ມີເດຍລາວແຂວງເຂກອງ ຂ່າວ ພຸດທະສອນ
ທ່ານ ດຣ. ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງເຊກອງ, ຮອງປະທານຄະນະສະເພາະກິດຂັ້ນແຂວງ ໄດ້ຖະແຫຼງຂ່າວກ່ຽວກັບການຕິດຕາມເຝົ້າລະວັງການແຜ່ລະບາດຂອງພະຍາດໂຄວິດ-19 ໃນວັນທີ 7 ພຶດສະພາ ນີ້ວ່າ: ຄະນະສະເພາະກິດແຂວງເຊກອງ ໄດ້ສຶບຕໍ່ຈັດຕັ້ງປະຕິບັດຄຳສັ່ງ ສະບັບເລກທີ 15/ນຍ ລົງວັນທີ 21 ເມສາ 2021 ແລະຄຳສັ່ງຂອງຫ້ອງວ່າການສຳນັກງານນາຍົກ ເລກທີ 462/ຫສນຍ, ລົງວັນທີ 5 ພຶດສະພາ 2021, ຄຳສັ່ງຂອງເຈົ້າແຂວງ ສະບັບເລກທີ 26/ຈຂ.ຊກ, ລົງວັນທີ 6 ພຶດສະພາ 2021 ແລະຍັງສຶບຕໍ່ຈັດຕັ້ງປະຕິບັດມາດຕະການປ້ອງກັນພະຍາດໂຄວິດ-19 ອີກນັບແຕ່ວັນທີ 6-20 ພຶດສະພາ 2021 ຢ່າງເຂັ້ມງວດ.

ຊຶ່ງໄລຍະທີໜຶ່ງ ຜ່ານມາ ແຕ່ວັນທີ 22 ເມສາ – 5 ພຶດສາພາ ຄະນະປະຈໍາພັກແຂວງຜູ້ຊີ້ນໍາເມືອງ, ລວມທັງຄະນະສະເພາະກິດແຕ່ລະພາກສ່ວນໄດ້ມີການເຄື່ອນໄຫວລົງຕິດຕາມຊຸກຍູ້-ຊີ້ນຳການຈັດຕັ້ງຜັນຂະຫຍາຍ ບັນດານິຕິກຳຕ່າງໆໃນວຽກງານປ້ອງກັນພະຍາດໂຄວິດ-19 ເພື່ອເຮັດໃຫ້ຂັ້ນເມືອງເຂົ້າໃຈໃນທິດທາງດຽວ ແລະ ເປັນເອກະພາບໃນການຈັດຕັ້ງປະຕິບັດຂອງຄະນະສະເພາະກິດແຕ່ລະຂັ້ນ; ເຈົ້າໜ້າທີ່ ປກຊ-ປກສ ແຂວງ ແລະເມືອງແມ່ນໄດ້ປະກອບສ່ວນເວນຍາມປະຈຳຢູ່ຈຸດກວດລະຫວ່າງແຂວງຕໍ່ແຂວງ, ເມືອງຕໍ່ເມືອງ ແລະຢູ່ໂຮງໝໍແຂວງຢ່າງເປັນປົກກະຕິ.

