ມີເດຍ/ລາວແຂວງອຸດົມໄຊ ຂ່າວ: ແສງອາທິດ ກວດແກ້: ອ່ຽງຄຳ ວິລະສັກ
ເພື່ອເປັນການຜູກແໜ້ນຄວາມສາມັກຄີ ຊ່ວຍເຫຼືອເຊິ່ງກັນ ແລະ ກັນ ລະຫວ່າງ ສອງຊາດ ຫວຽດນາມ-ລາວ, ລາວ-ຫວຽດນາມ ເວົ້າລວມ ເວົ້າສະເພາະ ແມ່ນແຂວງວິງຟຸກ ແຫ່ງ ສສ ຫວຽດນາມ ແລະ ແຂວງອຸດົມໄຊ ແຫ່ງ ສປປ ລາວ ໃຫ້ເລິກເຊິ່ງ ຮອບດ້ານ.

ວັນທີ່ 17 ມິຖຸນານີ້ ທີ່ຫຼັກໝາຍຊາຍແດນ 113 ດ່ານຊາຍແດນ ປາງຫົກ ແຂວງຜົ້ງສາລີ ສປປ ລາວ ແລະ ດ່ານຊາຍແດນ ເຕີ່ຍຈ່າງ ແຂວງດຽນບຽນ ສສ ຫວຽດນາມ ຕາງໜ້າອົງການປົກຄອງແຂວງ ແລະ ປະຊາຊົນ ແຂວງວິງຟຸກ ແຫ່ງ ສສ ຫວຽດນາມ ໄດ້ນຳເອົາອຸປະກອນການແພດ ມາມອບໃຫ້ອົງການປົກຄອງ ແລະ ປະຊາຊົນ ແຂວງອຸດົມໄຊ ໂດຍແມ່ນ ພະແນກການຕ່າງປະເທດ ຕາງໜ້າການນຳແຂວງອຸດົມໄຊ ຮັບ ເພື່ອມາມອບຕໍ່ໃຫ້ຄະນະສະເພາະກິດແຂວງອຸດົມໄຊ ໄປນຳໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ມີປະສິດທິພາບ.

ມາໃນວັນທີ 21 ມິຖຸນານີ້ ທີ່ຫ້ອງປະຊຸມ ພະແນກສາທາລະນະສຸກແຂວງ ໄດ້ຈັດພິທີ ມອບ-ຮັບ ອຸປະກອນດັ່ງກ່າວ ໂດຍແມ່ນ ທ່ານ ຈໍາປາ ສີດາຄຳ ຫົວໜ້າພະແນກການຕ່າງປະເທດ ຕາງໜ້າການນຳແຂວງ ເປັນຜູ້ມອບ ຮັບໂດຍແມ່ນ ດຣ ຄຳວິງ ຫົງດາລາ ຮອງຫົວໜ້າພະແນກ ສາທາລະນະສຸກ ຕາງໜ້າໃຫ້ແກ່ ຄະນະສະເພາະກິດ ແຂວງອຸດົມໄຊ ມີພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີ.

ເຄື່ອງທີ່ອົງການປົກຄອງແຂວງ ແລະ ປະຊາຊົນ ແຂວງວິງຟຸກ ແຫ່ງ ສສ ຫວຽດນາມ ນຳມາມອບ ລວມມີ: ຜ້າອັດປາກ-ດັງ ລຸ້ນ 4 ຊັ້ນ ຈຳນວນ 60 ແກັດ, ຊຸດປ້ອງກັນພະຍາດ 7 ແກັດ, ນ້ຳຢາຂ້າເຊື້ອ, ເຈວລ້າງມື, ຢາຕ້ານເຊື້ອ 31 ແກັດ, ເຄື່ອງວັດແທກອຸນຫະພຸມ ຈໍານວນ 25 ອັນ, ລວມມູນຄ່າທັງໝົດ 210 ລ້ານດົ້ງ (ສະກຸນເງິນຫວຽດນາມ).