ມີເດຍລາວແຂວງເຊກອງ (ຂ່າວ-ພາບ: ແກ້ວໄຊຍະວົງ) ພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020 ໃຫ້ແກ່ໜ່ວຍຮາກຖານອົງການໄອຍະການປະຊາຊົນ (ອຍກ) ແຂວງເຊກອງໄດ້ຈັດຂຶ້ນໃນວັນທີ 9 ມິຖຸນາ 2021 ໂດຍມີສະຫາຍ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ; ສະຫາຍ ຄໍາບາງ ພະສະແຫວງ ກໍາມະການພັກແຂວງ, ເລຂາໜ່ວຍພັກ, ຫົວໜ້າ ອຍກ ແຂວງ, ມີເລຂາ-ຮອງເລຂາໜ່ວຍພັກ, ແຂກຖືກເຊີນ ພ້ອມດ້ວຍສະມາຊິກພັກໃນໜ່ວຍເຂົ້າຮ່ວມ.

ໃນພິທີ ສະຫາຍ ອິນປອນ ວັນນີວົງຄໍາ ຮອງເລຂາໜ່ວຍພັກ ອຍກ ແຂວງ ໄດ້ນໍາສະເໜີບົດລາຍງານການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2020 ທີ່ຢືນຢັນເຖິງຜົນງານ ແລະການເຄື່ອນໄຫວຈັດຕັ້ງປະຕິບັດວຽກງານໃນໄລຍະຜ່ານມາ ພາຍໃຕ້ການນໍາພາ-ຊີ້ນໍາໂດຍກົງຂອງອົງຄະນະພັກພັກແຂວງ ເຊິ່ງຄະນະໜ່ວຍພັກ ອຍກ ແຂວງໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ-ສະມາຊິກພັກຢ່າງຕໍ່ເນື່ອງ ໂດຍໄດ້ຖືເອົາການດໍາເນີນຊີວິດການເມືອງພາຍໃນຈຸ-ໜ່ວຍ ແລະຂະແໜງການພາຍໃນເປັນບ່ອນຕໍານິ, ກໍ່ສ້າງຊ່ວຍເຫຼືອເຊິ່ງກັນ ແລະກັນ; ຈັດຕັ້ງການຄົ້ນຄວ້າເຊື່ອມຊຶມມະຕິຄໍາສັ່ງຂອງພັກ ແລະແຜນພັດທະນາເສດຖະກິດ-ສັງຄົມຂອງລັດ ແນໃສ່ໃຫ້ພະນັກ ງານ-ສະມາຊິກພັກຮັບຮູ້ເຂົ້າໃຈ ແລະກໍາແໜ້ນ ພ້ອມກັນຈັດຕັ້ງປະຕິບັດໃຫ້ບັນລຸຕາມຈຸດປະສົງ, ຄາດໝາຍ ແລະເປົ້າໝາຍທີ່ວາງໄວ້.

ພ້ອມນີ້ ກໍ່ເອົາໃຈໃສ່ປັບປຸງກົງຈັກການຈັດຕັ້ງຂອງພັກ-ລັດ, ປັບປຸງແບບແຜນການນໍາພາ-ວິທີເຮັດວຽກ, ບັນຈຸຊັບຊ້ອນພະນັກງານໃຫ້ແທດເໝາະກັບຄວາມຮູ້ຄວາມສາມາດ; ນໍາພາ-ຊີ້ນໍາປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ; ວຽກງານອົງການຈັດຕັ້ງມະຫາຊົນ ແລະວຽກງານວິຊາສະເພາະຕາມພາລະບົດບາດ, ສິດ ແລະໜ້າທີ່ຂອງອົງການໄອຍະການປະຊາຊົນແຂວງ ເປັນຕົ້ນຕິດຕາມກວດກາການປະຕິບັດກົດໝາຍ; ການສັ່ງຟ້ອງຜູ້ຖືກຫາຂຶ້ນສານ; ການປະຕິບັດຄໍາຕັດສິນຂອງສານທີ່ນໍາໃຊ້ໄດ້ຢ່າງເດັດຂາດ; ການແກ້ໄຂຄະດີ, ແກ້ໄຂຄໍາຮ້ອງອື່ນໆໃຫ້ຖືກຕ້ອງ ແລະມີຄວາມຍຸຕິທໍາ.

ຂະນະດຽວກັນ ກໍ່ໄດ້ຜ່ານທິດທາງແຜນການ ແລະຄາດໝາຍສູ້ຊົນໃນປີ 2021 ຈາກນັ້ນ ຮອງຫົວໜ້າຄະນະຈັດຕັ້ງແຂວງ ກໍໄດ້ຂືຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວນການຮັບຮອງໜ່ວຍພັກອົງການໄອຍະການປະຊາຊົນແຂວງເຊກອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020 ແລະແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021.

ໂອກາດດັ່ງກ່າວ ສະຫາຍ ດົງເພັດ ພະຍົນ ກໍໄດ້ໃຫ້ກຽດຂຶ້ນມອບໃບຢັ້ງຢືນ ແລະມີຄຳເຫັນໂອ້ລົມ ເຊິ່ງໄດ້ຕີລາຄາສູງຕໍ່ການນໍາພາ-ຊີ້ນຳຂອງຄະນະໜ່ວຍພັກ-ຄະນະນໍາ ອບກ ແຂວງໃນໄລຍະຜ່ານມາ ແລະຮຽກຮ້ອງໃຫ້ສືບຕໍ່ເສີມຂະຫຍາຍຜົນງານທີ່ພົ້ນເດັ່ນເຂົ້າໃນການປະຕິບັດວຽກງານວິຊາສະເພາະ ຕິດພັນກັບການແກ້ໄຂຈຸດອ່ອນ-ຂໍ້ຄົງຄ້າງ ແລະສະກັດກັ້ນຕ້ານທຸກບັນຫາປະກົດການຫຍໍ້ທໍ້ບໍ່ໃຫ້ເກີດຢູ່ກົມກອງ, ພ້ອມນີ້ ສະຫາຍຍັງໄດ້ໃຫ້ທິດຊີ້ນໍາຫຼາຍບັນຫາ ເພື່ອໃຫ້ຄະນະພັກ-ຄະນະນໍາ ແລະສະມາຊິກພັກນໍາໄປຈັດຕັ້ງຜັນຂະຫຍາຍ ເພື່ອເຮັດສໍາເລັດໜ້າທີ່ການເມືອງຂອງຕົນດ້ວຍບາດກ້າວຫັນປ່ຽນໃໝ່ ພາຍໃຕ້ແນວທາງຂອງພັກ ແລະລະບຽບກົດໝາຍຂອງລັດ.