ສໍາລັບການລະດົມທຶນປະກອບສ່ວນຂອງສັງຄົມ ແມ່ນໄດ້ຮັບການຊ່ວຍເຫຼືອຈາກບໍລິສັດ, ຫ້າງຮ້ານ, ຜູ້ປະກອບການ ,ພະແນກການ ລວມເປັນເງິນທັງໝົດ 747,626,000 ກີບ, ໃນນີ້ເປັນເງິນສົດ ຈຳນວນ 650,500,000 ກີບ ແລະອຸປະກອນ 97,126,000 ກີບ, ໄດ້ຮັບອຸປະກອນການແພດຈາກຄະນະສະເພາະກິດສູນກາງ ແລະອົງການ ຢູນິເຊັບ ມູນຄ່າ 276,287,379ກີບ, ການລະດົມຈາກແນວໂຮມປະກອບມີ ເປ 40ອັນ, ເສື່ອ 74 ຜືນ, ໝອນ 50 ໜ່ວນ, ຜ້າຮົ່ມ 29 ຜືນ, ຕຽງ 29 ໜ່ວຍ, ມຸ້ງ 20 ດາງ,ນໍ້າດື່ມ 11 ແກັດ.
ທ່ານ ດຣ ຄໍາໄຫຼ ສັນຕິພູມ ໃຫ້ຮູ້ວ່າ: ສະພາບລວມທົ່ວປະເທດ ມີຜູ້ຕີດເຊື້ອສະສົມທັງໝົດ 1.205ຄົນ( ເພີ່ມໃຫມ່+28ຄົນ ), ປົວດີ  122 ຄົນ, ເສຍຊີວິດ 0 ຄົນ, ກໍາລັງປິ່ນປົວ 1083 ຄົນ
ສໍາລັບແຂວງເຊກອງ ມີກໍລະນີຕິດເຊື້ອສະສົມ 1 ຄົນ ປິ່ນປົວຢູ່ແຂວງຈຳປາສັກ ເປັນຄົນຈີນ, ກໍລະນີໃໝ່ 0 ຄົນ, ສົ່ງຕົວຢ່າງໄປກວດ ແຕ່ວັນທີ 26 ເມສາ ຫາ 5 ພຶດສະພາ 2021 ຈໍານວນ 251 ຄົນ, ໄດຮັບຜົນກວດ 64 ຄົນ ບໍ່ພົບເຊື້ອ, ລໍຜົນກວດ  197 ຕົວຢ່າງ, ຈຳກັດບໍລິເວນຢູ່ສູນສະສົມທົ່ວແຂວງ 507 ຄົນ, ປ່ອຍຕົວ 439 ຄົນ; ປະຈຸບັນມີຜູ້ຈໍາກັດບໍລິເວນທັງໝົດ 68 ຄົນ, ໃນນີ້ເມືອງລະມາມ 2 ຄົນ, ເມືອງທ່າແຕງ 60  ຄົນ, ເມືອງກະລຶມ 0 ຄົນ, ເມືອງດາກຈຶງ 6 ຄົນ,


ໂອກາດນີ້ ທ່ານ ດຣ ຄໍາໄຫຼ ສັນຕິພູມ ຍັງໄດ້ ຂໍເຊີນຊວນໃຫ້ມາສັກຢາປ້ອງກັນພະຍາດໂຄວິດ-19 ຕາມຈຸດຕ່າງໆທີ່ໄດ້ກຳນົດໄວ້ ເລີ່ມແຕ່ວັນທີ 5 ພຶດສະພາ 2021 ໃຫ້ຄົບ ທັງ 2 ເຂັມ, ໃຫ້ສຶບຕໍ່ປະຕິບັດມາດຕະການ ເວລາອອກເຮືອນ, ໃສ່ຜ້າອັດປາກ-ດັງ, ເຈວລ້າງມື, ຮັກສາໄລຍະຫ່າງ 1 ແມັດ, ນອກນີ້ທ່ານຍັງໄດ້ຮຽກຮ້ອງມາຍັງອຳນາດການປົກທຸກຂັ້ນ ຊ່ວຍເກັບກຳຂໍ້ມູນກໍລະນີ ບຸກຄົນ, ນັກສຶກສາ, ແຮງງານ, ລູກຫຼານກັບຈາກຕ່າງແຂວງ ແລ້ວລາຍງານດ່ວນໃນສຸກສາລາ ຫຼື ສາທາເມືອງ ເພື່ອຕິດຕາມສຸຂະພາບ ແລະ ກັກບໍລິເວນໃຫ້ຄົບ 14 ວັນ