ວັນທີ 21 ມິຖຸນາ 2021 ແຂວງອັດຕະປື ໄດ້ຈັດກອງປະຊຸມສະຫຼຸບວຽກງານຄຸ້ມຄອງໄພພິບັດ ປະຈໍາປີ 2020 ແລະ ວາງທິດທາງແຜນປີ 2021 ຂື້ນທີ່ຫ້ອງວ່າການປົກຄອງແຂວງ,ໂດຍການເປັນປະທານຂອງທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ປະທານຄະນະກຳມະການຄຸ້ມຄອງໄພພິບັດຂັ້ນແຂວງ, ມີຄະນະກໍາມະການຄຸ້ມຄອງໄພພິບັດຂັ້ນແຂວງ,ຂັ້ນເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.


ໃນກອງປະຊຸມທ່ານນາງ ອຳຄາ ສີຫາລາດ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງອັດຕະປື,ໄດ້ລາຍງານກ່ຽວກັບສະພາບໄພພິບັດຕ່າງໆທີ່ເກີດຂຶ້ນພາຍໃນແຂວງອັດຕະປື,ເຊິ່ງໃນປີ 2020 ຜ່ານມາທົ່ວແຂວງອັດຕະປື ມີໄພພິບັດເກີດຂື້ນປະເພດອັດຄີໄພ ເກີດຂື້ນຢູ່ 3 ເມືອງ,ມີ 22ຄອບຄົວໄດ້ຮັບຜົນກະທົບ,ມີມູນຄ່າຄວາມເສຍຫາຍ 631 ລ້ານກວ່າກີບ,ໄພພິບັດປະເພດລົມພະຍຸພັດ ເກີດຂື້ນຢູ່ 4 ເມືອງ,ມີ 6 ບ້ານ ແລະມີ 7 ຄອບຄົວ ໄດ້ຮັບຜົນກະທົບ,ລວມມູນຄ່າຄວາມເສຍຫາຍ 150 ລ້ານກວ່າກີບ,ນອກນັ້ນຍັງມີຊ້າງປ່າທໍາລາຍຜົນຜະລິດຂອງປະຊາຊົນ ເກີດຂື້ນຢູ່ 1 ເມືອງ,ມີ 3 ບ້ານ ແລະ ມີ 57 ຄອບຄົວ ເນື້ອທີ່ການຜະລິດໄດ້ຮັບຄວາມເສຍຫາຍ,ລວມມູນຄ່າເສຍຫາຍ 50 ລ້ານກວ່າກີບ,ສ່ວນປະເພດການຊ່ວນເຫຼືອແມ່ນໄດ້ຊ່ວຍເຂົ້າສານ 4.300 ກິໂລກະລາມ,ສັງກະສີ 490 ແຜ່ນ ແລະ ຕະປູຕອກສັງກະສີ 165 ກັບ,ເຄື່ອງໃຊ້ຄົວເຮືອນມີ 29 ຊຸດ,ລວມມູນຄ່າຂອງການຊ່ວຍເຫຼືອທັງໝົດ 81 ລ້ານກວ່າກີບ.
ໃນກອງປະຊຸມບັນດາຜູ້ເຂົ້າຮ່ວມຍັງໄດ້ປືກສາຫາລືໃສ່ບົດສະຫຼຸບແລະທິດທາງແຜນການ ເພື່ອເຮັດໃຫວຽກງານການປ້ອງກັນ,ການຕອບໂຕ້ໄພພິບັດໃນປີ 2021 ໄດ້ຮັບການຈັດຕັ້ງປະຕິບັດມີປະສິດທິຜົນ.
ພາບ-ຂ່າວ: ມະນີວອນ