ເພື່ອເປັນການຫວນຄຶນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ ( 22 ມີນາ ປີ 1955 – 22 ມີ ນາ ປີ 2021 ) ຊາດລາວເປັນຊາດໜຶ່ງທີ່ມີປະຫວັດສາດອັນຍາວນານ, ມີມູນເຊື້ອໃນການຕໍ່ສູ້ຢ່າງອົງອາດກ້າຫານຕີເອົາຊະນະພວກຈັກກະພັດຕ່າງດ້າວ ແລະ ລູກແຫຼ່ງຕີນມືທີ່ຮຸກຮານລາວ ພ້ອມນັ້ນກໍ່ຍັງມີມູນເຊື້ອໃນການປົກປັກຮັກສາ ແລະ ສ້າງສາພັດທະນາປະເທດຊາດ
ທ່ານ ບົວສີ ຄຽມມະນີຂັນໄຊ ພະນັກງານບໍານານ (ອາດີດຮອງເລຂາພັກແຂວງສາລະວັນ) ໄດ້ບັນລະຍາຍເຖິງຂະບວນການຕໍ່ສູ້ຕ່າງໆ ໃນແຕ່ລະໄລຍະນັບແຕ່ສະໄໝເຈົ້າຟ້າງຸ່ມທ້ອນໂຮມອານາຈັກລາວລ້ານຊ້າງ, ຈາກນັ້ນກໍ່ໄດຍົກໃຫ້ເຫັນຂະບວນການຕໍ່ສູ້ຕ້ານຈັກກະພັດຕ່າງໆ ທີ່ເຂົ້າມາຮຸກຮານລາວ ຂອງບັນດາທ່ານຜູ້ນຳລາວທີ່ຮັກຊາດແຕ່ເໜືອເຖີງໃຕ້ ນັບແຕ່ປີ 1983 ແລະ ຕໍ່ມາປີ 1930 ພັກຄອມມູນິດອິນດູຈີນໄດ້ຮັບການສ້າງຕັ້ງຂື້ນເພື່ອນຳພາການຕໍ່ສູ້ຂອງປະຊາຊົນຢູ່ອິນດູຈີນ ຕົກມາຮອດປີ 1934 ອົງຄະນະພັກແຄ້ວນລາວ ກໍ່ໄດ້ຮັບການສ້າງຕັ້ງຂື້ນເພື່ອນໍາພາຂະບວນການຕໍ່ສູ້ຕ່າງໆ, ເມື່ອມີພັກນໍາພາການຕໍ່ສູ້ຂອງປະຊາຊົນກໍ່ນັບມື້ນັບກວ້າງຂວງ ແລະ ໄດ້ຮັບໄຊຊະນະເປັນກ້າວໆ ມາຮອດວັນທີ 22 ມານາ ປີ 1955 ພັກປະຊາຊົນປະຕິວັດລາວໄດ້ຮັບການສ້າງຕັ້ງຂື້ນ, ພາຍຫຼັງທີ່ໄດ້ຮັບການສ້າງຕັ້ງຂື້ນກໍ່ໄດ້ປະເຊີນໜ້າກັບຈັກກະພັດອາເມລິກາ ແລະ ໄດ້ແບກຫາບເອົາພະລາກຳອັນໜັກໜ່ວງເພື່ອຊີ້ນຳ, ນຳພາປວງຊົນລາວທັງຊາດຕໍ່ສູ້ຕ້ານຈັກກະພັດ ແລະ ລູກແຫຼ່ງຕີນມືທີ່ຂາຍຊາດຢ່າງດຸເດຶອດຂ້ຽວຂາດ ຈົນເຮັດໃຫ້ພວກຈັກກະພັດຍອມເຊັນສັນຍາເຊີແນວໃນປີ 1954 ມາຮອດວັນທີ 21 ກຸມພາ ປີ 1973 ສັນຍາດັ່ງກ່າວເປັນຂີດໝາຍແຫ່ງການປະລາໄຊຢ່າງສິ້ນເຊີງໃນສົງຄາມຮຸກຮານລ່າເມືອງຂື້ນແບບໃໝ່ຂອງພວກຈັກກະພັດອາເມລິກາ ນັ້ນແມ່ນຍ້ອນພາຍໃຕ້ການຊີ້ນຳ ນຳພາຂອງພັກປະຊາຊົນປະຕິວັດລາວທີ່ສະຫຼາດສ່ອງໃສ ເຮັດໃຫ້ຂະບວນການຕໍ່ສູ້ຕ່າງໆ ໃນຂອບເຂດທົ່ວປະເທດໄດ້ຮັບໄຊສະນະເປັນກ້າວໃນແຕ່ລະໄລຍະຈົນກ້າວໄປເຖິງການປົດປ່ອຍປະເທດຊາດໄດ້ຢ່າງສົມບູນ, ມາຮອດວັນທີ 2 ທັນວາ ປີ 1975 ກໍ່ໄດ້ປະກາດສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນຢ່າງເປັນທາງການ.


ຈາກນັ້ນຜູ້ເຂົ້າຮ່ວມກໍ່ຍັງໄດ້ຮັບຟັງເອກະສານປະຖະກະຖາວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ( 21 ມີນາ 1946-21 ມີນາ 2021 ) ພິທີດັ່ງໄດ້ຈັດຂື້ນໃນວັນທີ 22 ມີນາ ປີ 2021 ຢູ່ທີ່ຫ້ອງປະຊຸມສະໂມສອນແຂວງ, ໃຫ້ກຽດເຂົ້າຮ່ວມມີບັນດາທ່ານ ຄະນະປະຈຳພັກແຂວງ, ກຳມະການພັກແຂວງ ແລະ ພະນັກງານລັດຖະກອນສະມາຊິກພັກ ແລະ ອົງການຈັດຕັ້ງຕ່າງໆ ເຂົ້າຮ່ວມຢ່າງຫຼວງຫຼາຍ.
ພາບ-ຂ່າວ: ສິດຕາ ເພັດວົງສາ