພະແນກກະສິກຳ ແລະປ່າໄມ້ 03 ທ່ານ. ພ້ອມນີ້ ກໍໄດ້ ໂຮມຄະນະຮັບຜິດຊອບອະນຸສາວະລີແຂວງ ໄປຂຶ້ນກັບຫ້ອງວ່າການແຂວງຈຳປາສັກ ແລະ ມອບໂອນພະນັກງານ-ລັດຖະກອນ ຈຳນວນ 16 ທ່ານ.

ໃນພິທີ, ຄະນະຮັບຜິດຊອບ ໄດ້ ຜ່ານ ຂໍ້ຕົກລົງເຈົ້າແຂວງ ສະບັບເລກທີ 765/ຈຂ.ຈສ, ລົງວັນທີ 16 ກໍລະກົດ 2011 ວ່າດ້ວຍການຍຸບພະແນກວິທະຍາສາດ ແລະ ເຕັກໂນໂລຊີແຂວງ; ຂໍ້ຕົກລົງເຈົ້າແຂວງ ສະບັບເລກທີ 772/ຈຂ.ຈສ, ລົງວັນທີ 19 ກໍລະກົດ 2021 ວ່າດ້ວຍການສັບຊ້ອນ, ຈັດວາງ ພະນັກງານພະແນກວິທະຍາສາດ ແລະ ເຕັກໂນໂລຊີ ໄປຂຶ້ນກັບ 5 ພະແນກ. ຜ່າານ ຂໍ້ຕົກລົງເຈົ້າແຂວງ ສະບັບເລກທີ 766/ຈຂ.ຈສ, ລົງວັນທີ 16 ກໍລະກົດ 2021 ວ່າດ້ວຍການໂຮມກົງຈັກ ແລະ ພະນັກງານຂອງ ຄະນະຮັບຜິດຊອບອານຸສາວະລີແຂວງ ໄປເປັນຂະແໜງໜຶ່ງຂຶ້ນກັບຫ້ອງວ່າການແຂວງ ແລະ ຂໍ້ຕົກລົງເຈົ້າແຂວງ ສະບັບເລກທີ 773/ຈຂ.ຈສ, ລົງວັນທີ 19 ກໍລະກົດ 2011 ວ່າດ້ວຍການຍົກຍ້າຍພະນັກງານຂອງຄະນະຮັບຜິດຊອບອານຸສາວະລີແຂວງ ໄປປະຈຳການ ຢູ່ຫ້ອງວ່າການແຂວງ. ຜ່ານມະຕິຕົກລົງຄະນະປະຈຳພັກແຂວງ ສະບັບເລກທີ 345/ ຄະນະປະຈຳພັກແຂວງ, ຫົວໜ້າ ຄຈພຂ, ລົງວັນທີ 22 ກໍລະກົດ 2011 ວ່າດ້ວຍການຍຸບໜ່ວຍພັກ ຄະນະຈັດຕັ້ງແຂວງຮາກຖານແລະ ໂອນສາມາຊິກພັກ ພະແນກວິທະຍາສາດ ແລະ ເຕັກໂນໂລຊີໄປຂື້ນກັບ 5 ພະແນກ. ແລະຜ່ານ ມະຕິຕົກລົງຄະນະປະຈໍາພັກແຂວງ ສະບັບເລກທີ 346/ຄຈພຂ, ລົງວັນທີ 22 ກໍລະກົດ 2011 ວ່າດ້ວຍການໂອນໜ່ວຍພັກຄະນະຮັບຜິດຊອບອານຸສາວະລີ ໄປຂຶ້ນກັບ ຄະນະພັກຮາກຖານ ຫ້ອງວ່າການແຂວງ.

ພິທີ ໄດ້ມີການເຊັນ ບົດບັນທຶກມອບໂອນ ຢ່າງເປັນທາງການ ລະຫວ່າງ ພະແນກວິທະຍາສາດ ແລະເຕັກໂນໂລຊີ ກັບພະແນກການ ທີ່ກ່ຽວຂ້ອງ ທີ່ໄດ້ຮັບການມອບໂອນ. ໂດຍເປັນກຽດເຂົ້າຮ່ວມ ພິທີຄັ້ງນີ້, ມີ ທ່ານ ວິໄລວົງ ບຸດດາຄໍາ ກໍາມະການສູນກາງພັກ, ເລຂາຄະນະບໍລິຫານງານພັກເເຂວງ, ເຈົ້າແຂວງຈຳປາສັກ, ທ່ານ ສະນັ່ນ ສີພາພົມມະຈັນ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີບັນດາ ຫົວໜ້າ, ຜູ້ຕາງໜ້າ ຈາກພະແນກການທີ່ກ່ຽວຂ້ອງ ແລະພັກງານ-ລັດຖະກອນ ເຂົ້າຮ່ວມ.