ມີເດຍລາວແຂວງຜົ້ງລີ
ກອງປະຊຸມສ່ອງແສງການຈັດຕັ້ງປະຕິບັດວຽກງານຮອບດ້ານ 9 ເດືອນຕົ້ນປີ ແລະ ທິດທາງ 3 ເດືອນທ້າຍປີ 2021 ຂອງອົງການປົກຄອງແຂວງຜົ້ງສາລີ ໄດ້ຈັດຂື້ນໃນຕອນເຊົ້າຂອງວັນທີ 4 ຕຸລາ 2021 ນີ້, ຢູ່ຫ້ອງປະຊຸມຊັ້ນ 5 ຂອງຫ້ອງວ່າການແຂວງ, ໂດຍພາຍໃຕ້ການເປັນປະທານຂອງ ທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຜົ້ງສາລີ, ມີບັນດາທ່ານກຳມະການປະຈຳພັກແຂວງ, ກຳມະການພັກແຂວງ, ບັນດາທ່ານເຈົ້າເມືອງ, ຮອງເຈົ້າເມືອງ 7 ເມືອງ, ຕະຫຼອດສະມາຊີກອົງການປົກຄອງແຂວງ, ພ້ອມດ້ວຍແຂກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ ທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີ ໄດ້ເຜີຍແຜ່, ເຊື່ອມຊື່ມເອກະສານຂອງສູນກາງຈຳນວນໝື່ງເປັນຕົ້ນແມ່ນ ມະຕິ 03/ຄບສພ ວ່າດ້ວຍການເພີ່ມທະວີການນຳພາຂອງພັກເພື່ອສ້າງການຫັນປ່ຽນ ຢ່າງແຂງແຮງ ແລະ ເລິກເຊິ່ງວຽກງານພະນັກງານ, ຄຳສັ່ງ ເລກທີ 190 /ຄລສພ ວ່າດ້ວຍການປັບປຸງກົງຈັກການຈັດຕັ້ງຂອງບັນດາກະຊວງ – ອົງການ ແລະ ທ້ອງຖີ່ນ, ແຈ້ງການຂອງກະຊວງພາຍໃນ ເລກທີ 175 ກ່ຽວກັບການຄົ້ນຄ້ວາປັບປຸງກົງຈັກ ແລະ ຂໍ້ຕົກລົງວ່າດ້ວຍການຈັດຕັ້ງ ແລະ ເຄືອນໄຫວຂອງບັນດາກົມທຽບເທົ່າກັບສູນກາງ, ພະແນການຂັ້ນແຂວງ ແລະ ຫ້ອງການຂັ້ນເມືອງ.

ຈາກນັ້ນ ທ່ານ ຄຳເປືອງ ເມືອງໄຊ ຮອງຫົວໜ້າຫ້ອງວ່າການແຂວງ ກໍ່ໄດ້ຂື້ນຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານຮອບດ້ານ ປະຈໍາ 9 ເດືອນ ແລະ ກໍານົດແຜນຈຸດສຸມ ປະຈໍາ 3 ເດືອນ ທ້າຍ ປີ 2021. ເຊິ່ງທ່ານໄດ້ຍົກໃຫ້ເຫັນກ່ຽວກັບສະພາບການຈັດຕັ້ງປະຕິບັດວຽກງານອັນພົ້ນເດັ່ນ, ບາງບັນຫາທີ່ຍັງເປັນຈຸດອ່ອນ, ຂໍ້ຄົງຄ້າງ ແລະ ສິ່ງທ້າທາຍທີ່ຍັງແກ້ໄຂບໍ່ທັນສຳເລັດ ລວມທັງທິດທາງແຜນການໃນເດືອນຕໍ່ໄປ ຂອງຂົງເຂດວຽກງານໃນແຕ່ລະຂະແໜງການ ໂດຍສະເພາະ ແມ່ນບັນດາຕົວເລກຄາດໝາຍຕ່າງໆທີ່ໄດ້ກຳນົດໄວ້ໃນ 6 ເດືອນຕົ້ນ ແລະ 6 ເດືອນທ້າຍປີ ຂອງ 2021 ແລະ ວຽກງານການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດຂອງເຊື້ອພະຍາດໂຄວິດ-19 ຢູ່ແຂວງຜົ້ງສາລີ. ຈາກນັ້ນ ຜູ້ແທນກອງປະຊຸມ ກໍ່ໄດ້ປະກອບຄຳຄິດຄໍາເຫັນໃສ່ແຕ່ລະບັນຫາ ທີ່ເຫັນວ່າຍັງການຈັດຕັ້ງປະຕິບັດບໍ່ໄດ້ດີເທົ່າທີ່ຄວນ ແລະ ບໍ່ບັນລຸຕາມເປົ້າໝາຍ ທັງນີ້ກໍ່ເພື່ອເຮັດໃຫ້ວຽກງານແຕ່ລະດ້ານໄດ້ຮັບການປັບປຸງ, ແກ້ໄຂ ແລະ ສາມາດຈັດຕັ້ງປະຕິບັດໃນຕໍ່ຫນ້າໄດ້ຢ່າງມີປະສິດທິພາບ ແລະ ມີຜົນສຳເລັດຕາມລະດັບຄາດຫມາຍ.

ຕອນທ້າຍຂອງກອງປະຊຸມ ທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີ ກໍ່ໄດ້ໄດ້ເຫນັ້ນຫນັກບາງບັນຫາທີ່ຍັງຄົງຄ້າງ ໂດຍສະເພາະແມ່ນມອບໃຫ້ຂະແຫນງການກ່ຽວຂ້ອງສົມທົບກັບທຸກພາກສ່ວນ ພ້ອມກັນສືບຕໍ່ແກ້ໄຂ ບັນຫາ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານ ໂດຍແນ່ໃສ່ເຮັດໃຫ້ທິດທາງແຜນການ ໃນ 3 ເດືອນທ້ານປີ 2021 ທີ່ໄດ້ກຳນົດໄວ້ນັ້ນ ບັນລຸຕາມເປົ້າຫມາຍເທົ່າທີຈະຫຼາຍໄດ້.
( ພາບ – ຂ່າວ: ແສງຄຳ ສາລີວັນ )